NIELIT-ah Digital India leh Artificial Intelligence (AI) in India a nghawng dan chungchang zirhona buatsaih

Aizawl | Jan 23, 2025: Information & Communication Technology (ICT) Department, Government of Mizoram leh NIELIT Aizawl - Deemed to be University (under Distinct Category), Zuangtui, Aizawl te tangdun chuan vawiin khan NIELIT Aizawl, Industrial Estate, Zuangtui ah Digital India leh Artificial Intelligence (AI) in India a nghawng dan chungchanga ni khat awh zirhona, ‘IndiaAI Digital India Workshop’ an buatsaih a, ICT Secretary Dr YLN Reddy chuan khuallian niin a hmanpui.

He workshop hi zirlaite leh zirtirtute tana ruahman niin, mi thahnem tak an tel a ni.

He workshop hi Ministry of Electronics and Information Technology (MeitY), Govt. of India in, ni 19-20 February, 2026-a New Delhi-a a buatsaih tur, ‘IndiaAI Impact Summit 2026’, lo awm tur atana lo inhmakhuana leh, summit buatsaih turah India ram chhunga thalaite leh Zirna In tam zawk ten an lo hriat a, Digital India leh AI huangah an tel ve theihna tur atana buatsaih a ni.

Sawrkar laipui Ministry MeitY hian AI-in danglamna a thlen theih dan leh chumi chu hmang tangkai a thlirtu mai ni lova, tel ve thei tura thalaite leh Zirna In te, hnufum bik lo turin leh, midang ruala kal a, hmahruaitu ni thei tura zirtirna pek chu a tum a ni.

Workshop hawnna inkhawmah NIELIT Aizawl Director Dr T Gunendra Singh chuan inlawmna thu sawiin, NIELIT Aizawl chu AI ah a mikhual loh thu leh IndiaAI laboratory changtlung tak neiin, AI lama hmalakna hi an lo kalpui mek thu leh, India ram pum a NIELIT Centre hrang hrangah AI Laboratory hi din vek a nih thu a sawi bawk.

ICT Secretary Dr YLN Reddy chuan, India chu khawvel huap a AI lama hmahruaitu ni thei tura a hmalakna ah February thla a ‘IndiaAI Impact Summit 2026’ New Delhi-a neih tur atana inbuatsaihna kal zelah, he workshop hian India ram hmathlir te, a thiltum te leh AI atana hmalam hun atan thalaite tihchaktu bakah, zirnaah AI a tel ve zel theihna tur te, sawrkar inrelbawlna kawngah pawh hun lo kal zel turah kan inpeih theihna tura hmathlir a nih thu a sawi.

He workshop hawnnaah hian NIELIT Aizawl zirlaite leh officer te leh thawktute bakah, Mizoram ICT Department atangin mi pawimawh tak tak te an tel a ni.

Workshop hi Session hnihah then niin, Session 1 ah IndiaAI Mission leh, Session 2 ah Digital India initiatives – DigiLocker, UMANG, myScheme leh a dangte thupui hmangin zirhona hun hman a ni a. Chawhnu lamah AI Quiz buatsaih niin, lawmman sem nghal a ni.