YMA Sub Hqrs. Saitual-in kumpuan hawnna hun hmang

Aizawl | Dec 17, 2025: Young Mizo Association (YMA) Sub Headquarters Saitual chuan YMA Kumpuan Ruihhlo Do chu ni 16.12.2025 (Thawhlehni) zan dar 7:00 khan YMA Zawlbuk, Venghlun Branch, Keifangah neih a ni. Kumpuan hi Central YMA General Secretary Prof Malsawmliana'n a hawng a ni.

He hun hi YMA Sub Hqrs. Saitual vice president K Lalthangvunga'n kaihruaiin Fin. Secretary C Lalremruata'n Hunserh a hmang a ni.

Secretary Lalsiamtluanga'n inhmelhriattirna neiin President R Lalruatkima'n Inlawmna thu a sawiin Sub Hqrs YMA chuan hetiang taka Kumpuan hawn hi kan la nei ngai lo a. He Kumpuan, Ruihhlo Do hi Town Branch ten bul tan ila tiin he hun hi kan hmang a ni a ti. He hun hmanga lokal zawng zawngte kan lo lawm che u a, in inpekna leh thawhrimna avangin Ruihhlo Do hi kan hlawhtling ngei ang tih ka ring tlat a ni a ti.

Kumpuan hawngtu Prof Malsawmliana chuan Krismas hmaa YMA Sub Hqrs. Saitual-in Kumpuan, Ruihhlo Do an hawng thei chu lawmawm a tih thu a sawi. Ruihhlo hman sualah Mizote kan san tawh thu sawiin Kumin bikah Ruihhlo avanga thi 80 chuang an awm tawh a, heng bakah thil thalo lama kan sang chu a zahthlak a ni a ti. Ruihhlo Do turin YMA lo chu kan awm chuang lo, Ruihhlo Do kan puan avangin Mizo mipui bakah Sawrkar leh pawl hrang hrang te an phurin ka hria a, a lawmawm tak zet a ni. Ruihhlo Do kan puannaah hian Haw haw a nawr chi a ni lovang, fimkhur a ngai a, dan hnuaiah kan do a ngai a. Ruihhlo kan do hian ruihhlo ngaite chauh en bik lovin ruihhlo a sumdawng te leh inhnamhnawihte pawh kan hmachhawn a tul ang.

Ruihhlo lakah indo kan puang a, ruihhlo do tur hian rinawmba, inpekna, huaisenna, thawhhona tha te a pawimawh.

Ruihhlo do turin YMA chauh kan chet chhuah a tawk lo, Kohhran leh Pawl hrang hrangte pawhin a hma aia nasa zawka chet chhuah a, thawhhona tha zawk kan neih a ngai a ti bawk.

YMA Sub Hqrs. Saitual Assistant Secretary K Lalremruata'n lawmthu sawina hun a hmang. He hunah hian Saitual khawpui chhunga YMA Branch hrsng hrang hruaitute an tel.

Central YMA General Secretary hi CEC atangin Zoramthara, PC Lalthanhlira leh Ngurthansanga ten an tawiawm a ni.