Mamit bialtu MLA-in St Francis De Sales School, Lengpui building thar hawng

Aizawl | Dec 2, 2025: St Francis De Sales School, Lengpui khuaa ami chu a building thar hawnna leh School blessing ceremony hun buatsaih a ni. He hun hi Mamit Constituency MLA Er H Lalzirliana'n khuallian niin hun a hman pui a, building thar hi a hawng a ni.

He hun hi St Francis De School, Lengpui Headmaster Rev Fr Athikho Isaac, chuan kaihruaiin, Inauguration Ceremony hi Rev. Father Dr. Sabu Franci, MSFS Provincial of Guwahati chuan neiin, Blessing Cermony chu Most. Rev. Stephen Rotluanga, Holy Cross, DD, Bishop of Aizawl chuan a nei a, school tan malsawm tawngtaina a nei nghal bawk a ni.

Khuallian chuan thusawiin, Zirna hi kan ram leh hnam tan a pawimawh ber a, chu mi atana Catholic kohhran in an thawhhlawk dan leh kan ram tana zirna school tha tak tak hun rei tak ata alo kalpui tawh chu a ropui tak zet a ni a ti. Tin, Zirlai kalkhawmte chu fuihin Artificial Intelligent khawvelah kan awm tawh a, Competition sang tak hnuaiah zirlaite chu Dream tha tak nei chunga kal turin a chah a ni. Kan hmalam hunah kan nih tum leh hlawhtlinna kan chan theihna atan a man kan pek hmasak a ngai a. Hlawhtlinna chu aman pe sang apiangte chan tur a ni tiiin zirlaite a fuih a ni. Zirlaite chu Mizo hnam kan nihna ah chiang a, ram leh hnam tana mi tangkai tak nih tum theuh turin a chah bawk a ni.

St Francis of De Sales School, Lengpui hi kum 2017 atang khan kalpui tan a ni a. Tunah hian LKG atanga Class 10 thleng zirna kalpui mek a ni a. Thawktu Mi 20 awmin, Zirlai 320 an awm mek a ni.