PHE-in app hmanga tui leak report tha lawmman hlan; “hmachhawp – Tlawng weir vertical extension, dedicated online payment app leh smart metering te bawhzui mek a ni,”

Aizawl | December 4, 2025: Public Health Engineering Minister Prof. Lalnilawma'n vawiin khan Conference Hall, E-in-C PHED Office-ah Tui Leak Report-na App Hmang Tha Zualte Chawimawina hun chu khuallian niin a hmanpui.

Khuallian Prof. Lalnilawma chuan mipui leh department thawhhona chu ropui a tih thu sawiin, vawiina chawimawite chu an thahnemngaihna avangin lawmthu a hrilh a. Tui Leak Report-na App chu a vil ve reng thu a sawi a. He app kaltlang hian tui luang ral tur litre tam tak an veng thei a, department hmalakna tur chin chu a theih anga ranga an siamthat zel thu a sawi a. Cluster atanga mimal connection leak a lo awm erawh chuan a neitute siamthat tur a nih thu leh an siam vat loh chuan connection tihtawpsak pawh danin a phal tih a sawi a ni.

Minister chuan department hmalaknate tarlangin, an mutan lian ber pakhat – Alternate Gravity Water Supply Scheme of Aizawl hnuaia Hualtu atanga tui lakna pawh harsatna karah hlawhtlinpuiin, Muallungthu pawh an commission tawh a, Mualpuiah an tihaw tawh bawk a, Greater Aizawl Water Supply Scheme Phase-III Vaivakawn Zohnuaia buaina pawh chinfel tawh a ni, a ti. Laipuitlang atanga Aizawl hmar lama tui semna tur pawh hawn tawh niin, zan lama hna thawh thin a nih thu a sawi a. An hmachhawp – Tlawng weir vertical extension, dedicated online payment app leh smart metering te pawh bawhzui mek a nih thu a sawi a ni.

Prof. Lalnilawma chuan media nena thawhhona tha a pawimawh thu sawiin, an harsatnate media kaltlanga an puanzar chuan mipuiin an hrethiam thin a ni, a ti.

Minister chuan Tui Leak Report-na App hmang tha zualte, a hnuaia tarlante hnenah hian chawimawina thilpek leh sumfai a hlan nghal a ni:

1-na: PB Lalkrosmawia, Tanhril – Vawi 40 – Rs. 10000/-

2-na: F Lalhmangaiha,Chanmari – Vawi 12 – Rs. 7000/-

3-na: RK Nithanga, Chanmari – Vawi 9 – Rs. 5000/-

Chawimawina hun hi Er. Zodinthari, E-in-C, PHED-in kaihruaiin, hawnna thu a sawi nghal a. Tui Leak Report-na App chu Minister hmalakna zara an neih theih a ni tih sawiin, September ni 5, 2024-a tlangzarh a nih atanga vawiin thlengin report 350 a lut tawh tih leh thla tina report 23 lut ang a nih thu a sawi a. Cheng vbc 770 hmanna tur Tan Lui Project atan forest clearance an hmuh tawh thu a sawi bawk a ni.

Er. Lalrinzuala Ralte, SE, Aizawl WATSAN Circle atangin report ngaihthlak a ni a. Fur aiin thalah report an dawng tlem zawk tih te, Aizawl North Division atangin report an dawng hnem zawk tih te, Aizawl North-II Subdivision atanga an dawn hnem ber laiin Aizawl South-I Subdivision atangin an dawng tlem ber tih te a sawi a. A report-a pawimawh zualte thlalakah dah tel a ni.

Er. Ngentluanga, Chief Engineer, Zone-I, PHED chuan lawmthu sawiin hun a khar a ni.