Danin a bituk zat pelin Sairang Rel Station-ah parking fee lak chungchangah thuneituten hma an la

Danin a bituk zat pelin Sairang Railway Station-ah parking fee la, Railway-in hma an la

Aizawl the 19th January 2026: Sairang rel station chhunga parking fee khawn dana thil fel tawk lo awm nia lang chungchangah Chief Minister Pu Lalduhoman hma lo la tura a tih angin OSD to CM Pu Jonathan Lalremruata chuan Railways thuneitute hnenah thil awm dan a thlen a.

Vawiin khan Pu Dhrubajyoti Barman, Divisional Commercial Manager/ IC/ LMG chuan OSD to CM hi lehkha rawn thawnin parking fee chu an bituk aia sanga contractor-in a lo lak ngei thu leh dan a bawhchhiat vanga dan anga action an lak thu a rawn hrilh a. Danin a bituk zat (notified parking tariff) pela parking fee la tawh lo tura hriattir a nih thu leh a bawhchhe leh a nih chuan contract tihtawp thlenga hmalak a nih tur thu an hriattir thu an rawn hrilh.

Railway lamin parking fee bituk rate an neih dan a rawn hrilh bawk a. An parking rate chu a hnuaia mi ang hi a ni:

1. Park atanga darkar 2 thlengin (upto 2 hrs)  Cycle Rs. 3, Scooter & Bike Rs. 5, Car Rs. 10.

2. Darkar 2 atanga darkar 6 thlengin (upto 2 - 6 hrs) Cycle Rs. 5, Scooter & Bike Rs. 10, Car Rs 20.

3. Darkar 6 atanga darkar 12 thlengin (upto 6 - 12 hrs) Cycle Rs. 10, Scooter & Bike Rs. 20, Car Rs 30.

4. Darkar 12 atanga darkar 24 thlengin (upto 12 - 24 hrs)  Cycle Rs. 15, Scooter & Bike Rs. 30, Car Rs 40.

5. Darkar 24 aia tam emaw Daily basis (beyond 24 hrs or daily basis) Cycle Rs. 18, Scooter & Bike Rs. 30, Car Rs 40.

6. Thlabi charge (Monthly charge) Cycle Rs. 300, Scooter & Bike Rs. 600, Car Rs 800.

7. Helmet dah man darkar 24 chhungin Rs. 10.

Hei hi Railway thuneitute parking fee khawn dan tur rate an bituk chu a ni.