Event buatsaih turten NOC lak hmasak a ngai tawh dawn

Aizawl | Jan 14, 2026: Events, exhibitions, conventions, trade fairs, melas etc., buatsaih tur reng rengin prescribed form siam sa hmangin No Objection Certificate (NOC) an lak hmasa ngei ngei a ngai tawh dawn.

Finance Commissioner, Government of Mizoramin November ni 7, 2025-a Office Memorandum a lo tihchhuah tawh bawhzuiin Commissioner of State Tax, Government of Mizoram chuan Mizoram chhunga event organizer (mimal/pawl/local body/sawrkar nena contract neite) zawm tur inkaihhruaina a hnuaia tarlan ang hian a siam;

1. Events, exhibitions, conventions, trade fairs, melas etc., buatsaih tur reng rengin prescribed form siam sa hmangin No Objection Certificate (NOC) an la hmasa ngei ngei tur a ni a. NOC dilna form hi Commissioner of State Tax office, MINECO ah emaw, Zonal Office atangin emaw lak chhuah theih a ni a. Department website zotax.nic.in atangin a download theih bawk ang.

2. Commissioner of State Tax office, MINECO atangin NOC approval lak tur a ni ang.

3. Organizer ten GST registration an la nei lo a nih chuan Section 24 of MGST Act, 2017 hnuaiah Casual Taxation Person angin an inziaklut ngei ngei tur a ni.

4. Event manager/organizer te address chu Aizawl district pawnlam ami a nih chuan an address awmna district-a Deputy commissioner of State Tax (DCST) hnenah NOC approval dilna an submit tur a ni a, DCST hian approval a lo pe ang.