“Mizoramah mihring nuai 12.6 awrh kan awm laia HIV prevalence rate sanna ber kan ni hi a pawi,” ~ Speaker

Aizawl | Dec 1, 2025: World AIDS Day 2025 pualin vawiin khan Vanapa Hall-ah hun hman a ni a. He hun hi Assembly Speaker Lalbiakzama chuan khuallian niin a hmanpui.

Speaker Lalbiakzama chuan khawvela natna langsar tak HIV/AIDS pung tur venna kawngah Mizoram sawrkar chuan Mizoram State AIDS Control Society (MSACS) hmangin theih tawp a chhuah thu leh kum 2017 khan Human Immunodeficiency Virus and Acquired Immune Deficiency Syndrome (Prevention and Control) Act chu siam a lo nih tawh thu a sawi a. Heng hmalakna kaltlang hian thawktu chhuanawm tak takten school, college, university leh hmun hrang hrangah awareness an nei thin a, AIDS vei mekte enkawl dan leh la vei lote tan zirtirna hrang hrang an pek thin thu a sawi a. Sawrkar hmalakna zarah HIV hrik paite chuan a thlawnin ART damdawi an lak theih thu tarlangin ART damdawi hi taksaa HIV hrik inthlah pung chak lutuk tur vengtu, HIV natna kaihhnawih tam tak pumpelh theihna a nih avangin HIV hrik pai ART la lo leh ei tha lo zawng zawngte, a thlawna dawn theih ART damdawi hi tha taka ei turin a ngen a ni.

Speaker chuan Mizoramah mihring nuai 12.6 awrh kan awm laia HIV prevalence rate sanna ber kan ni hi pawi a tih thu a sawi a. MSACS chuan HIV natna hi um bo thuai a nih theih nan kumin atanga tanin kum 2030 thleng kumtin 80%-a tih hniam tumin beihpui a thlak dawn a, hemi kawngah hian mipuite leh NGO-te pawhin theih tawp kan chhuahpui a tul thu a sawi a. Chumi tur chuan a theh darhtu nasa ber sex leh ruihhlo laka inthiarfihlimte, kawppuite laka rinawmte, thianghlimna vawnte a pawimawh a, a bikin kan ram leh hnam hmachhuan, kan innghahna tur thalaite phei chu tih takzeta tan la turin a ngen a ni. Ramin hma a sawn zel rualin sualna pawh a pung ve zel maithei a, chumi do let zel thei tur leh kan rama sualna pun lun zel lova Zoram nuam siam turin kalkhawmte a chah a ni.

Kum 1988 atang khan World AIDS Day chu hman tan niin, vawiin hi a vawi 38-na a ni a. Health & Family Welfare Department Principal Director Dr Lalthlengliani'n vawiin hun hi a kaihruai a, MSACS Project Director Dr Jane R Ralte hnen atangin report ngaihthlak a ni a. MSACS chuan HIV do kawngah NGO hrang hrang, JERACOM Darlawn, Samaritan Society of Mizoram, Mamit leh Zoram Drivers Ramthim Board Selingte thawhpuiin hma a la reng a. Red Ribbon Club- te pawhin blood donation camp te siamin, inelna hrang hrang, quiz, debate, slogan writing, painting, eassay writing, video making etc. hmangtein hma an la bawk thin a. Tun dinhmunah hian HIV kai hmuh chhuah apiang rang taka ART damdawi lakna tur ART Centre 14 (Aizawl-ah pali leh district hospital-tin ah) a awm a. ART damdawi la mek (Alive on ART) mi 18,231 an ni a, chutih rualin ART damdawi la tura ziah luh leh ei sil tawh, ei chhunzawm leh duh si lo mi mi 1169 lai an awm bawk a. Hei bakah hian HIV hrik pai hmuhchhuah tawh zawng zawng atangin mi 7000 chuang zet chu ART damdawi ei lo an awm a ni.