MAL Academy Award 2025 Revd Chuauthuama hlan

Aizawl | Nov 29, 2025: Mizo Academy of Letters (MAL) chuan vawiin khan Assembly Annexed Conference Hall, Aizawl-ah kum tawp inkhawmpui an hmang a, Assembly Speaker Lalbiakzama'n khuallian niin a hmanpui.

Khuallian hian, 'Thu leh hla chanchinbu' kum 60 (diamond Jubilee) Special Issue leh lehkhabu dang a tlangzarh a, hemi bakah hian Academy Award dawngtu Revd Chuauthuama aiawh, a nupui hnenah chawimawina a hlan bawk.

Khuallian chuan, "Thu leh hla (literature) hi mihring nun phung nena inzawm tlat, a lova awm thei lo tluk hiala ngaih theih a ni a. Chumi ti chiang tur chuan kan Pathian biak lai hian mihringte hnena a ropuina leh amah a inpuan chhuah nan hmanraw pawimawh tak “hla” hi a hmang tlat mai a ni." a ti a.

"Hla hmang chuan Pathian nen kan inpawl thin a. Hla hmangin kan lungngaihna te puang chhuakin, damna kan chang ta thin a. Kan Bible-a Davida fakna hla te, tawngtaina hlate atang hian a ti chiang hle awm e. Taksa leh thlarau damna thlengin Pathian hian “hla” hi hmanrua atan a hman avangin a pawimawh em em a ni," a ti bawk.

Vawiin inkhawmpui hun khatna (academy award hlanna) hi MAL vice president Prof Rualkhuma Colney in a kaihruai a, MAL General Secretary Dr Zoramdinthara'n Academy award dawngtu chanchin a sawi a, kum thum dana a thlan thin Academy Award 2025 chu fam ta Revd Chuauthuama hnena hlan a ni.