AMC-in MLA Hostel thlanga thei zuarte sawn dawn, dodal zawng leh hnathawh tibuai zawnga awmlo turin kan inbeisei ~ AMC

Aizawl | Jan 28, 2026: Aizawl Municipal Corporation (AMC) chuan MLA Hostel, Khatla building thlang, Revenue officer kawta thei zuarte chu a tulna avangin a sawn dawn a, dodal zawng leh hnathawh tibuai zawnga awmlo turin a beisei.

MLA Hostel, Khatla building sak that a tul avang leh building hlui thiah a nih tak avangin, a sakna hmun tur lei laih a ngai a, chuvangin, helai hmuna thut hi mihring tan a him loh avangin State Sorkar leh Aizawl Municipal Corporation (AMC) chuan MLA Hostel thlang kawngpui sira thei zuar mi 11 te chu loh theih lohin AMC Multi-Complex Tuikual South building chhungah a sawn chhuah a lo tul ta a ni.

"Aizawl khawpui hmasawnna tura State Sorkar leh AMC hmalaknate min thlawp zel turin kan sawm a. Chutihrualin a dodal zawng leh hnathawh tibuai zawnga awmlo turin kan inbeisei nghal bawk a, thu awih taka insawn chhuak turin thei zuar te hi Aizawl Municipal Corporation chuan a duh hle a ni," tiin AMC chuan vawiin khan thuchhuah an siam.

AMC thuchhuahin a tarlan danin, Helai hmun hi parking area a ni thin a, amaherawhchu thei zuar te hma ngaiin thei zawrhna hmun atan hman turin December ni 3, 2019-ah AMC leh Thei zuar Association ten agreement ziah a ni a, May ni 19, 2022-ah agreement ziak lehin, June ni 30, 2023 thleng thut phalsak an ni a, a hnuzela an thut dan tur chu AMC in ruahmanna a siam ang zela agreement siam a ni.

Aizawl Municipal Corporation (AMC) in vawi tam tak a ngaihtuah hnuah parking hmun atana ruahman thin chu titawpin, September ni 12, 2024 khan Street Vending Zone atan a puan a ni. Tun thleng hian la kalpui zelin vendor 11 an thu mek bawk.

Helai hmuna vendors te sawn tura tihna lehkha hi Under Secretary (GA), Mizoram Legislative Assembly hnen atangin September ni 6, 2024 AMC chuan UD&PA Department kaltlangin a dawng a; a sawnna hmun dang remchang a awm loh thu UD&PA Department ah ni September ni 18, 2024 khan hriattir a ni.

AMC atanga hmalak dan tlangpui:

1. Ni 24 September, 2025 ah CE, PWD atanga Street Vendor thutna hmuna MLA Hostel building an sak dawn avanga Vendor te thutna hmun sawn tura ngenna lehkha dawn chu Aizawl Mayor, Executive Corporators leh PWD te nen sawiho a ni.

2. Ni 05.12.2025 a House Committee, Mizoram Legislative Assembly leh UD&PA Department, AMC leh PWD official ten MLA Hostel Khatla sak thar tur chungchang sawihona an neih hnuah helai hmuna thei zuarte sawn chhuak tura lehkha dawn bawhzuiin ni 06.1.2026 khan President, Thei Zuar Association hnenah hriattirna pek a ni a, January ni 16, 2026 ral hman ngeia AMC Multicomplex Tuikual South, 3rd Floor (Seat No 17 to 16 & 41) ah in sawn tura hriattirna pek an ni.

3. Thei Zuar tute an la in sawn loh avangin show cause notice ni January ni 23, 2026 ah pek an ni leh a.

4. Revenue Office bula thut an rawn dil na chu AMC Executive Council in ngaihtuah a, AMC in ruahmanna a lo siam tawh chu kaltlangpui turin a nemnghet. An dilna chu phalsak an nih loh thu leh AMC Multicomplex Tuikual South-a insawn chhuak tura hriattirna lehkha chu President, Theizuar Association, Khatla hnenah January ni 23, 2026 khan pek nawn leh a ni.

Aizawl khawpui hmasawnna tura State Sorkar leh AMC hmalaknate min thlawp zel turin kan sawm a. Chutihrualin a dodal zawng leh hnathawh tibuai zawnga awmlo turin kan inbeisei nghal bawk a, thu awih taka insawn chhuak turin thei zuar te hi Aizawl Municipal Corporation chuan a duh hle a ni.