Zo Career Solutions-in pawl 12 science zirlaite tan Pre NEET / SMATEE exam buatsaih

Aizawl | Jan 24, 2026: National Eligibility Entrance Test(NEET) leh State Medical and Technical Entrance Examination (SMATEE) 2026 lo awm tur atana Zirlaite'n inbuatsaih lawk dan an lo thiam theihna atan leh he exam kalphung an lo hmelhriat chian theihna atana ZoCareer Solutions, Chanmari te'n an buatsaih PRE NEET/SMATEE 2026 chu Vawiin 24th January 2026 khan Govt. Hrangbana College-ah neih a ni.

He Exam hi Mizoram chhunga Pawl 12 Science Subject zir mekte tana a thlawna buatsaih a ni a. Darkar 3 chhung Exam hi neih niin, Exam Question hi NEET leh SMATEE kalphung ang chiaha siam a ni bawk. OMR Answer Sheet hmangin zawhnate hi chhan a ni.

ZoCareer Solutions Director Pu RK Hnuna chuan zirlaite kalkhawmte hnenah Pre Neet/Smatee chu tluang takin kum 3 lai buatsaih tawh a nih thu sawiin, he Exam hian Mizoram a Science zir mekte leh la zir zel turte ah inelna thianghlim tak a awm theihna atante, State dangte el pha khawpa Medical leh Technical entrance Exam-ah Mizoram zirlaite'n hma kan sawn zel theihna atana buatsaih a nih thu a sawi.

Mizoram hmun hrang hrang atangin Zirlai Mi 710 te chuan He Pre NEET/SMATEE hi an exam a. He Pre NEET/SMATEE a titha 10 te chu ZoCareer Solutions hian lawmman tha tak a buatsaih sak dawn a ni.