Lunglei Bawrhsapin NH-302 kawngpui zauh leh siam ṭhat hna thawh mek a enfiah

Lunglei | Dec 16, 2025: Lunglei District Bawrhsap Navneet Mann chuan vawiin khan National Highway-302 kawngpui laih zauh leh siam ṭhat hna thawh meka Theiriat-Hrangchalkawn leh Hauruang-Sazaikawn huam chhunga hma lakna hrang hrang chu a hmunah kal chilhin a enfiah.

Bawrhsap hi Settlement Officer Jennifer Vanlalhruaii Pachuau, District Information & Public Relations Officer C Lalhruaitluanga leh official dang te, kawng siam mek enkawltu NHIDCL (National Highways & Infrastructure Development Corporation Limited) te, hna thawktu contractor BRN Infrastructure Private Ltd te, Lunglei Sub-Headquarters YMA hnuaia Vigilance & Monitoring (V&M) Committee hruaitute leh khawtlang hruaitu (local council) te'n an ṭawiawm a. Hna kal meka hmasawnna awm dan leh khawtlang mipuiin harsatna an tawh leh hna thawktute'n harsatna an tawh te en hovin, hma lak zel dan tur leh harsatna hrang hrang chin fel dan tur te an sawi ho.

He hunah hian hna thawktu BRNIPL te'n lei min nasatna lai thian fai tur leh kawng chhe zual lai siam ṭha tura November 2025 chhunga hna thawh tur ruahmanna, Work Plan an siam bawhzuia hma an lak dan en ho a ni a. BRNIPL hotute chuan Theiriat kawng chung leh kawng hnuai lei minna laia leivung chu a theih ang anga then fai a nih thu leh a min belh leh ṭhin avanga khawih zui ngam a nih rih loh thu sawiin, Bawrhsap chuan fur hmaa siam zo hman tura hma la turin a hriattir a. Theiriat huam chhunga ram buai te, retaining wall leh culvert siam chungchanga harsatna awmte ram neitute nen ching fel turin meeting koh ni se, tih a ni a. Theiriat leh Mizoram Polytechnic Polytechnic ram zawn kawng siam ṭhat mekah Company lam chu January 2026 chhunga WMM phah leh kawng luan zo hman tur leh Mizoram Polytechnic ram chhung kawng (internal road) pawh January thlaa siam ṭhat leh luan hna thawh zawh tum tura tih an ni.

Hauruang leh Sazaikawn inkara hna kal mek leh harsatna awmte pawh a rang thei ang bera chin fel tum turin hna thawktute chu hriattir an ni a. Bawrhsap chuan BRNIPL te chu January leh February 2026 chhunga he'ng kawng chhe zual laia lei vung then fai, kawng laih zauh, lung rem siam, tuiluankawr siam leh kawng luan chungchanga an hna thawh dan tur ruahmanna, Work Plan siama DC-ah theh lut tur leh chak zawka hna thawh tum turin a hriattir nghal bawk.