Hetianga dik lo taka min puhna hi Tanhril LC leh NGO chuan a tawp thlengin kan do zel dawn!

Aizawl | Feb 26, 2026: Tanhril-a thihna thleng leh a hnua court-a zualkona chungchangah Tanhril Local Council leh All NGO chuan vawiin khan thuchhuah siamin, "Hetianga dik lo taka min puhna hi Tanhril Local Council leh All NGO chuan a tawp thlengin kan do zel dawn," an ti.

Marina Lalchhanchhuahi thattu nia Police ten an chhuichhuah RL Peka, Tanhril Vengpui te In hal leh a chhungte hnawhchhuah chungchanga thil thleng kaihhnawiha RL Peka nupui Lalțanpuii'n High Court-a thubuai siamsak a dilna te chu Tanhril Local Council leh All NGO chuan vawiin khan thuchhuah inţawm an siamin an sawifiah.

Tanhril Local Council leh All NGO chuan, "Pawi khawih ve lo ten an tawrh hlaua nasa taka ban an phar avanga sawiselna, diriamna leh rilru hliam pawh a dam fel hmaa an hmangai tak leh duhsak taka tualthihna tuartu chhungte mitmei pawh veng hleithei lova, an dawm hram hram ten an rawn khing let ta mai leh mipui thinrim thil tiha a huaihawttu leh a mei zang hlaptu ang maia puh kan ni hi kan pawm dam thei lo va, a tawp thlengin Tanhril khawtlang hi kan kal zel dawn," an ti a.

"January ni 27 zana thil thlengah hian Pu RL Peka chhungte sahimna tur ngaihtuah a ni a. Hemi zan pawh hian Tanhril Local Council kaihhruainain All NGO Emergency Meeting neih a ni a, hetah hian pawl aiawhte kan tel vek bawk a ni. Kan thuchhuak leh rorel pawh a hunlai mil zela pawikhawihna leh tharum thawhna punlun tur venna atan leh mipui thinrim sosang lutuk ben daihna atana tih leh rel a ni," tiin an thuchhuah hian a tarlang bawk.

PRESS RELEASE

TANHRIL LOCAL COUNCIL & ALL NGO MEETING

26TH FEBRUARY, 2026

NI. Marina Lalchhanchhuahi tualthihna kal zel chungchangah Pu RL Peka(L) nupui Pi Laltanpuii'n High Court-ah Sawrkar leh Khawtlang hruaitute laka case siam sak a dilna chu Social Media kaltlanga hmuh leh hriat a ni a. He thu hi Tanhril Local Council leh All NGO (25th February, 2026) thukhawm chuan a ngaithu takin pawi a ti hle a, Zoram mipuite hnenah thil thlen dan dik tak puan chhuah tulin a hria a, hetiang hian thuchhuah a siam.

1. NI Marina Lalchhanchhuahi tualthihna chungchang hi a tir atangin Mizoram Police ten ngawrh taka an chhui avangin an hnu chhui tibuai thei zawnga hmalak leh thuchhuah reng reng Tanhril Local Council leh All NGO thukhawm chuan neih loh tha a ti a, he tualthihna tuartu leh pawikhawihtu ni a rinhlelh hi Tanhril khua leh tui an nih avangin fimkhur taka hma la in, thu belhchian dawl lo leh khual thuthang, boruak tipunlun thei laka inveng reng chungin hma a la thin a ni. Hnu chhuitu kan Police ten thahnemngai taka hma an laknaah chhuanawm kan ti hle.

2. January ni 27 (Thawhlehni) a Mizoram Police-in Marina-i tualthihna chungchanga Press Statement a chhuah zan khan veng mipui pungkhawm thinrim khap daih tumin, boruak muanawm taka kalpui tumin palai hna khawtlang hruaitute hian an thawk a, vawi tam ban pharin insum hram hram turin mipui an ngen a, mipui thinrim zawng zawng khap dai thei lo mah se, Pu RL Peka te in luahlai leh an bungrua te pawh him dam taka vengin, bungraw thiarchhuah ni pawhin veng ramri thlengin an thlah liam thlap a ni.

3. Pawi khawih ve lo ten an tawrh hlaua nasa taka ban an phar avanga sawiselna, diriamna leh rilru hliam pawh a dam fel hmaa an hmangai tak leh duhsak taka tualthihna tuartu chhungte mitmei pawh veng hleithei lova, an dawm hram hram ten an rawn khing let ta mai leh mipui thinrim thil tiha a huaihawttu leh a mei zang hlaptu ang maia puh kan ni hi kan pawm dam thei lo va, a tawp thlengin Tanhril khawtlang hi kan kal zel dawn a ni.

4. Tin, January ni 27 zana thil thlengah hian Pu RL Peka chhungte sahimna tur ngaihtuah a ni a. Hemi zan pawh hian Tanhril Local Council kaihhruainain All NGO Emergency Meeting neih a ni a, hetah hian pawl aiawhte kan tel vek bawk a ni. Kan thuchhuak leh rorel pawh a hunlai mil zela pawikhawihna leh tharum thawhna punlun tur venna atan leh mipui thinrim sosang lutuk ben daihna atana tih leh rel a ni.

Hetianga dik lo taka min puhna hi Tanhril Local Council leh All NGO chuan a tawp thlengin kan do zel dawn a ni.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]