Lunglei sum leng vak tibuaitu LMC hian harsatna an siamsak te rul let rawh se ~ Joseph Lalhimpuia

Aizawl | Jan 27, 2026: Ex MLA leh MYC Chairman hlui Joseph Lalhimpuia chuan thuchhuah siamin LMC chu an rorel dik loh avanga harsatna tawktute zangnadawmna pe ngei turin a phut.

Mahima chuan, "Christmas dawna sumdawnna che vel lian tak pakhat chu Secondhand thawmhnaw hi a ni a. Engkim zirchiang hmasa lo leh a nghawng tur ngaihtuah lova LMC hmalakna avangin 2025 Christmas dawnah khan secondhand zuar thinten Rs Vaibelchhe 3 dawn lai an hloh a ni," tiin a tarlang.

13 October 2025 a LMC thuchhuah angin Lunglawn Muala Krismas Bazar ah chauh inpho phal a ni a. Secondhand zuartuten an harsatna an sawia hmun ngai a inpho an dil chungin an kaltlang lui a. Harsatna tam tak a thleng zui ta a nih hi .

Lungleiah secondhand zuara inpho thin mi 150 bawr vel an awm a. Christmas dawnah hian mi pakhatin bale 10 chuang an hawng thin, bale 7 ang zela chhut sak pawhin (Bale khat ₹30000 anga chawh rualin) a tlem berah Rs Nuai 300 a tling daih. ₹3 Crore chuang che vel tur an dang bet a, chhungkaw eizawngtu leh Christmas vuak vet laia in tuak tum nu leh pa tam tak an tap zawih zawih a ni. Inhlawhna beiseia inbuatsaihte khan ba rulh dan an ngaihtuah a lo tul ta zawk a. Hei hi mipui sorkar inti ZPM LMC te rorel dan a ni a, mipui an sawr fu ta zel zawk a ni.

Lunglawn mualah inpho tur a an tihte hian atirah ₹3000 zel an deposit a, an tlem em avang leh dawrtu mipui an kal loh avangin ₹1500 an pe kir leh a. Mahni a dawr sak tur anih avangjn dawr pakhat saknan ₹ 8000 aia tlemlo sen angai a, mi 20 velin dawr sa in , mi 10 vel an inpho a. An thuawiha inpho leh an bungrua venhim sak tur a an intiam chungin thawmhnaw zan lama a an dah tam tak a bo a, thenkhat phei chuan cheng nuai chuang man an inhloh ani. Rilru beidawng leh mittui nen LMC lam an panin ngaihsak an hlawh lo a, FIR thehlut phawt ula tih chu an chhanna hriatchhun ani, FIR thehlut te pawh an awm a, chanchin thar erawh ala awm chuang lo.

Khawvel hmun dang leh abikin ringtute awmna ah chuan kan hun pawimawh christmas hi hlimawm thei ang berin chhungtinin kan hmang duh thin a, Kan Lungleiah erawh chuan hmun danga atih loh angin chhungkaw tam tak ṭahna leh manganna an siamsak ta zawk ani. Aizawl khawpuiah Christmas boruak nuam tak a awma mipuiin zalen taka Bazar vela an chet tlat theih nan lirthei tlan phal loh ni hial an siam laiin Lungleiah chuan lirtheia tlan thei te ngai pawimawh zawkin inpho an khap thung a ni!

Lunglei mai nilo, thingtlang atanga mamawh leh thawmhnaw lei tur a Lunglei lokalte an beidawng em em bawk a, Lunglei leh a chhehvel a sum lengvak tur nuai 300 chuang lai a tangkhang a, mi tamtak hmalam hun a tichhe bawk a ni. Chuvangin ZPM LMC hian heng a harsatna tawk sumdawngte harsatna hi chinfelsakin chhawmdawl dan ngaihtuah sak ngei turin ka phut tlat a. ATL road siam nan chauh a hman tura pass tawh pawh Aizawl khawpui chhung kawng siam nan an hman theih chuan an mahni rorel dikloh avanga tuarte chhawmdawl hi an thei ngei tur ani a, an mawhphurhna pawh ani. Tanpui dan a rang thei ang berin ngaihtuah sak rawh se. Lunglei khawpui enkawltu tu LMC lakah hian Lunglei khawp hi chhanchhuah a ngai ta mek a ni.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]