Congress-in MGNREGA thlak lova a ngai anga kalpui leh an duh

Aizawl | Jan 14, 2025: Aizawl District Congress Committee (ADCC) President Lalhmingthanga Pachuau chuan vawiin khan Aizawl Press Club-ah thuthar thehdarhtute kawmin, MGNREGA thlak lova a ngai anga kalpui leh an duh thu a sawi.

ADCC President chuan, Congress in MGNREGA Bachao Sangram an ti a, an thil phut pali zingah hian, 'Inhlawhna tur guarantee pek, Hlawh ah guarantee pek, Langtlang taka kalpui,' ● MGNREGA thlak lova a ngai anga kalpui leh, ● Constitution in a pek anga inhlawh theihna chanvo peklet leh, ● Ram pumah minimum wages atan Rs 400 hman te a tel tih a sawi.

PRESS STATEMENT OF AIZAWL DISTRICT CONGRESS COMMITTEE (ADCC)

The Mahatma Gandhi National Rural Employment Guarantee Act (MGNREGA) hi kum 2005 khan khatih laia UPA sawrkar khan a kalpui tan a. He dan hnuaiah hian thingtlang a cheng sawrkar hnathawk awmlohna chhungkaw tin ten sawrkar atangin dan angin inhlawhna an dil thei a, hei hi an chanvo(right) anih avangin an dil anga pek ngei tur a ni. He inhlawhna hi an dil atanga ni 15 chhunga tihhlawhtlinsak tur ani a, chuti anih loh chuan employment allowance pek tur an ni. Hei hi MGNREGA hnuaia an chanvo a ni.

MGNREGA hi thingtlang chhungkaw tin tan a tangkai in an innghahna pawimawh tak a ni, chhungkaw vaibelchhe 5-6 velin kum tin an hmang tangkai thin a ni. Chhungkaw tamtak phurrit a chhawk a, vai ramah phei chuan an ni hlawh pangai aiin a sang zawk, vantlang tan hna tamtak a siam bawk a ni. Khawtlang  mamawh angin hna an kalpui a, hlawh hmuh loh a awm lo bawk a, direct taka an account ah a luh avangin thingtlang mite, Tribal leh hnam hnuaihnung tan phei chuan buaipui hranpa ngai lovin hlawh awlsam takin an dawng mai thin.

Tuna Central a BJP in an kalpui G-RAM-G ah erawh hi chu a letling thawk a, dan anga an chanvo, right a ni tawh dawnlo a ni.  He dan thar hnuaiah hian an chanvo a nihna a bo mai a ni lova, GRAM SABHA leh Panchayat te thuneihna tibo in, central ruahmanna anga kalpui tur a ni tawh dawn thung a ni. Hei bakah hian Central in a tum vek thin kha 90% leh 60% a tum tawh dawn a, a bak chu a state a zirin 10% leh 40% lai State in a tum a ngai tawh dawn a, State te tan chuan phurrit a tling a ni. Keini state hian 10% kan tum ve a ngai dawn a, keini ang state pachhe tak tan chuan phurrit nasa tak a ni ang.

He dan thar ah hian engkim Budget ah khung vek a ni tawh dawn a, lo lama hnathawh a tul laiin inhlawhna siam a ni dawn lova, hnathawh tur zat bituk siam a nih tawh dawn loh avangin MGNREGA hnuaia hnathawh aia tlem daih thawh a ni thei a, chu chu thingtlang mi chhungkaw tin tan channa nasa tak a ni thei a ni. Hei bakah hian India hnampa Mahatma Gandhi hming paih tumna niin a lang a, hei hian hnathawktute hnathawh tawh a tih zahawm loh bakah khawtlang inrelbawlna palzut tumna niin kan ngai a ni.

Heng a hnuaia kan tarlan te hi a thalo zual lai ni a kan hriat te an ni :-

1. MGNREGA hnuaiah chuan thingtlang chhungkaw tin te tan inhlawhna neih hi dan anga an chanvo a ni a, he dan hian guardantee a pe a ni. He dan hnuaiah hian inhlawhna an dil chuan ni 15 chhungin hna pek a ngai a, hna diltu chhungkua tin tan India ram puma Gram Panchayat/VC ten inhlawhna an siamsak thei. Amaherawh chu Modi sawrkarin a thlak danglam hnu ah chuan inhlawhna an dil khan pek ngei ngei ngai an ni tawh lova, an chanvo kha tihbo a ni tawh a ni. Tunah chuan hna an thawh leh thawh loh tur chu central in an rel tawh dawn a, an hnathawh tur pawh Modi sawrkar in a rel sak tawh dawn a, Gram Sabha in tihtur an nei tawh dawn lo a ni.

