N Vanlaiphai tlangval thihnaa mawhphurhtu man tawh
Aizawl | Jan 27, 2026: Social Mediaa video darh, inkhawihna avanga nunna chan ta, N Vanlaiphai tlangval Richard Lalhmingliana (27) thihna chungchangah FIR thehlutin pawikhawihtu man a ni tawh niin thu dawn a ni.
Pawikhawihtu hi chanmari veng anga sawi hi Chanmari veng mi a nih loh thu Local Council-in hetiang hian thuchhuah siamin an tarlang, "kutthlaktu Isaka chu 'Chanmari Veng' mi nia hriat a nih thu tarlan a ni a. Hei hi Chanmari Local Council chuan a ngai thutak hle a, kutthlaktu (Isaka) hi Chanmari Veng, Aizawl mi a ni lo tih kan inhriattir e," an ti.
Thudawnnain a tarlan danin, a tlawhtu hi H Lalruatmawia (19) Chanmari West nia hriat a ni a, Isaac tih hming pu a ni lo lehzel niin thu dawn a ni bawk.
Thil thlen dan chu:
Richard Lalhmingliana (27) S/o Upa R. Lalawmpuia, N Vanlaiphai Damdawi Veng leh a thiante chuan an thian nu zin tur thlah pahin kar hmasa lamah khan Aizawl an rawn chhuk a.
Salem veng a Road Side Home Stay-ah thlengin, nizan khan intihhlimna hmun pakhat J-18 ah an kal a. Kawngpuia an kal lai hian Richard-a hian a thianpa Isaka chu a au a, an bul hnaiah chuan Isaka ve tho chuan amah rawn cho-ah ngaiin a rawn pana a tlawh thlu ta tawp mai a ni.
A bul hnaia awm ten an sawi danin Richard-a tlu hian kawngpui tualcharah a tukkhum a zuk sawh ri chawrh a ni an ti.
Richard-a thianpa Isaka’n a sawi danin, “a tho thei lova, biak chuan ‘um um’ ti chauhin min chhang a. Khatih lai khan kut thlaktuin a tlawh thlu lai cctv footage te hi kan la hmuh loh avangin a rui zawi ni maiah kan ngai a. Ka kuah tho a, chhak deuhah ka thut pui a. ‘Thianpa ka mu zal duh em mai’ a ti a. Kawng sirah chuan ka mut zal tir a. Rei tak ka thut pui a, kan riahna a hlat loh avangin room lamah ka kalsan a, dar 4 velah pawh a rawn haw loh avangin amah ngaihvenin ka chhuak leh a, a chauh em avangin taxi hmangin PUC bula private damdawi in Redeem kan pan pui ta a ni” a ti.
Isaka chuan a sawi zel danin “Redeem hospital doctor chuan a dinhmun a enin, Civil Hospital lamah a refer a, taxi in Civil Hospital kan panpui ta a, kawng lakah thiin a luak a, damdawi in thlenpui a nih hmain a chat thla ta mai a ni” a ti.
Richard chhungte hian FIR an thehlut a, kutthlaktu Police kutah a awm tawh niin thu dawn a ni.
With Input From: Vanneihthanga Vanchhawng
OFFICE OF THE CHANMARI LOCAL COUNCIL CHANMARI: AIZAWL MIZORAM
Chairman : R.Malsawma (9862825053)
Secretary : Samuel Lalruatdika (8257072506/6909100975)
No: C/2026/PR/2
PRESS RELEASE
Date: 27/01/2026
Tunlai Social Media-a thilthleng darh mekah, World Bank Road, Aizawl-a Richard Lalhmingliana (27) s/o Upa R Lalawmpuia, N. Vanlaiphai kutthlaktu Isaka chu 'Chanmari Veng' mi nia hriat a nih thu tarlan a ni a. Hei hi Chanmari Local Council chuan a ngai thutak hle a, kutthlaktu (Isaka) hi Chanmari Veng, Aizawl mi a ni lo tih kan inhriattir e.
Lalhmingliana boralna chunchanga thil thleng hi Chanmari Local Council chuan pawi a ti takzet a, chhiattawk chhungte a tawrhpui takzet a ni.
(R MALSAWMA)
Chairman, Local Council, Chanmari.
(SAMUEL LALRUATDIKA)
Secretary
Local Council, Chanmari.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Kan thu hriat te hi lunglai avan ṭhawng ṭhin tak em aw...
ReplyDeletePost a Comment
He post chungchanga i ngaihdan lo sawi ve rawh: