Mizoram Creators' fest 2025-ah Vanneihthanga Vanchhawng-in Best news and commentary Award dawng

Aizawl | Dec 12, 2025: Mizoram Governor General (Dr) Vijay Kumar Singh, PVSM, AVSM, YSM (Retd) leh First Lady Pi Bharti Singh te chuan Dec 10 zan khan December ni 8, 2025 atanga neih 'Mizoram Creators' Fest 2025' kharna hun, Aijal Club Park-a neih chu an hmanpui.

Award hrang hrang sem a ni a, heng zingah hian, ngaihven hlawh leh ngaihhlut hlawh Best news and commentary chu Special report hotupa Vanneihthanga Vanchhawng-in a dawng a, ani bakah hian, tunlai thalaite khawvela hriat hlawh tak takin an dawng a ni.

He huna khuallian, Governor General (Dr) Vijay Kumar Singh chuan Mizoram Creators' Fest buatsaihtute hmalakna fakawm tiin, Mizoram thalaite tana an theihna pho chhuahna hun tha, remhriatna leh digital lama thil thar pholanna siam sak chuan hmasawnna a thlen ngei a beisei thu a sawi a. Digital creator kalkhawmte chu Mizoram state mawi tak leh hnam ziarangte khawvel hmuh theiha pho langa auchhuahpuitu 'cultural ambassador' an nih thu a sawi a. Khawvel thiamna leh hmasawnna inher danglam chak tak karah thil thar thiam zung zung duha insiamrem thin thalai, thil danglam bik ngaihtuah chhuaktute'n digital community ni thei tura rahbi pawimawh tak an siam chu lawmawm a tih thu a sawi bawk.

Mizoram Governor chuan social media chu hmanraw chak tak a nih tawh thu leh, mimal tinte'n an dinhmun leh thiamnate pho chhuah nan zalên taka an hman mek thu sawiin, digital creator kalkhawmte chu midangte ngaihdan siam saktu, thalaite thununtu leh khawtlanga thil inlumlet dan chena thunun thei an nih avangin an thiamnate a tha lam hawia hmanga, dan zawm chung leh mawhphurhnate tha taka hlen chunga hmang turin a chah a. Social media chu inpumkhatna, thu dik chauh thehdarhna, midangte rilru a tha lam hawia hruaina leh talent tihpun nana hman a tul thu a sawi a. Digital khawvelah engpawh thleng thei a nih avangin chetsual loh nana fimkhur a tul thu leh a him thei ang bera social media hman a tul thu a sawi bawk.

Digital creator-te chu Mizoram sum leh pai dinhmun thanlen zel nana kawng awmte dapa tourism nasa zawka chawilar tura chahin, Mizo thalaite chu creator tam takin kawng hrang hranga sum thahnem tak an lakluh thin dante zira, kan ram mawina, hnam ziarang leh nunphung tha tak takte chu sum lakluh nana hmanga chhawr tangkai tum turin a fuih a. Tunhnaia social media platform hrang hrang kaltlanga Mizoram tourism nasa taka chawilar a nih dante leh hemi avang hian khualzin tam takin Mizoram an rawn tlawh phah thu tarlangin, hmun dangah kal kher lo pawhin Mizoram atang ngei pawhin digital creator ni chunga eizawnna tha tak a neih theih thu a sawi a. Lawmman dawngtute a lawmpui thu sawiin, digital creator-te chu an theihnate tipunga tan la zel turin a chah a ni.

He hunah hian Chief Organiser Pu Benjamin Vanlalpeka, Founder, BR Studio chuan inlawmna thu a sawi a. Social media platform hrang hranga digital creator thawhhlawk leh tithate hnenah lawmman sem a ni a. Pu Dominic Lalhruaitluanga'n lawmthu sawiin hun hman a khar a ni.

Ni thum chhung awh 'Mizoram Creators' Fest 2025' kaltlang hian Mizorama digital creator naupang tak tak leh hmabak eng tak neite zawn chhuaha, hmasawn zel thei tura thiamna leh chakna pek bakah creative media industry-a eizawnna an hmuh theih nana tanpuina leh hun tha pek tum a ni a. Panel talk, workshop exhibition, live show leh creative battle arena-te huaihawt niin, content creator thawhhlawk leh tithate hnenah lawmman sem chhuah a ni bawk.

He Fest-ah hian Mizoram mai bakah State pawn atangtein YouTuber, Influencer leh Social Media Personality-te tel a, Company lar leh hriat hlawh tak takte'n an hmanraw neihte chhawp chhuakin training an buatsaih bawk a ni.

Governor General (Dr) Vijay Kumar Singh leh First Lady Pi Bharti Singh te chuan programme zawhah hian Mizoram Creators' Fest puala stall buatsaihte fangin a nghaktute an kawm a ni.

INSTAGRAM PLATFORMS

Best celebrity creators ~ Rosy_Lalramthlengi

Best food & travel ~ zofoodie

Best fashion & life style creators ~ Its chunli

Best beauty & skin care creators ~ Essie.ez

Best Health & Fitness creators ~ Bozos journey

Best comedy & entertainment ~ Rinkson Squad

Best esports creators ~ Fela Ralte

Best Education & Knowledge ~ Chiko Hmar

Best Social Impact ~ Zo Inspiration

Best Motivational ~ Stephen Ruatfela

YOUTUBE PLATFORMS