YMA kum puan 'ruihhlo do' chungchangah inrawn khawm

Aizawl | Jan 23, 2026: YMA Kumpuan, 'RUIHHLO DO' chungchanga hmalak dan turah Central YMA buatsaihin zanin khan Dawrpui Multipurpose Centre-ah Aizawl Khawpui chhunga Branch OB te nen Inrawnkhawmna hun hmang.

Central YMA President R Lalngheta chuan inrawnkhawmna hun hi a kaihruai a, Central YMA General Secretary Prof Malsawmliana'n kal khawmte inhmelhriattir na leh thupuan tur awm te a puang a. CEC member Vanlalsawma'n hunserh a hman hnuah Central YMA Vice President Prof Lalnuntluanga'n thupui sawi hawnna hun a hmang a ni.

Thupui sawi hawngtu Prof. Lalnuntluanga chuan, "Ruihhlo avanga kan ṭhalai tam t ak nunna chân ta te leh tuna ruihhlo in a bawhbuai mek te avang te, kan ṭhalai ruihhlo la ti velo te ven himna atan ruihhlo do hi YMA te chuan kan tih makmawh kan kova tla alo ni ta" a ti.

He inrawnkhawmna hun ah hian Branch YMA OB kalkhawmte atangin rawtna hrang hrang ngaihthlak a ni a, hetiang hian hmalakna tur khaikhawm a ni.

1. Ruihhlo Dona atan Aizawl khawpui chhunga Branch 111 te Zone hrang hrang 10 ah inṭhen nise.

2. Zone huamchhunga Branch te aṭangin Zone CADS Member tur mi 3 theuh ruatchhuah tur ani.

3. Zone ṭhenfel / siamfel leh Zone hruaitu ruat chu Central YMA hruaituten ruahmanna an siam ang.

4. Zone hrang hrang hmalak tan hun chu Central YMA in ruahmanna a siam ang.

Central YMA President R Lalngheta chuan ruihhlo do kawngah Branch YMA te pheikhai rual taka kal a tul thu te, fimkhur tak leh huai taka kal a ngaih dawn thu te; ruihhlo a sumdawngte pawh pal an ngaih chuan pal a tul thu a sawi bawk.

He hunah hian kum 2025 YMA Inkhawmpui Lian Rorel zinga pakhat "YMA NIHPHUNG INHRILH THARNA HUN HMAN ṬHIN NISE" tih bawhzui nan YMA nihphung in hrilh tharna hun hman a ni a, Central YMA Treasurer Er H Duhkima'n he hun hi a hmang bawk.

Hun hmangtu Duhkima chuan, "YMA chu Pathianin Mizo hnam phuarkhawm tur leh Kristianna leh Zonun zemawi vawng him tlat tura min pek a nih avangin Mizoram leh hnam hmangaihtute kan ni a, YMA tello chuan Mizoram dinhmun tur hi ngaihtuah ngam pawh anilo hial awm e." a ti.

He inrawnkhawmna ah hian Branch 111 atanga aiawh kalkhawm te, CEC Memberte leh Central YMA OB te an tel a, Sawmtea Chhangte chuan kalkhawm te zaiin a awi bawk.