Apex Bank Branch 34-na - Saikhamakawn branch leh ATM hawng

Aizawl | Jan 16, 2026: Mizoram Cooperative Apex Bank Ltd. Branch 34-na, Saikhamakawn Branch chu vawiin khan Cooperation Department Commissioner & Secretary Udit Prakash Rai chuan a hawng a. Hemi rual vek hian Cooperative Societies Registrar John LT Sanga'n Saikhamakawn ATM a hawng nghal bawk.

Khuallian Udit Prakash Rai chuan Apex Bank chu North East-a Cooperative Bank tha ber zing ami a nih thu sawiin; mahse, chu chu Mizoram Cooperative Apex Bank chuan duhtawk mai lo va, India rama Cooperative Bank tha ber zinga tel thei tura tan la turin thawktute chu a fuih a. Apex Bank chu Commercial bank ni lova Cooperative bank a nih angin Bank hlawkna chauh thlir lova Mizoram mipuite tana ding a hmasawnna thlentu ni zel turin a fuih bawk a ni.

John LT Sanga pawhin thusawiin, Mizoram hmasawnaah Cooperative Movement chu a pawimawh chho zel dawn a, chutah chuan Apex Bank chuan mawhphurhna lian tak a nei tih a sawi a. Saikhamakawn leh a chhehvela Bank awmchhun a nih dawn avangin mipuite tana malsawmna thlentu a nih ngei a beisei thu a sawi bawk.

Hawnna inkhawm hi MCAB Chairman Lalnunsanga’n kaihruaiin, AMC Ward 19 Corporator Dr C Malsawmtluangi leh mi pawimawh dang ten thu an sawi bawk a. MCAB Chief Executive Officer A Lallungmuana, chuan lawmthu sawiin hun a khar a ni.