Aizawl | Jan 28, 2026: Tanhril khawtlangin tualthattu hi RL Peka chauh a nih an ring lo!
Tanhril nula thihna chungchangah tualthattu nia puh RL Peka (62) chu amah maia ti niin khawtlangin an ngai thei lo.
Nizan / zanin khan Tanhril ṭhalai lungawi lo hi an pungkhawm a, an in rel lai pawh a kang niin thu dawn a ni.
Tanhril khua leilung rap tawh lo turin RL Peka te chhungkua an chhuak dawn! Zanin la la hian, RL Peka nupui leh a fate hian Tanhril leilung rap leh ngai tawh lo turin an chhuahsan dawn niin thu dawn a ni.
Tin, thudawnnain a tarlan danin, an khaw nula hrisel ṭha lai, ṭhalai tha chak lai zawk hi patling kum upa lamin amah chauha a thah theih hi an ring thei lova, a thurualpui hi zawng chhuak turin thuneitute an phut bawk a ni.
Nimin khan Mizoram Police chuan thuchhuah siamin, "Marina Lalchhanchhuahi tualthihna chungchanga hnuchhuina kawng hrang hranga atanga lo lang chu Pu RL Peka, 62 years (L) s/o RL Dama (L), Tanhril Vengpui, Aizawl hi pawikhawihtu leh mawhphurtu ber niin hmuhchhuah a ni," an ti a. Hei hi khawtlang mipui chuan pawm har an ti a ni.
Tarlan tawh angin, Nikum December 13 tlai dar 5:25-a MZU campus-a thia hmuh Marina Lalchhanchhuahi (26) d/o Joseph Malsawma (L), Tanhril thih dan chu police-in an chhui zui a; mi kuttuar ngei nia hriat a ni a, a thattu nia police-in an chhui chhuah chu RL Peka (62) s/o RL Dama (L), Tanhril Vengpui a ni.
Police thuchhuah chuan, "Marina Lalchhanchhuahi tualthihna chungchanga hnuchhuina kawng hrang hranga atanga lo lang chu Pu RL Peka, 62 years (L) s/o RL Dama (L), Tanhril Vengpui, Aizawl hi pawikhawihtu leh mawhphurtu ber niin hmuh chhuah a ni," a ti.
RL Peka hi January 17, 2026 khan an in atangin a zuang thla a, Ebenezer Hospital panpui ni mah se, January 17 vek khan a hliam tuar loin a thi a ni.
MIZORAM POLICE PRESS STATEMENT
No.F.14018/1/25-PR/19
Dated: Aizawl, the 27th January, 2026
Zonuam Outpost-ah ni 03.12.2025, 08:30AM ah Pu John Sanghnuna, Tanhril Vengpui hnen atangin a tunu Marina Lalchhanchhuahi (26) d/o Joseph Malsawma (L), Tanhril Vengpui, Aizawl chu ni 01.12.2025 dar 11:30 AM ah an chenna in atanga mamawh lam tura a chhuak chu ni 03.12.2025 thlengin a la haw loh thu report dawn a ni a, chumi avangin hma laksak turin a ngen a.
Zonuam Police Outpost General Diary-ah mibo report ziahluh niin theihtawpa zawnpui nghal a ni.
Mibo ni a report Marina Lalchhanchhuahi (26) chu ni 04.12.2025 – 12.12.2025 chhung hian Police leh Tanhril khawtlangte nen tangkawpin theihtawp chhuaha zawn a ni a. Hetia mibo zawn hna kalpui a nihlai hian Marina Lalchhanchhuahi Mobile Phone SIM No.6909104207/8259895917 chu a Call Detail Report (CDR) te lain uluk taka zirchian a ni a. CDR atanga a biak thinte chu thuzawhfiah an ni a. CDR atanga a lan danin Marina Lalchhanchhuahi a bo ni hian a biak mi pakhat chu uluk taka thu zawhfiah a ni a. Nimahsela, Marina bo chungchangah hian evidence tha a awm loh avangin chhuah leh a ni.
Marina Lalchhanchhuahi zawn hna kalpui a nih mek lain, Ni 13.12.2025 05:25 PM-ah Pu RS Lalrinsanga, Tanhril Branch YMA hnen atangin MZU Football Playground bulah hmeichhe ruang ni awmtak an hmuh thu leh he ruang an hmuh hi mibo zawn mek Marina Lalchhanchhuahi a nih ngei rin a nih thu Zonuam Police Outpost-ah dawn a ni a. Chanchin hriat a nih veleh ruang hmuhna hmun chu Police team-in pan nghalin, Forensic team te pawh hrilh hriat nghal a ni. Ruang awmna hi MZU football playground atanga 50 metres bawr velah niin a lo tawih chhe tan tawh a. Inquest uluk taka neih niin, Forensic expert ten uluk takin ruang endik hna an thawk bawk a ni. Pi Vanlalrovi, Tanhril Vengpui chuan ruang chhar chu a fanu bo mek Marina Lalchhanchhuahi a nih ngei thu a finfiah bawk a ni. Police inquest atanga a lan danin, ruang chhar chu a chhiat tawh avangin leh pawn lam lang thei ah hliam hnuhma engmah a hmuh theih loh avangin a thih chhan diktak hriat a ni lova.
Hetiang a nih avang hian ruang chu Civil Hospital, Aizawl ah ni 14.12.2025 khan a thih chhan chiang taka finfiah a nih theih nan Post Mortem Examination tura thawn a ni. Hemi chungchangah hian Vaivakawn Police Station-ah
Unnatural Death (UD) case (Vaivakawn PS UD C/No.26/25 Dt.14.12.2025) register niin, uluk taka a thih chhan chhui zui a ni.
Marina Lalchhanchhuahi thihna chungchanga enquiry neih a nih lai hian, mi engemawzat thu zawhfiah an ni a. Enquiry atanga alan danin, Marina Lalchhanchhuahi hian nau a pai mek thu hriat a ni a, amaherawhchu a fapaina erawh hriat a ni lo. Marina Lalchhanchhuahi hian pasal neih a tum thu leh a pasal tur chu pa upa lam, Pensioner a nih thute thuhretu hnen atangin hriat a ni a. Tin, Marina-i’n he a pasal tura a sawi hi Tanhril veng khua leh tui diktak a nih loh thu pawh hriat a ni.
Marina Lalchhanchhuahi thihna chungchanga enquiry-ah rinhlelh pakhat chu Zonuam Police Outpost-ah ni 16.12.2025 khan koh a ni a. Hetih mek lai hian Pu RL Peka chu a chenna In atanga a zuan thlak thu leh Ebenezer Hospital panpui a nih thu dawn a ni a. Rang takin Ebenezer Hospital, Chawnpui pan nghal a ni a, FSL team te nen RL Peka motor B/R No. MZ-01S-4967 (TATA Nexon) chu rinhlelh thilah hriatpuitute hmuh laiin uluk taka motor chhung chu enfiah a ni a, motor chhung hmun hrang hrangah thisen kai ni ngei a rin chu hmuh a ni a. Hnuchhuina kalzel ah FSL expert team te endik atan seized a ni ta a ni. Tin, RL Peka chu Marina Lalchhanchhuahi thihna chungchanga inhnamhnawih ngei ni a rin a nih avangin an chenna In chu ‘Ground of belief’ siamin enfiah a ni. RL Peka phone hman lai Redmi 8A chu an chenna In atangin seized a ni a, Forensic Science & Laboratory, Aizawl ah enfiah tura thawn a ni bawk.
Police Enquiry-ah hian Marina-i mobile phone SIM Number 6909104207 Call Detail Report (CDR) chu zirchian that leh niin, Marina-i be hnuhnung bertu chu SIM No.7627949735 niin a biak hun hi Dt. 01.12.2025 dar 11:40 Am ani a, he SIM No. 7627949735 neitu hi Pu RL Peka, Tanhril Vengpui a In sa mek leh Kolasib atanga lo pem mi in luah a khawsa mek a ni tih hriat a ni. Hmun hrang hranga CCTV/surveillance camera awm ang angte enfiah niin, hetah hian TATA Nexon var (B/R No. MZ-01S-4967) chu Marina-i ruangchharna MZU campus, Tanhril ah ni 01.12.2025 khan a tlanlut ngei a ni tih finfiah a ni a, he motor hi MZU campus ah darkar 2 leh 18 minutes chhung a awm tih hriat a ni bawk.
