EMS hnuaiah kum 8 – 15 inkar infiammite tan hma la zel dawn; Tuipuiral Games leh Tuichangral Games-a sports discipline telh belh

Aizawl | Feb 26, 2026: Sports and Youth Services Minister Lalnghinglova Hmar chuan vawiin chhun dar 1:00 khan Empowering Mizoram Sports website tlangzarh a, thuthar thehdarhtute kawmin, Empowering Mizoram Sports chungchang a sawifiah a, "Mizoram sawrkarin hmathlir mumal tak nei chungin sports-ah hma a la a. A bulthut atanga infiammite zirtirna pek chu ngaihpawimawh a ni," tiin, "EMS hi Public - Private - Partnership (PPP) mode-a kalpui tur a ni a. Sawrkarin coach te leh an hlawh bakah sports equipment a tum ang," a ti.

"India in Olympic Games 2036 thlen tumin hma a la mek a. He khawvel huap inelna sanga Mizo thalaite tel ve thei tur chuan tun atanga hma lak a tul. Empowering Mizoram Sports (EMS) pawh hi ‘Vision 2036 Olympic Games’ nei chunga duan leh kalpui tur a ni,"

"EMS hnuaiah hian sports association leh mipuite nen tangkawpin, Public - Private Partnership (PPP) mode hmangin Mizoram pum tuamchhuak sports coaching leh talent development lian tham kalpui tum a ni. Hmun kilkhawr zawka naupang kum 8 – 15 inkar sports talent nei tha tak tak, training/coaching mumal dawng si lo te zawng chhuakin an bana kaih a, Mizoram leh India aiawh thei tura chherchhuah tum a ni,"

"EMS hnuaiah hian Mizoram hmun hrang hrangah naupang kum 8 - 15 inkarte chu basic coaching pek an ni dawn a, coaching hi ni 15 chhung atan niin, nitin darkar 3, a vaiin darkar 45 pek an ni dawn a ni,"

"Empowering Mizoram Sports kalpui dan tur enchhin nan Tuipuiral leh Tuichangral Annual Sports Meet-ah te Olympic-a tel ve theihna tur hnaivai nia ngaih sports discipline telh thar a ni a, a hmuna training pek chilh a ni bawk," a ti bawk.

Press Note for Empowering Mizoram Sports

Mizoram sawrkarin hmathlir mumal tak nei chungin sports-ah hma a la a. A bulthut atanga infiammite zirtirna pek chu ngaihpawimawh a ni.

India in Olympic Games 2036 thlen tumin hma a la mek a. He khawvel huap inelna sanga Mizo thalaite tel ve thei tur chuan tun atanga hma lak a tul. Empowering Mizoram Sports (EMS) pawh hi ‘Vision 2036 Olympic Games’ nei chunga duan leh kalpui tur a ni.

EMS hnuaiah hian sports association leh mipuite nen tangkawpin, Public-Private Partnership (PPP) mode hmangin Mizoram pum tuamchhuak sports coaching leh talent development lian tham kalpui tum a ni. Hmun kilkhawr zawka naupang kum 8 – 15 inkar sports talent nei tha tak tak, training/coaching mumal dawng si lo te zawng chhuakin an bana kaih a, Mizoram leh India aiawh thei tura chherchhuah tum a ni.

o EMS kalpuina tur hi 'The Mizoram Bana Kaih (Hand holding) Scheme' hnuaia 'Participative Planning and Innovations for Sustainable Development' component atangin Rs. 2,50,00,000/- (Rupees two crore and fifty lakhs) sanction tawh a ni.

o EMS hnuaiah hian Mizoram hmun hrang hrangah naupang kum 8 - 15 inkarte chu basic coaching pek an ni dawn a, coaching hi ni 15 chhung atan niin, nitin darkar 3, a vaiin darkar 45 pek an ni dawn a ni.

o Kum 8 - 15 inkar target an nih chhan hi, kum 2036-a taksa leh rilru that vanglai thleng tur 'age group' a nih vang a ni.

o Mizote thiam zawng, khawvel huapa India a thatna ni bawk (Olympic qualification hnaihna ni a ngaih) sports discipline-te chu EMS hnuaiah ngaihpawimawh an ni ang. Chungte chu:

i) Archery v) Judo

ii) Badminton vi) Taekwondo

iii) Boxing vii) Weightlifting

iv) Hockey viii) Wrestling

o EMS hi Public - Private - Partnership (PPP) mode-a kalpui tur a ni a. Sawrkarin coach te leh an hlawh bakah sports equipment a tum ang.

o Coach duh khua/veng te'n EMS website kaltlangin online in dilna an thehlut ang a, a remchan dan ang zelin, tumah duhsak bik awm lovin coach-te tirh chhuah thìn an ni dawn a ni. Coach diltu khawtlangin coach-te veivahna (sumo fare), thlenna leh coaching an pek chhunga an ei leh in an tum ve ang. Hei hi khawtlangin neitu rilru an put a, theihtawp an lo chhuah ve theih nana ruahman a ni.

