Aizawl | Dec 13, 2025: Tourism Minister Lalnghinglova Hmar chu vawiin khan Guwahati-ah Assam Tourism Minister Ranjeet Kumar Dass nen an inkawm a, tourism hmasawnna tura thawho an rem ti a, hun remchang hmasaah thawhona thuthlung ziah an tum.
Lalnghinglova Hmar chuan Mizoramin tun hnaiah tourist a neih tam thu leh, heng khualzin zinga a tam ber hi Assam state atanga lo zin an nih avangin Assam sorkar nena tourism hmasawnna kawnga thawhona neih ṭul a tih thu a sawi chu Assam Tourism Minister hian ṭha a ti a, a official-te nen an sawiho nghal a ni.
Assam Tourism Minister Ranjeet Kumar Dass chuan, "Mizoram hi kei ni tan state hrang a ni lo a, tun hmaa state pakhata chengho vek kan ni. Mizoram tlawh hi Assam mite hian an châk a, rel a awm tawh bawk nen mi ṭhahnem zawk an lo kal zel kan beisei," a ti.
Mizoram Tourism Minister chuan, "India rama state te leh mipui tlemna kan ni a, chutihlaiin khualzinin an tlawh duh leh ngainat state nih tuma inbuatsaih mek kan ni. He state hian a mamawh chu partner ṭha a ni a, hla taka mite nena thawhho aiin Assam nena thawhho hian tourism hmasawnna tura rah ṭha a chhuah kan ring tlat a ni," a ti.
Lalnghinglova Hmar chuan Assam Tourism hunpui buatsaihah Mizoram tourism chawi larna tur thlalak leh video-te a remchan anga tilar ve ṭhin tura ngenna a thlen chu tihhlawhtlin an tum tur thu an hrilh bawk.
He inkawmnaa tel ve Assam Tourism Development Corporation (ATDC) Managing Director Kumar Padmapani Bora (IRS) chuan Mizorama tour operator-te tan Guwahati lamah workshop an buatsaih theih thu te, Mizoramin ATDC kal tlanga tourism lama puih a ṭulnaah an inhawn reng thu a sawi.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: