Aizawl | Jan 19, 2026: Zoram Thar chuan vawiin khan Aizawl Press club-ah thuthar thehdarhtute kawmin, kum 2026 hi Milem biakna ‘party politics’ bansan rûnpui kum-ah puang.
.jpg)
Zoram Thar Zofate Lairelna Inpui chuan Kum Puan 2026 atan 'Milem biakna ‘party politics’ bansan rûnpui kum,' ah an puan thu vawiin khan an sawi a, an hruaitu Rev Dr Zaichhawna Hlawndo leh Ziaktu Lian Lalruatfeli Hlawndo te'n thuthar thehdarhtute hi an hmachawn a ni.
Press Note:
Zoram Thar Zofate Lairelna Inpui Kum Puan 2026 : Milem biakna ‘party politics’ bansan rûnpui kum
Zoram Thar Zofate Lairelna Inpui chuan kum 2026 hi Zofaten Milem Biakna Politics kalphung bansan runpui kumah kan puang a. Zofaten Kum 1946 aṭangin Milem biate awpbehna hnuaiah luh duhin milembiate tih danin party politics kan din ṭan a. Zofaten pi leh pute hun aṭanga rorelna felfai tak - Lal leh Upate hmanga khawtlang rorelna duh lovin kan indo ṭan a. Party ding hmasa ber Mizo Union chhungkua ah pawh indona nasa tak piangin a phel leh nghal a. Kum 80 chhungin political party 23 chuang a ding tawh a ni.
Chu party politics chuan Zofate zingah indona nasa tak a siam a, remlohna hian tawpintai a nei ta lo a, Ṭhat theih miah lohna bawm chhungah kan lut ta a ni. Party politics chuan Zonun zemawi a ṭhiat a, a pawngsual a ni ber mai. Chu party politics chu Zofate Kristianna leh Bible zirtirna nen a in kalh tlat avangin kan Kristianna leh party politics chu a indo a, lohtheihlovin keimahni leh keimahni kan indo ta a ni. He milembiate tih dana rorelna hian kan thlarau, rilru leh taksa a eichhia a, duhamna milem biaknain kan ram chu a luahkhat ta a ni. He milem biakna hmanga rorelna tawp hun a thleng tawh dawn a. Pathian chhungte zingah rorelna ṭan a hun tawh a, Zofate kan sal tanna aṭangin Lalpan min hruai chhuak tawh dawn tih kan ring.
Party Sawrkar nilo, Pathian Lal Ram Sawrkâr (PLRS) ‘God's Kingdom Government’ a ding thuai tawh dawn tih hi kan beisei a ni. Zoram Thar Zofate Lairelna Inpui chuan Zofate - Zoram India, Zoram Burma leh Zoram Bangladesh a cheng zawng zawngte Lalpa tana inti thianghlim a, milembiate tihdana rorelna siam leh kalpui bansan vek turin kan ngenin kan sawm a ni. Kan hruaitu Rev. Dr. Zaichhawna Hlawndo-in a lo dawn tawh angin kum 2028 Inthlan lo awm turah hian party sawrkar ni tawh lovin Lalpa Chhiahhlawh Intelkhawmte hmangin Pathian Lal Ram Sawrkar a pian ngei tawh kan ringin kan beisei a. Lalpa chhiahhlawh hna thawk tura kohna dawngte lo pen chhuak tawh turin kan sawm a, mipuite pawh party sawrkar siam tum tawh lova, Pathian Lal Ram Sawrkar din tura inpuahchah turin kan in sawm a ni.
Zofate hi Pathian hnam thlan, hun hnuhnunga khawvel tana rahchhuak tur hnam kha kan ni a. Hnam bo Israel Zosefa chhungte = Zo hnahthlak Zofate vek kan ni. Pathianin kan chenna tura min pêk hi Zoram = Zosefa tu leh fate ram thar a ni a. Zosefa chhungte ram Ephraim tlang ram thar tura Lalpa ruat lawk ram a ni. Pathianin min pek ram Zoram chu a nihna tur angin a piang hnai tawh a, hnam thianghlimte din thar a, tlang thianghlim chu tundin a hnaih tawh avangin, Zofate kan in tih thianghlim a hun ta a ni. Kum 2026 hi party politics bansan a PLRS tana inbuatsaih rûnpui kum a nih tawh avangin Press Conference neiin Zofate zawng zawng hriat turin kan tlangau ta a ni.
Tin, Zofate hnama min din thar lehna turin hnam Biak Inpui - Zofate Pathian Biak Inpui chu Thenzawlah nikum 2025 May thla aṭangin sak ṭan a ni a. Tunah hian Biak Inpui ban 24 phun zawh a ni tawh. Zofate Pathian Biak Inpui sakna khua Thenzawl Kohhran hrang hrangte hnenah Hnam Hnatlang Thawhlawm thawh tura kan sawmna chhangin kohhrang panga -
(1) Hermon Presbyterian Kohhran
(2) Baptist Church Mizoram, Bethlehem
(3) Isua Krista Kohhran Lungrang
(4) Isua Krista Kohhran, Salem leh
(5) Isua Krista Kohhran, Thenzawl Venglai ten an thawh tawh a. Kohhran dangte pawhin kum tharah hian thawh an tum thu kan dawng. Kum 2026 February thla aṭangin hnam hnatlang thawhlawm lakkhawm ṭan leh a ni dawn a. Mizoram khawpui Aizawl aṭangin lakkhawm ṭan a ni ang. Veng tinah, in tinah kalin hnam hnatlang thawhlawm thawh turin kan insawm dawn a. A neitute vek kan ni tih hria a tlemlua emaw tamlua awm lova thawh vek turin kan in sawm a ni. Kohhran pawl hrang hrangte hnenah pawh hnam hnatlang thawhlawm thawh tura ngenna leh sawmna pek vek tum a ni bawk.
Kumin atana hmachhawp zingah, Zofate Inpumkhatna Inkhawmpui (Zofate Unity Conference) chu September 18-19 hian USA, Indianapolis ah Zoram Thar Branch USA leh Zoram Thar Zofate Lairelna Inpui buatsaihin neih tur a ni a. USA a Zofate kohhran 200 chuang aṭangin Inkhawmpui palai pathum tal in ruat a ni ang. He Inkhawmpuiah hian Zoram Thar Zofate Lairelna Inpui hruaitu Rev. Dr. Zaichhawna Hlawndo leh Ziaktu Lian Nl. Lalruatfeli Hlawndo an kal ang.
Zoram Thar Zofate Lairelna Inpui chuan Zofate hnama harh a, inpumkhatna atana pen chhuak a, Pathian Lal Ram Sawrkar (PLRS) din turin Zofate zawng zawng kan sawm tak meuh meuh a ni.
Lalpa chhiahlawh,
LALRUATFELI HLAWNDO
Ziaktu Lian
Zoram Thar, Zofate Lairelna Inpui
Zoram Thar Zawlbûk
Zodin Square, Aizawl, Mizoram.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: