Mizo Students Union (MSU) Sub Headquarters, Vanbawng Zirlai hlawhtlingte lawmpuina leh intuaitharnaa Speaker Lalbiakzama thusawi.
@ CK Ransam Resort,Thuampui
# December 6, 2025
.jpg)
A hmasain Pu Chairman leh Uaptu Pu B Lalkhawngaihzuala President MSU, Vanbawng MSU hruaitu te leh Vanbawng Welfare hruaitute leh Vawiina Zirlai kan chawimawite zirlai lo kal khawm te leh he hun ngaipawimawh a lo kal zawng zawng te inzavaiin chibai ka buk a che u.
Greek Philosopher ropui tak Aristotle khan, “Zirna bul tanna chu hrehawm mahse rah duhawm tak a chhuah thin,” a lo ti a. vawiina kan kal khawm chhan kan zirlai chawimawite pawh peih lo chung chunga in zirna te, in thiante an len laia ina in tawm tlat bikna te khan vawiin hian min hruai khawm a ni. Vawiin a kan chawimawi 1 phei kha chu MZU B. Com-a rank holder a ni a. Kei ngei pawh hi Commerce back ground nei ka ni a. Pathian zarah vanneihthlak takin Gold medalist ka ni ve hlauh a ni.
Vanbawng hi kan bial Chalfilh bialah pawh khaw lian pawl tak in ni a. Mizoram pum huap ang pawhin khaw lar pawl tak in ni a. A larna chhan hi ziak leh chhiar thiamna vang a ni. Krismas hmanna hmasa ber (Mizoram Hmar lamah) thu hlaa Khawlian nen in inhnialna pawh hi ziakmi te vang a ni a. Ziakin lo awm ta lo se thu inhlan chhawn chuan tawp chin a nei mai dawn a ni. Kristianna kawngah pawh Mizoram pum huap anga, a sulsutu khua in ni leh zel hi Vanbawng ropuina a ni.
Vanbawng mi hmasate kha an lo ropui awm ngawt mai. Kum 1944 hma lam phei kha chuan thingtlang khaw lehkhathiam tamna ber tih thin ni hial khawpin tan an lo la a. Kan Lok Sabha MP Pu Richard Vanlalhmangaiha Pu, Pu Vaikhawla pawh Vanbawng zirtirtu hmasa ber a ni a. Vanbawngah kher zirtirtu ni lo se chuan a tupa hi MP a nih ka ring lo. Kan Education Miniter Dr. Vanlalthlana (Dr. Mathlana) nu pawh hi Vanbawng chhul chhuak tho a ni a. ZPM ministry-ah hian vanbawng contribution hi a hrawl thawkhat viau a ni. Tin, kan officer lian leh Doctor-ah pawh hian Vanbawng khaw chhuak tam tak an awm a ni. Thufing pakhat chuan, “I thlahteah i ropuina a lang,” a lo ti a. Kan mi hmasate thlahte hi Zoram khawvelah chuan mi ropui an ni.
Kum 1912 daih tawha Primary School nei tan khua in nihna hian a hming hmerh te pawh a kan han sawi te kha a hring chhuak niin ka ngai nghet tlat a. Primary School Centenary lawm thei khua hi Mizoramah hian an tlem viau awm e. Chu mai piah lamah Middle School leh High School Golden Jubilee lawm thei khua pawh hi an tam lo khawp ang. Kum 10 pawh tlin hmaa school khar leh ngai ta tam tak an awm lai a nung tak mai a School in han run thei hi fak in phu hlein ka hria a ni.
Vawiina Zirlai kan chawimawite hian kan khua mi huai kal ta te mel lung lo phun kha zuan ka hlen tumin theih tawp chuah ila. Vanbawng ti hming chhetu ni lovin a hming thatna chhawm nungtu ni ila. Vawiina zirlai 22 lai mai chawimawi tur in han awm te hi a lawmawm ka tiin Vanbawng leh Chalfilh bial tan mi chhuanawm in nih ngei theih nan duhsakna sang ber ka hlan a che u.
Ka lawm e.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
(Feedback at: admin@exploremizoram.com )
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: