Sport Minister in 23rd NE State Chess Championship 2025 hawng

Aizawl | December 16, 2025: Sports & Youth Services Minister Lalnghinglova Hmar chuan tukin khan R Dengthuama Indoor Stadium, Mualpuiah India Hmarchhak bial chhunga Chess intihsiakna lian ber, 23rd NE States Chess Championship a hawng a, he hunah India hmarchhak States hrang hrang atangin Chess khelthiam te an rawn kal khawm a ni.

23rd NE States Chess Championship hawngtu Lalnghinglova Hmar chuan Sports Minister a nih bakah Tourism Minister a nih angin chess khal tura rawn kalte chu a lo lawm a. An chhungte leh thiante nen Mizoram rawn tlawh leh ngei turin a sawm a. Mizorama an cham chhungin nuamti taka awm a, Winter Festival te pawh an hunawl remchangah chhim turin a sawm a ni. Chess chu khawvel huap pawha India hmingthatna leh ropuina a ni tih sawiin, Mizoram leh Northeast state dangte pawhin ‘popular sports’ chauh ni lovin, khawvela kan lan theihna chess hi uar zual zel tha a tih thu a sawi a. Chess chu game zahawm tak a nih piahlamah dawhtheihna zirtirtu tha tak a ni a. Social media khawvel hmanhmawh tawh tak, thalaite attention span pawh tawite a nih tawhna khawvelah chess khelh chu rilru hriselna atan pawh a tha hle a ni.

23rd NE State Chess Championship ah hian India Hmarchhak State hrang hrang atangin infiammi 280 an tel thei dawn a. Arunachal Pradesh atangin mi 14, Assam atangin mi 52, Manipur atangin mi 7, Nagaland atangin mi 16, Sikkim atangin mi 49 leh Tripura atangin mi 9 an rawn kal a ni. Mizoram chuan thawhhlawk berin player 103 an tel a ni. Heng bakah hian kum bithliah hrang hrang pasarihah inelna a awm dawn a. Hmeichhia lam infiammi 24 an tel bawk a ni.

23rd NE States Chess Championship inkhawm hi Dr Lalhmuchhuaka, Sr. Vice President, Mizoram Chess Association in a kaihruaia. Khual zahawm KW Wajri, President, NE Chess Forum leh Pu Sharad Agarwal, IPS, DGP, ten thu an sawi bawk a ni.

He championship hi Mizoram in a thlen vawi hnihna a ni a, tun tumah hian ni li (4) chhung khelh tur niin, Ni 20 dec 2025 ah a tiak ang.