o EMS hi phase hrang hranga kalpui tur a ni a. Ni 15 training-a tel naupangte tan district leh state level inelna buatsaih a ni ang. Heng inelnaa chetha leh theihna nei sang bikte chu residential mode-a uluk lehzuala training/coaching pek tura ruahman a ni.

o Documentation, data, grading system, feedback pekna mumal tak nen kalpui tur a ni dawn a. Hemi atan hian Consultancy firm (Angels Business Promoter) nen tangkawpin EMS website siam a ni. Website hi hman nuam leh awlsam, a pawimawh chin fun kim bawk tura siam a ni.

o EMS website hmanga training dil dan:

i) EMS website https:/ems.mizoram.gov.in ah lutin, ‘Training Dilna Form’ tih hnuaiah mahni khua/veng, District hming leh RD Block chhutluh tur a ni.

ii) Biakrawn ber tur hming leh biakpawhna tur number dah tel bawk tur a ni.

iii) Training duhna sports discipline chhutluh leh tur a ni a, pakhat aia tam dil duh tan ‘add discipline’ tih hmeh zel tur a ni.

iv) ‘Hriattur pawimawh’ tih uluk taka chhiar zawhah, ‘submit’ hmeh tur a ni.

v) Hrechiang duh tan phone no.: 8132098626-ah zawhchian theih reng a ni.

o EMS hnuaia coaching/training petu turte chu State-level Sports Association-te nen tangkawpin thlan an ni.

o EMS timeline:

i) January 14, 2025: Pu Lalduhoma, Chief Minister in EMS a tlangzarh a, a taka EMS kalpui turin hma lak chhunzawm nghal a ni.

ii) December 1, 2025: Pu K Sapdanga, Home Minister hovin Conference Hall, Ramhlun Indoor Stadium-ah EMS Kick-off hun hman a ni.

iii) December 1 – 5, 2025: Ramhlun Indoor Stadium-ah EMS ‘Trainers Training’ buatsaih a ni.

iv) December 15 – 18, 2025: JICA India nen tangkawpin Hawla Indoor Stadium-ah ‘Coach Development Programme’ buatsaih a ni. Nippon Sports Science University, Tokyo atangin sports coaching a mithiam bik Professor Masumitsu Ito leh a team te’n Mizo coach 40 te zirtirna an pe.

v) February 26, 2026: EMS website peihfel a ni ta a. Online-a coach dil theih tawhin, EMS chu a tak taka kalpui theih a lo ni ta a ni.

o Empowering Mizoram Sports kaihhnawiha hmalakna dangte:

Grassroots Sports Development Programme (GSDP):

EMS hmalakna pakhatah January ni 13, 2025 khan Mizoram State Sports Council (MSSC) leh Samagra Shiksha Mizoram (SSM) te chuan Memorandum of Understanding (MoU) an ziak a. He MoU hmang hian Grassroots Sports Development Programme (GSDP) chu August 21, 2025 atang khan Mizoram hmun hrang hrangah hlawhtling takin kalpui mek a ni.

GSDP in a tum ber chu sawrkar school-a sports training mumal taka kalpui a ni a. Mizorama centre 46 ah, kum 6 atanga kum 14 inkar zirlai 1000 chuangte chu sports discipline thlan bikah zirtirna pek niin, theihna nei sangte tan EMS nen tangkawpa kawng inhawng zel tura ruahmanna siam a ni.

Tuipuiral Games leh Tuichangral Games-a sports discipline telh belh:

Empowering Mizoram Sports kalpui dan tur enchhin nan Tuipuiral leh Tuichangral Annual Sports Meet-ah te Olympic-a tel ve theihna tur hnaivai nia ngaih sports discipline telh thar a ni a, a hmuna training pek chilh a ni bawk.

i) Tuipuiral Games 2025 ah Boxing leh Archery.

ii) Tuichangral Games 2025 ah kum 8-16 inkar tan Boxing, Wrestling leh Weightlifting.

iii) Tuipuiral Games 2026-ah kum 16 hnuailam tan Boxing, Archery leh Weightlifting.

iv) Tuichangral Tournament 2026, April thlaa Khawhai-a neih turah kum 8-16 inkar tan Boxing, Wrestling leh Weightlifting telh a ni ang.

‘Best Upcoming State for Promoting Sports and Physical Education’ award:

Confederation of Sports and Recreation Industry (CSRI) buatsaihin January 15, 2026 khan India International Centre, New Delhi-ah "National Ranking Awards Ceremony” neih a ni a. He hunah hian Mizoramin awmze nei leh hmathlir thui tak neia sports a kalpui chhoh mek chu chawimawi niin, sports chawikan leh tihhmasawn kawnga hma la tha, “Best Upcoming State Promoting Sports and Physical Education” lawmman a dawng a ni.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]