Lungleiah Republic Day 2026 ropui takin lawm; "India Danpui chu khua leh tuite tana dikna, zalenna, intluk tlanna leh inunauna siamtu a ni,"

Lunglei | Jan 26, 2026: India ram mahnia ro inrel tura Ram Danpui (Constitution) hman ṭan ni, Republic Day vawi 77-na chu vawiin khan Lungleia C Ṭhuamluaia Mualah ropui taka lawm a ni a. Lunglei District Deputy Commissioner (Bawrhsap) Navneet Mann, IAS chu Khuallian a ni.

Zing ni chhuah rualin sawrkar pisa leh hmun pawimawh dangah te India Hnam Puanzar zar a ni a. Zing dar 9:30-ah C. Ṭhuamluaia Mualah Khuallianin Hnam Puanzar pawt pharhin, Hnam Puanzar chibai buktu parade contingent 22 te chibai buk a chhang let a, Republic Day thuchah a sawi nghal.

Khuallian Navneet Mann chuan Lunglei District mipuite chu Republic Day chibai bukin, India Ram Danpui chu khua leh tuite tana dikna, zalenna, intluk tlanna leh inunauna siamtu a nih thu te, ram inrelbawlna chu dan leh hrai hmanga inenkawlna chauh ni lovin, khua leh tui zawng zawng huap zo, khua leh tuite zahawmna vawn nunna leh rawngbawlsakna a nih thu te a sawi a. Sawrkar department-te, tlawmngai pawl, kohhran, media leh mipuite thawhpuina leh ṭawiawmnaah lawm thu sawiin, Lunglei hrisel, changkang, hmasawn leh mi tin lenna din tur leh kum 2047 atana Viksit Mizoram leh Viksit Bharat hmathlir a hlawhtlin theih nana theih tawp chhuah zel tur te, ram inpumkhatna leh ropuina vawng nung zel tur leh Lunglei District hmasawnna tur leh mipuite tana thawk zel tur te'n mipuite chu a sawm a ni.

Khuallian chuan sawrkar kum kal mek 2025 - 2026 chhunga Lunglei District-a sawrkar department-te kal tlanga hma sawnna hna thawh tlangpui tar langin, an hna thawh chhuanawm a tih thu a sawi a. AMRUT 2.0 hnuaia cheng nuai 997.78 senga Greater Lunglei Water Supply Scheme tihchangtlun hna thawh mekah Tlawng lui tuikhuah siam hna chu March 2026-a zawh hman beisei a nih thu leh Lungleiin tui hnianghnar a hmuhna tura SASCI hnuaia cheng vaibelchhe 55.70 senga hna thawh mek pawh 45% zawh a nih tawh thu te; Lunglei High Powered Committee hnuaiah hmasawnna hna chi hrang hrang 72 thawh a nih thu leh ṭhalaite leh infiamna tihhmasawn nan intihsiakna chi hrang hrang buatsaih nan suma ṭanpuina pek ṭhin a nih thu te; PWD hnuaiah km 50 chuang blacktop leh concrete road te, culvert leh kawng venna lungrem (protection wall) te siam a nih thu leh sawrkar quarters leh building eng emaw zat sak mek a nih thu te a sawi a. Mizoram Bana Kaih (Handholding) Scheme hnuaiah Lunglei DAMC kal tlangin kut hna thawktute thar chhuah sawhthing quintal 23,863 (cheng vaibelchhe 11.13 man hu) leisak a nih thu leh PM-KISAN chhawrtu kut hna thawktu 21,000 chuang an awm thu te; CM’s Innovative Challenge-a Horticulture-in pakhatna an nihpui, Banana Pseudostem Processing Unit (balhla kawr sawngbawlna) chu Mausenah bun tura hma lak ṭan mek a nih thu te; MGNREGS hnuaia Lunglei District-a job card 20,537 tan kum 2025–26 chhungin ni 91 inhlawhna siam a nih tawh thu te; AH & Vety Department hnuaiah ASF tuartu chhungkuate hnenah zangnadawmna cheng nuai 47.52 pek a nih thu te; Forest Department hnuaia kangmei ven kawnga hma laknaah Lunglei District-in State Level Fire Prevention Award 2025-ah lawmman pakhatna a dawn thu te a sawi.

Khuallian chuan Civil Hospital Lunglei leh Lunglei District-a PHC zawng zawng (6)-in India ram damdawi in ṭha nihna (NQAS certification) an hmuh thu te, Malaria vei 2024-a 8.4% aṭanga 2025-ah 5.4%-a a tlak hniam thu te leh nau piang 1,000 zelah nausen thi (Neonatal Mortality Rate) 7.4 leh naute kum 5 hnuai lam thi (Under-5 Mortality Rate) 10.8 chu SDG target aia a ṭhat zawk thu te; Lunglei chu faina lama hma lak ṭhat avanga Swachh Survekshan 2024–25-ah “Promising Swachh Shehar of Mizoram” atan thlan a nih thu te; District Treasury kal tlangin sawrkar office hrang hrangte’n January 2025 aṭangin sawrkar sum bawmah cheng vaibelchhe 109.25 an chhun luh tawh thu te a sawi.

Khuallian chuan District Bawrhsap kaihhruaina hnuaia Project BLOOM leh Healthy Lunglei Initiative hma laknate chu NITI Aayog-in India rama hma lakna ṭha bik a thlan chhuah, NITI Aayog Best Practices 2025 zinga a tel thu te, Healthy Lunglei hnuaiah Mizorama a hmasa ber atan Lunglei leh Lungsenah te awlsam taka hriselna dinhmun endikna khawlpui Health ATM bun a nih thu te; Project LEAP hnuaia vohbikte (Persons with Disabilities) tana hma laknaah UDID card 1,091 pek chhuah a nih bakah, Mizorama ni khata ṭanpuina hmanraw sem chhuah tam ber ni turin June ni 26, 2025 khan beneficiary 741 hnenah hriatna leh chet velna kawnga puitu hmanrua (assistive device) cheng nuai 51 man hu sem chhuah a nih thu te, Project LEAP vang hian Lunglei chuan India President hnen aṭangin December 2025 khan National Award for Empowerment of PwDs 2025 a dawn thu te; "I Kawtkaiah Sawrkar" tih hnuaiah department 51 te khaw hrang hrangah kal chilha mipui dawr theiha an inpho thu leh khaw 36 aṭangin mi 5,900 chuangin an chhawr ṭangkai thu te a sawi bawk.

Khuallian chuan agriculture leh a kaihhnawih department hrang hrang hnuaiah kut hna thawktute leh ran vulhtute tan sum fai leh hmanruaa ṭanpuina bakah, thiam thil kawhhmuh leh kaihhruaina chi hrang hrang pek a nih dan a tar lang a. Ei leh bar, tui, eng, inkal pawhna kawngpui, chaw ṭha, hriselna leh thianghlimna leh mipui himna tur leh mipui tana hamṭhatna hrang hrang chungchanga sawrkar department hrang hrangte hna thawh leh hlawhtlinnate a tar lang bawk.

Khuallianin thu a sawi zawh hian ceremonial parade lawmman bakah, chawimawina leh lawmman dang sem zui nghal a ni a. Ceremonial parade-ah hian armed contingent 5, unarmed contingent 6, school contingent 9 leh pipe band 2, a zavaiin contingent 22 an awm a. Pu Alex Hmingthanmawia, MPS (SDPO Tlabung) chu Parade Commander niin, Pu ZD Lalremruata (Sub-Inspector, Lunglei DEF) chu 2nd Parade Commander a ni a. Parade commander-te bakah, unarmed leh school contingent pathumna chin lawmman pek niin, band party 2, armed contingent 5 leh parade contingent dang 9 chu participation prize pek an ni bawk.

Republic Day 2026 ceremonial parade-a ti ṭha lawmman dawngtute chu:

1. Unarmed Contingent:

(1) Pakhatna - National Cadet Corps (NCC), Govt High School, Lunglei

(2) Pahnihna - NCC, Lunglei Government College

(3) Pathumna - NCC, Sacred Heart School, Lunglei

2. School Contingent:

(1) Pakhatna - 2nd Bn MAP English Medium School, Luangmual, Lunglei

(2) Pahnihna - Jawahar Navodaya Vidyalaya, Pukpui, Lunglei

(3) Pathumna - Sacred Heart School, Lunglei

Ceremonial parade lawmman bakah hian Republic Day 2026 pual hian a hnuaia mi ang hian chawimawina leh lawmman hrang hrang sem a ni bawk a. Khuallian, District Bawrhsap Pi Navneet Mann leh Lunglei South bialtu MLA Pu Lalramliana Papuia te chuan a dawngtute kutah an hlan hlawm a ni.