Marina-i thihna chungchangah hian rinhlelh kai ber a nih avangin uluk taka zirchian zui zel a ni a. He lirthei B/R No. MZ-01S-4967 (TATA Nexon) hi E- challan apps atanga a lan danin, Lalduhsaka Lelhchhun, Maubawk hminga registered niin, ni 21.10.2023 khan 3rd ownership nei mektu Joseph Lalremmawia s/o RL Peka, Kolasib hnenah Rs.5,80,000/- (nuai nga singriat) a hralh chhawn a ni.
Marina Lalchhanchhuahi thihna chungchanga hnuchhuina kal zelah, ruang chharna hmun atang hian, Marina Lalchhanchhuahi nghawngruh ni ngei a rin leh a Ha 8 leh thisen ni ngei a rinte chu hmuhchhuah ani a. Tichuan, a chunga tarlan motor chhunga thisen ni ngei a rin leh a ruang chharna hmuna evidence lakkhawmte chu Forensic Science & Laboratory, Aizawl ah endik turin thawn nghal a ni.
Hriatpuitu leh evidence chi hrang hrang lakkhawm endikna atanga a lan danin, Marina Lalchhanchhuahi thihna chungchangah hian sualna kawnga pawikhawihna (criminal offence) awm ngeia hriat a nih avangin VaivakawnPolice Station-ah tualthah thubuai ziahluh (Vaivakawn PS C/No.08/26 Dt.17.01.2026 U/S 103(1) BNS) a ni ta a ni.
Hnuchhuina kalzelah evidence chi hrang hrang Forensic Science & Laboratory, Aizawl-a thawnte chu ni 23.01.2026 hian evidence examination report dawn a ni a. Examination report atanga a lan danin, RL Peka motor chhunga thisen kai te chu Marina l Lalchhanchhuahi thisen ngei a nih thu leh ruang chharna hmuna ha hmuhte pawh Marina Lalchhanchhuahi ha ngei a nih thu finfiah a ni bawk. Tin, Pu RL Peka mobile phone Redmi 8A examination report chu Forensic Science & Laboratory, Aizawl atangin dawn a ni bawk a.
Report atanga a lan danin, Pu RL Peka hian a phone Redmi 8A ah hian Marina Lalchhanchhuahi hming leh contact number - 8259895917 chu ‘TNHRL MAR’ tiin a saved tih hmuhchhuah a ni a. Tin, Dt.12.11.2025 khan Pu RL Peka phone ah hian ‘Pregnancy Test Kit’ thlalak hmuh chhuah a ni bawk a ni.
Marina Lalchhanchhuahi tualthihna chungchanga hnuchhuina kawng hrang hranga atanga lo lang chu Pu RL Peka, 62 years (L) s/o RL Dama (L), Tanhril Vengpui, Aizawl hi pawikhawihtu leh mawhphurtu ber niin hmuhchhuah a ni a.
He hnuchuinaah hian Tanhril YMA leh FSL team ten Police te theihtawp chhuah a min puihna avangin an chungah SP Aizawl District leh a staff te chuan lawmthu an sawi a ni.
ISSUED BY MIZORAM POLICE MEDIA CELL, PHQ
Copy to:
1) Director, I&PR for kind information and to take necessary action for wide publicity to Electronics and Print Media please.
2) Director / News Editor - LPS Vision/ Zonet Vision/ Doordarshan Kendra/ All India Radio (AIR), Aizawl.
3) 4) President, MJA for kind information and necessary action please.
SO to DGP (M) for kind information of DGP (M)
(H RAMTHLENGLIANA) IPS
Inspector General of Police (Hqrs) & Chief Public Relation Officer
Mizoram Police Media Cell
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: