ṬKP dintu zinga mi Upa J Cherkunga a boral

Aizawl | Dec 27, 2025: Mizorama kohhran huangchhunga Thalai pawl ding hmasa ber Thalai Kristian Pawl (ṬKP) dintute zinga mi Upa J Cherkunga kum 93 Hnahthial Bazar veng chu tukin zing dar 5:25 am khan a chenna Inah a boral.

Upa J Cherkunga hi July ni 3, kum 1932 khan piangin, Kum 1951 khan Serkawn ah Middle school a kal a, Zosap Missionary-te kaihhruaina hnuai ah a awm in, Pu Lalkunga leh Pu Lalliana Assam inkhawmpui a kal haw in Thalai pawl din atul zia an sawi a, Kohhran hruaitute hnenah lehkha thehlut in Kohhran in a remtihsak a, july ni 30 zanah Serkawn Sikula zirlai te chu kohkhawm an ni a, he hunah hian Upa C Saizawnan kaihruai in, TKP chu din alo ni ta a ni. TKP din anih lai hian Upa J Cherkunga hi tel ve in, TKP din duhtu te zingah a tel a, pawmpuina ban dinglam phar in, a nemnghettu te zing a mi a ni.

Upa J Cherkunga hi Mizoram Baptist Kohhran Bazar, Hnahthial ah Kohhran Upa a ni a, Kohhran khai ding a, kohhran tana mi hlu tak a ni a, Serkawna lehkha a zir zawh hnu hian Mizoram Baptist Kohhran Mission hnuaiah zirtirtu hna a thawk a, hmun hrang hrangah thawk kualin, Pathian ram zau nana thahnemngai taka thawk thin mi a ni. Kum 1965 ah Mizoram Sawkar ah lutin Primary School Zirtirtu a ni a, kum 1999 ah a pension a ni. Mi hrisel leh invawng tak a ni a, Kohhran programmee a ngaihpawimawh hle a, a damthat chuan a hmaih ngai meuh lo a ni, kum 90 ral a kai hnu pawhin Pathian thuchah leh Inkhawm kaihhruai thlengin mawhphurhna chanvo pek a ni a, kohhran a uap hneh in, kohhran ban pui a ni. The Leprosy Mission Mizoram Hnahthial Chapter dintute zing a mi a ni a, TLM Hruaitu hlun a ni a, kum 2024 thleng khan TLM Campaign a fehchhuahna ah a la tel a ni.

Upa J Cherkunga hi pa hrisel tak a ni a, ZOsap te kaihhruaina hnuaia seilian a ni a, hrisel lohna liantham em em a nei ngailo. Zunkawng lamah fellohna a neih ve fo tak avangin April ni 21, 2025 khan ZMC lamah in checkup tura hruai a ni a, hetah hian vanduaithlak takin Postrate Cancer a lo nei tih hmuhchhuah a ni a, kum upa lam anih tawh avangin Doctor te thurawn angin treatment pangngai pek ngam a ni tawh lova, in lama in enkawl tura hruai haw a ni a, pawn chhuak thei lovin a awm a, heta tang hian zual lam a pan tial tial a, December ni 27 zing dar 5:20 khan a rawng a bawl sak Pathian hnenah alo chawl ta a ni.

Upa J Cherkunga hi a chhena Inah chhun dar 11 ah thlahna hun hman tur niin, chawhnu dar 1 khan lawina BCM Biak In Bazar Hnahthial-ah Bialtu Pastor Rev T Lalawia'n a vui ang a, Bazar veng Thlanmual ah vuiliam a ni ang.

~ Dingtea Chhangte