A. Project BLOOM 2025 Award:

[Lunglei Bawrhsap kaihhruaia District chhunga nu leh naupang hriselna atana hma laknaa thawk ṭha Anganwadi Centre leh damdawi in te]

1. Anganwadi Centre (AWC):

(1) Pakhatna - Tuisenchhuah Cluster (Bolia 1 AWC, Bolia 2 AWC & Tuisenchhuah AWC)

(2) Pahnihna - Belthei Cluster (Belthei 1 AWC & Belthei 2 AWC)

2. Damdawi in:

(1) Pakhatna - Phairuangkai Health & Wellness Centre - (82.8%)

(2) Pahnihna - Zawlpui Health & Wellness Centre (82%)

B. Republic Day 2026 puala Celebration Committee hriatpui tournament hrang hrang lawmmante:

1. 77th Republic Day 2026 Judo Championship Gold Medalist-te:

(1) Hmeichhia:

-25 kg: Christy Lalremmuani (Farm Veng)

25-30 kg: Lalramchuani (Sairep)

30-35 kg: Cindy Zosangpuii (Zotuitlang)

35-40 kg: Sophia Roluahpuii (Farm Veng)

40-45 kg: Vanlalngaihsaki (Farm Veng)

45-50 kg: Hadasi Vanneihmawii (Venglai)

+50 kg: Lalrinfeli (Electric Veng)

(2) Mipa:

-30 kg: H. Rochanhlua (Electric Veng)

30-35 kg: Vanlalrema (Sabualtlang)

35-40 kg: Lalrinmawia (Luangmual)

40-45 kg: Lalruatfela (Zobawk)

45-50 kg: Remlalpeka (Zobawk)

50-55 kg: Alex Lalrindika (Electric Veng)

55-60 kg: Lalchhanhima (Venglai)

+60 kg: Danny Rosangzuala (Eklavya Model Residential School)

2. Republic Day Tennis Tournament 2026:

(1) Sub-Junior:

Champion: Elkan C. Lalruatfela (Bazarveng)

Runner-Up: Joel Lalfelkima (Bazarveng)

(2) Junior:

Champion: C. Lalrawngbawla (Bazarveng)

Runner-Up: Ezra C. Lalrotluanga (Bazarveng)

(3) Men's Doubles:

Champion: Jimmy Lalrinchhana (Chanmari) & PT Zama (Salem Veng)

Runner-Up: Lallawmsanga (Bazarveng) & Jerome Lalmuankima (Venglai)

(4) Men's Singles:

Champion: Lalropuia (College Veng)

Runner-Up: Albert Lalrinpuia (College Veng)

Vawiina Lungleia Republic Day lawmnaah hian Lunglei South bialtu MLA Pu Lalramliana Papuia, Lunglei District Superintendent of Police Pu J. Lalmuankima, Lunglei Municipal Council (LMC) Chairman Pu Lalzuithanga leh councillor-te, sawrkar official-te, ex-servicemen-te, tlawmngai pawl, kohhran leh political party hruaitute, chanchinbu mite leh zirlai naupangte, lawmman dawngtute leh mipui ṭhahnem tak an tel a. Muala hun hman zawh veleh DC Bangla tualah sawm bikte tan "VIP's At Home" hun buatsaih niin, thingpui ruai kil ho a ni.

Kumin Republic Day lawmna pual hian Lunglei District Republic Day Celebration Committee chuan Bethel Centre (Chhumliamkawn, Sazaikawn), Baptist Church Orphanage (Ramzotlang, Serkawn), Chhawmdawlna In (Melte, Serkawn), Lunglei Home TNT (Theiriat), Civil Hospital Lunglei leh District Jail Lungleiah te ṭanpuina thilpek hlanin, thilpekah hian pawisa fai ₹ 18,000/- sem chhuah a ni.