International Day for persons with Disabilities ropui takin hmang; "Sawrkar pawhin, vantlang hmunte chu rualbanlote pawh awlsam zawka an chet ve theihna tura a ruahman zel," ~ Social Welfare Minister

Aizawl | Dec 3, 2025: International Day for persons with Disabilities chu vawiin khan Dawrpui Multipurpose Hall-ah ropui takin hman a ni. He hun hi khawvel pum huapa hman a ni a Mizoramah pawh district thenkhat leh state level program chu Aizawlah hman a ni a, Social Welfare Minister Lalrinpuii chuan a hmanpui, khual zahawm niin Commissioner for PwDs Mizoram Vanlaldiki Sailo chu a tel bawk.

He hunah hian khuallian Social Welfare Minister lalrinpuii chuan thusawiin, pian phunga rualbanlo, vohbikte puala ni bik a hmanpui thei chu lawmawm a tih thu a sawi a. SELCO Foundation leh Mizoram sawrkar thawhhona chu ropui a tih thu sawiin, technology avanga hmasawnna hmuh theih khawpa lang chu chhuanawm hle a a hriat thu a sawi a.

Minister chuan eng hmasawnna pawh, huapzau lo chu a khingbai tih sawiin, Sawrkar pawhin, vantlang hmunte chu rualbanlote pawh awlsam zawka an chet ve theihna tura a ruahman zel thu a sawi a. India ram pum huap pawha infiamna lamah te pawh Mizoram aiawh rualbanlo ten lawmman an la theite chu chhuanawm a tih thu tarlangin, Vohbikte chu, theihtawp an chhuah phawt chuan eng kawngah pawh sang tak an thleng thei tih inhre reng turin a chah a. Hlim taka an pual Ni bik chu hmang turin duhsakna a hlan nghal bawk a ni.

Khualzahawm Vanlaldiki Sailo pawhin thusawiin, Vohbikte chu khawtlang tana mi tangkai ni tura inbuatsaih turin a chah a. Mahni inhmu hniam ngai reng reng lo tura fuihin, Sawrkar, kohhran leh khawtlang chu an lama tang tlat leh an hmasawnna tura theihtawp chhuahpui turin an inhuam tih hre reng turin a chah nghal bawk a ni.

Ko Vawiina International Day of Persons with Disability hmanna inkhawm hi Pu Lalnunhlua, Addl. Secy, Social Welfare, Women&Child Development chuan kaihruaiin, kalkhawmte lawmna thu a sawi a. Pi Lalkhawngaihi Renthlei, Asst. Director, CEO, SMPD, Directorate of Ayoush chuan thu a sawi a. SELCO lam atangin presentation ngaihthlak a ni a. Hemi zawh hian Pi Sarju Moirangthem, Officer I/C, NILD, Regional Centre chuan lawmthu sawiin hun hi a khar a ni.

He hun hi Social welfare and women and child Development Additional Secretary Lalnunhlua chuan a kaihruai a. He hun hi chawhma dar 11:00 khan tan niin zing lamah khan hemi ni denchhen khan Rally neih a ni bawk a ni. Kuminah hian United Nations chuan thupui theme bik ruatin chu chu – Rualbanlo te huapzo khawtlang hmasawnna tih a ni a. He program hi Social Welfare department bakah SELCO, ALYMCO, ZEP, NIELD, Directorate of AYUSH leh Persons with Disabilities lama NGO thawktu ten en tangho a buatsaih a ni.

Khuallian chuan vohbik te tan sorkar chuan hmasawnna tur hmachhawp a kalpui mek thu te leh vohbik te chu ngaih pawimawh annih zia a sawi. Khualzahawm Pu Diki chuan Mizoram Vohbikte dinhmun hmasawn mek leh hmabaka sorkar leh tlawmngai pawl hmalakna te ngaihven a chhawr tangkai turin kalkhawm te leh rualbanlo te a sawm bawk a ni.

He international day hi official function program chawhma lamah hun hman niin, chawhnu lamah chuan Rualbanlo school leh pawl hrang hrang ten an thiam thil hmuhnawm tak tak an entir a, rualban lo te hi he hun hian mi 500 chuang an kal khawm thei a ni. Mizorama zaithiam lar bik BOG Young Fella J Lalrosanga, Mary Dawngi, Lilac Mabiaki Oachuau DJ Nicky te chuan kalkhawm te an tihlim hle bawk

A vawi khat nan he dayah hian NGO te partner Agencies te kaltlangin Exhibition Stall neih a ni a, Pwd entrepreneurs ten an thil siam chhuah leh service siam te an pholang . Tin, AYUSH ten free clinic an buatsaih bawk.