India rama Sawrkar damdawi in ṭha tehnaah Kulikawn Hospital tling thar

Aizawl | Jan 29, 2026: India rama sawrkar damdawi in ṭha bik tehna, National Quality Assurance Standards (NQAS)-ah Kulikawn Hospital a tling thar a, heti hian Mizoram chhunga Sub-District Hospital (SDH) pahnih awm zingah National-level NQAS certificate nei pakhat a awm ta a ni.

Dr. Lily Chhakchhuak, Mission Director, National Health Mission, Health & Family Welfare Department aṭanga thu kan dawn danin NQAS national-level endiknaa tling thar Kulikawn SDH hian a tehnaah 94.30% an hmu a ni. Sub-District Hospital leh District Hospital hian NQAS Certificate atan hian tehna (checklist) inang hman a ni.

Heti hian Mizoram chhunga Sawrkar damdawi in 60 te’n NQAS national-level certificate an nei mek a. Tunah hian sawrkar damdawi in 11 leh HWC Sub-Centre 45-in state-level NQAS certificate nei tawhin national-level-a endikna tur an dil mek a ni.

NQAS certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte’n an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te, khawtlang nena an thawhhonaah te endik an ni.

Mission Director, Dr. Lily Chhakchhuak chuan India rama damdawi in ṭha tehna a tling thei tura thawktu State Quality Assurance Unit te, District Quality Assurance Unit, Aizawl West-a Sr.CMO leh Staff zawng zawng te, Dr. James R.E. Mawia, Medical Superintendent, Kulikawn Hospital leh a thawhpui Nurse leh staff zawng zawng te, khawtlanga an thawhpui RKS Chairman leh member zawng zawng te chu fakawm a tiin lawmthu a sawi a. Heng NQAS certified sawrkar damdawi in kan neih tak te hi mipuite’n ṭangkai taka an hman a duhsak a, mipuite pawhin ṭangkai taka hmang turin a chah bawk.