DM&R-in Jan 15-a mock drill neih turah mipui chiai lo tura ngenin mipui hriathiamna, tawiawmna leh thawhpuina an ngen

Aizawl | Jan 14, 2025: Disaster Management and Rehabilitation (DM&R) Commissioner & Secretary Udit Prakash Rai, IAS chuan vawiin khan a pisa-ah thuthar thehdarhtute kawmin, lirnghing palh thei hre chunga (Scenario) chetlak dan enchhinna neih tur Mock drill chungchangah mipuite chiai lo turin a ngen a, Siren a rik hunah hlauthawng emaw, lo chiai lova, a tak ang thei bera kan lo inzirna zawk a ni tih hre turin mipui a ngen.

He Mock drill exercise hi kan zavaia tana tangkai leh tha a nih avangin mipui hriathiamna, tawiawmna leh thawhpuina an ngen bawk a ni.

Mizoram leh India Hmarchhak pum mai hi India ram a lirnghing nasa tak mai thlen theihna, Seismic zone 5 ah a awm reng thin a. Tuna Bureau of Indian Standard (BIS) in Seismic zonation a tihchhuah thar berah phei chuan Lirnghing rapthlak tak mai thlen theihna, fimkhur leh inpuahchah ngai tak mai Zone 6 ah India Hmarchhak pum hi a rawn dah thar leh nghal a. Tin, tunhma-in India Hmarchhak leh a bul hnaivai-ah lirnghing nasa tak tak a lo thleng tawh thin bawk a. Mizoram chhungah ngei pawh na vak lo chuan a nghing zauh zauh tawh a, kum 2020 phei kha chuan Mizoram khawchhak lamah vawi engngemawzah a rawn nghing a nih kha. Chuvangin sorkar mai nilovin mimal, chhungkua leh khawtlang pawh lirnghing na tak mai lo thleng palh thei lakah kan lo inpuahchah a ngai khawp a ni.

Sawrkar laipui-a National Disaster Management Authority (NDMA) leh Mizoram a State Disaster Management Authority (SDMA) leh District tina District Disaster Management Authority (DDMA) te chuan State Level Mock Exercise on Earthquake Disaster chu January ni 15, 2026 ah District tin khawpui-a hmun thlan bikahte a huaihawt dawn a. Hei hi Mizorama lir nasa taka rawn nghinga, chhiatna rawn thlen thulha inpuahchah dan tur mipui kan inzirtirnan te, chhiatna thleng thei hmachhawn tura kan lo inpuahchahna tuaihriam nan te, chhiatna lo thlen thulha hmachhawn dan kan thiam nan te, chhiatna kaihhnawh department hrang hrang ten kan hmanrua theuh te kan hmanthiam leh thiamloh en nan te, kan tihtur theuh te kan chian leh zual nan te, midang te nen a kan thawhho that leh zual nan te, kan tlakchham leh hmaih palh te, hmasawn kan ngaihna lai te hriat chhuah a nih theih na atan a tih a ni.

He hun min rawn hmanpui tur hian NDMA atangin Brig. Ravinder Gurung (Rtd) Sr. Consultant (ME & IRS) a rawn kal a, January ni 6, 2026 (Tue) khan a ni ho hian Disaster Management department leh District disaster Management Authority leh a kaihhnawih department ten Coordination and Orientation Meeting kan lo nei tawh a. Tin, nimin January ni 13, 2026 (Tue) khan inbuatsaihna leh tihdan tur sawihona (Table Top Exercise) chu Conference Hall, Assembly House Annexe ah neih a ni a, district hrang hrangten Video Conference hmangin an rawn zawm vek a. Hlawhtling takin hun hman a ni.

He State Level Mock Exercise on Earthquake Disaster hi January ni 15, 2026 chhunah leh tlai thim hlimah Mizoram hmun hrang hrangah chhiatna thlena mipui hriattirna tur ralkhel dar (Siren) ti riin rikrum thulha che vel thin thuneitute, department hrang hrang mi leh sa te leh lirthei hrang hrangte an veivakin an phusa dawn a, Mizoram a Sipai/Paramilitary awm ang angte an tel dawn bakah Kolasib leh Mamit district ah phei chuan thenawm Assam leh Tripura state-a an State Disaster Response Force te an lo kal dawn a ni.

He hunah te hian kan chetla rawn endik a, zirchiang turin National Observer pali an lo kal bawk a, State-ah pawh Observer pahnih leh District-a Mock drill neihna hmunah Observer-te an awm vek dawn a ni. Chung hmun hrang hranga chetlate chu State Emergency Operation Centre, Aizawl leh District tina District Emergency Operation Centre theuh atangin Video Live Streaming hmanga thlira, endik leh biakpawh thin an ni dawn nghe nghe a. January ni 15 zanah hian mock drill thlirletna (Debriefing) hun pawh neih nghal tura duan a ni.

Hemi Mock drill hi lirnghing tur hrilhlawkna (prediction) ni lovin lir lo nghing palh thei hre chunga (Scenario) chetlak dan enchhinna a ni tih hriaa mipuite lo chiai lo tur leh thudiklo vawrhdarh lo turin kan ngen che u a. He Mock drill exercise hi kan zavaia tana tangkai leh tha a nih avangin mipui hriathiamna, tawiawmna leh thawhpuina kan ngen mawlh mawlh a ni e.