Mi 218 hnenah Sports Incentive nuai 94 chuang sem chhuak; "Mizoram state angin 'National Level-ah kan sang lo hle a ni,' tih hi kan pawm ngam a ngai," ~ Sports Minister

AIZAWL | Dec 3, 2025: Sports & Youths Services Minister Lalnghinglova Hmar hovin Vawiin khan Woodland Hills Roof Top, Zonuamah "Distribution of Incentive Cash Award to Meritorious Sportspersons" hun hman a ni a. Khuallian Pu Lalnghinglova hian 1st April, 2024 - 31st March, 2025 chhunga Sports discipline hrang hrang 15-a International & National level-a Medal (Gold, Silver & Brown) dawng pha chin infiammite 218 leh leh official 41 te hnenah Incentives Cash Award hi a hlan a ni.

Sports Minister chuan thu sawina hun hmangin, Kum 4/5 kalta a National Games-a Mizoram State dinhmun kan en chuan kan dinhmun dik tak kan hmu ang, 27-na, 28-na tih vel kan ni. Vawiin hi lawmna hun kan hman mek lai ni mahse, “hard talk” a ngai, kan dinhmun dik taka kan hriata kan tan zual a ngai. Incentives cash award dawngpha chin kan infiammi thazual fuankhawm te pawh hian a Mizoram State angin; National Level-ah kan sang lo hle a ni, tih hi kan pawm ngam a ngai. Sports kan tui a, Infrastructure leh thildangah sum pawh kan seng nasa ve tawh. Mahse human resource development lamah tan kan lo la tawk lo nge ni ang, Mizoram hian Olympic medalist 2 chauh kan la nei thei hrih a ni. India in kum 2036-ah Olympic thlen a tum a, chutah Medal lak ve pawh kan la dream tha ngam lova, engtin nge kan tel ve thei hram ang kan la ti lauh lauh chauh a ni. kan zavaia ngaihtuahna kan sen tlana, tan kan lak ho a ngai tak zet a ni, a ti.

Minister chuan Sports Minister ka nihna angin, Sports a kan san loh chuan keimah mawhphurhna a ni. Chuvangin, tihdan pangai a kan kal reng chuan eng kan ang lovang tiin, eng Sports discipline hian nge National Games, Commonwealth Games, Asian Games leh Olympic-ah min hnuk hnai thei ang, tia awmze nei taka kal turin ruahmanna kan kalpui tan tawh a. Nimin piah atang khan Empowering Mizoram Sports hnuaiah Sports discipline 8 tan Trainers’ Training kalpui tan a ni. Sports Discipline te chu Category –A,B,C-ah te thenin, Category-A hnuaiah Discipline 8, Category hnuaiah discipline-9 a bak zawng chu category C-ah an awm ang. Category dang te thlauhthla si lo leh Mizoram State Sports Council hnuaia Promotional Fund khawih buai si lovin, Discipline duat bik leh insawrhbingna discipline kan nei a tul tawh. Kum 8-15 inkar infiammi, talent nei tha bik te chu Empowering Mizoram Sports hmalakna hnuaiah National games, Commonwealth games, Asian Games leh Olympic thlir ranin hrual an ni tawh ang, a ti.

Vawiin Incentive Cash Award hlanna programme hi S&YS Secretary V Lalsangliana IAS chuan kaihhruaiin, S&YS Director H Lalhmingthanga'n report tawi a pe a. Director report-ah chuan Mizoram Sports Incentive Cash Award Scheme, 2025 hi kumin February thla khan notified a ni a. Chuvangin kumina Award dawng tur thlanna atan hian Scheme hlui (2022) leh a thar (2025) hmang kawpin, infiammite tana a hlawk thei tur lai lai hman a ni a.

Mizoram Sports Incentive Cash Award Scheme hnuaiah hian medal latu player-te chauh ni lovin, inelna an neihna hmuna anmahni hruaitute (Manager, Coach leh Contingent Leader) te hnenah Incentive Cash Award hi pek ve theih a ni a. An player hruaite Award dawn theih zat atanga chhuta 30% chu Coach hnenah pek a ni a, 25% chu Team Official-te hnenah pek a ni bawk. Chuvangin tun tumah hian infiammite tan award 224 leh Team Official-te tan award 41, a vaiin award 265 sem a ni a. Amaherawh chu, lawmman pakhat aia tam late an awm avangin lawmman dawngtu hi mi 218 (Mipa - 150, hmeichhia - 68) an ni thung. Infiammi ten a Award dawn tamna discipline te chu: Football-ah 35, Badminton-ah 4, Muaythai-ah - 30, Taekwando-ah - 29 etc te niin, Boxing leh Judo atangin 1 ve ve in an dawng bawk.

Sports Incentive Cash Award sem hi a vaiin Rs. 94,19,925.00 (cheng nuai 94, singkhat, sangkua, zakua, sawmhnih leh panga) zet a ni thu tarlan a ni.

Vawiin Incentive Cash Award semna programme-ah hian S&YS leh MSSC official te, Sports Discipline hrang hranga hruaitute, Awards recipient te bakah Infiamna lama hranghlui Mizoram milar Vanlalduata, Wrestler leh S Malsawmtluanga, Footballer te pawh an tel a ni.