2. MGNREGA hnuaiah hian notified minimum wages angin hlawh pek a ni a, chu chu kum tin tihpun a ni.  Kum khatah ni 365 chhunga inhlawhna an dil in, thawh theih a ni a, chutiang chuan chhungkaw tin in an duh hun hunah hna dil theihna option an nei fo thin. Tuna Modi sawrkar in a thlak danglam ang chuan an hlawh duh ang angin an siam anga, minimum wage kha  guarantee an pe dawn lova, kum tin revised a ni dawn lo bawk a ni. Lo lama hnathawh hun laiin inhlawhna siam a ni dawn lova, pawisa an mamawh hun lai in inhlawhna a awm thei dawn lo tihna a nih bakah engzah pawh hlawh se an pek ang ang an pawm a ngai tawh dawn a ni.

3. Gram Panchayat/VC thuneihna chu contractor-te kutah hlan a ni. MGNREGA hnuaiah Gram Panchayat/Gram Sabha ten thuneihna an nei a, inhlawhna an siamsak thei a, project hrang hrang anmahni khua tihhmasawn nan Gram Panchayat leh Gram Sabha- ah te ruahmanna leh rawtna siam a ni thin. MGNREGA a hnathawh chu an khua tihhmasawn nan a nih avangin Contractor rawih khap ani a. Modi sawrkarhnuaiah chuan thutlukna zawng zawng hi Delhi atanga remote-control hmanga control a ni ang. Hmasawnna project-te chu mi tlemte hlawk nan a ni tawh dawn a, Gram Panchayat/Gram Sabha in thuneihna an hloh ang a, implementing agency chu Modi Sawrkar a ni ang, Contractor rawih an ni ang a, hnathawktu pawh an rawn hruai lut ang a, MGNREGA hmanga tualchhung mite inhlawhna ang kha a bo tawh dawn a ni.

4. State sorkar te tan phurrit a siam dawn a ni. MGNREGA hnuaiah chuan central sorkarin 100% a tum thin a, chuvangin State Sawrkar tan harsatna a awm lo. Tunah erawh chuan state sorkarin 10% atanga 40% an pek a ngai tawh dawn a, chuvangin state share an pek theih loh chuan inhlawhna a awm thei dawnlo a ni.

MGNREGA kum 20 chhung zet India rama thingtlang mite innghahna chu tihtawp a ni ta a, a pawi hle a ni. 

 COVID-19 hripui len lai khan Modi sawrkar hian ruahmanna mumal awm lovin lockdown a puang a, hnathawk hmun danga pem tawh maktaduai tam takte chu an khaw lamah an haw phah a, chung mite chuan MGNREGA hnuaiah inhlawhna an neih phah a, an tan a tangkai em em a ni. MGNREGA hi kum 2006-a hman tan a nih aṭang khan, ni vaibelchhe 180 chuang inhlawhna siam a ni tawh a, chhungkaw vaibelchhe 4.6 in an chhawr tawh a, kawng leh tuizem vaivelchhe 10 chuang siam a ni tawh bawk.

  MGNREGA hi CAG Audit telin zirchianna vawi 200 chuang zet neih a ni tawh a, project hlawhtling leh nghawng nei tha ber zinga mi a ni tih hmuhchhuah a ni. Hei vang hian Modi sawrkar hian tihtawp an duh hle a ni tih an thiltih hian a tilang a ni. Modi sawrkar hian kum 11 a lo tling ta a, he scheme hi an ngaipawimawh lo hle a, Inflation sang tak karah pawh kum 3 chhung MGNREGA budget a pung lo.Hnathawktute hnena hlawh pek tihkhawtlai a tam hle.  Za a 20% vel  chu kum tin MGNREGA budget-ah a hma kum ami clear nan an dah thin a ni.

National Mobile Monitoring System (NMMS) app hman tan a ni a, attendance leh works digital verification te hman ngei ngei a ngai a, Aadhaar-Based Payment System (ABPS) hman a ni bawk a, inhlawh theihna atana dan in MGNREGA hnuaia a pek chanvo tamtak a chhuhsak bawk a ni.

Tunah hian Modi sorkar chuan dan anga inhlawhna Central sawrkarin a pek chu an titawp ta a, kuthnathawktute tana inghhahna tha tak chu a tihtawp sak ta a ni. Thingtlang chhungkaw tin ten ni 100 inhlawh theihna an neih, an tana tangkai leh hlawhtling tak chu tih tawp hmiah an tum a, a hlawhtlin em avangin an tan chuan an hmelma lian ber Congress sawrkar laia an duan leh bultan a nih avangin a huatthlala em em a, tihtawp dan an ngaihtuah ta a ni.

 MGNREGA a tawp chuan hnathawh tur nei lo an pung ang a, mite chu hlawh minimum wages hlawh pha lova chhawr an ni dawn a ni. Khawsak harsat avanga  khawpuia pem lut a titam hle dawn a ni. Panchayat leh VC ten thuneihna an hloh bawk ang.

 Congress in MGNREGA Bachao Sangram kan ti a, thil phut pali kan nei a, chung te chu:-

● Inhlawhna tur guarantee pek, Hlawh ah guarantee pek, Langtlang taka kalpui.

  ● MGNREGA thlak lova a ngai anga kalpui leh.

  ● Constitution in a pek anga inhlawh theihna chanvo peklet leh.

  ● Ram pumah minimum wages atan Rs 400 hman.