PATHIANIN I TAN HMUN A BUATSAIH

_Thlirna Thlak Danglam_

By Rick Warren 

— December 1, 2025

“In tan hmun siamin ka kal dawn hi. Tin, in tan hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nan.” Johana 14:2-3

Eng harsatna pawh tawk mahla, lungngai leh hrehawm ti takin awm ṭhin mahla. Lawmin awm rawh, hrehawm tuarin kumkhuain i awm dawn lo. Pathianin vanah in a buatsaih sak che a ni! Chutah chuan tuna kan awm ang hian kan awm tawh dawn si lo va.

Kum 50 liamtaah khan kei leh Kay-i kan inhual ve a. LA County ah ka cheng a, Kay-i chu Fresno hmar lamah a cheng thung a. Kan inneih hnua kan chenna tur buatsaih a ṭulin ka hria a. Sum ka nei ngah si lo. Nimahsela engtin tin emaw ngaihtuahin kan chenna tur chu ka buatsaih ve thei ta hram a. Keima tawkah chuan a mawi thei ang ber khan buatsaih ve ka duh a ni.

Kan chenna hmasaber tur kan buatsaih leh Isuan, a mo, kohhran hote tana a buatsaih chu tehkhin chi pawh a ni lo. I chenna atana Isuan vanram a buatsaih rei tawh zia hi i hre duh em?

“Chu mi hunah chuan Lalber chuan a ding lama mite hnenah chuan, ‘Ka pa voh bikte u, lo kal ula khawvel siam ṭantirh ata in tana ram buatsaih chu chang rawh u'” (Matthaia 25:34).

A va inbuatsaih rei tawh tak em! Khawvel siam ṭantirh aṭang khan Pathianin vanram chu a buatsaih tawh tihna a nih chu.

Chutah chuan nunna a la awm dawn chauh a ni. Engtikniah emaw chuan keini ho hi minla teh dawn a ni. Tuna kan awmdan hi a tawpna a la ni lo a ni!

Vanram chu mawi leh nuam tak, thlamuang taka chawlh hahdamna hmun a ni dawn a. A nawmna chhan ber tur chu Isua kiangah kan awm dawn a ni - ṭhutpui theih titipui theih leh lenpui theih a ni dawn a ni. Johana 14:2-3, “In tan hmun siamin ka kal dawn hi. Tin, in tan hmun ka han siam chuan ka lo kir leh ang a, ka hnenah ka la ang che u; ka awmnaah nangni pawh in awm theih nan.”

Chu chu thutiam ropui tak a ni! Chatuanin Isua kiangah kan awm dawn si a. Pathian chuan chhungkua din a duh a, chuvang chuan min thlang a, kan awmna tur pawh a buatsaih a ni. Isua chu Lal leh Chhandamtuah i pawm anih chuan, chu thutiam chu i tan a ni.

Ngaihtuah zui atan

* Vanram i mitthla dan avang chuan i hlimin i phur sawt em Pathian nen in cheng dun dawn si a. Nge i mitthla dan nen a inanglo zawk? Vanram i thlir danah chuan i engnge thlak danglam ngai le? 

* Pathianin kan tan hmun a buatsaih tih kan hriat aṭang hian Pathian chu eng rilru pu nge nia kan rin?

* Vanrama lut tura i nghah meknaah hian Pathianin engtia ṭhang turin nge a duh che nia i rin?

*[Lettu: Sangpuia]*