EFCI Mizoram Region Inkhawmpui nei, kum 2025 - 2027 chhunga hruaitu tur thlang

Aizawl | Dec 2, 2025: Evangelical Free Church of India (EFCI) Mizoram Regional Headquarters huaihawtin November 28 - 30, 2025 chhung khan Vairengte Chhimveng Biak In (Kolasib Presbytery) ah Regional Joint Conference vawikhatna neih a ni. Inkhawmpui thupui atan 'Inpumkhatna' (Johana 17:11) hman niin, EFCI General Headquarters, Shillong ațangin President Rev Simon L Darngawn leh Secretary Rev C Kawldinglien Joute ten an hmanpui a, Pathian thu sawina bâkah kohhran hruaitute tan EFCI Dân Bu chhut thar (2025 Edition) Inhrilhhriatna Seminar neih a ni bawk a ni.

He Joint Conference chhung hian Regional Puipa Committee, Regional Kristian Hmeichhe Pawl leh Regional Kristian Țhalai Pawl te'n rorelna leh kum 2025-2027 chhung atan hruaitu thar thlanna an nei a. Regional Hmeichhe Pawl Chairperson atan Pi J. Elizabeth-i (Suangpuilawn, Khawlian Presbytery) leh Secretary atan Pi F. Lalnunziri (Lunglei Presbytery) te thlan an ni a; Regional KȚP Chairman atan Upa Zadinliana (Saiphai, Kolasib Presbytery) leh Secretary atan Pu Stephan Lalrohlua (Aizawl Presbytery) te thlan an ni bawk a ni. Hruaitu thlan tharte hi Pathianni zan inkhawmnaah Rev. Jessai L. Neitham, Regional Secretary in nemnghehna leh hlanna a nei.

Zaipawl pasarih - Aizawl, Kolasib leh Sakawrdai Presbytery Choir-te, Vairengte Pastor Bial Zaipawl, Khawlian leh Zemabawk Pavalai Choir-te leh Aizawl EFCI Choir (Ramhlun Venglai) ten zaiah rawngbawlna an neih bawk a ni.

Thurel langsâr zingah, (1) Regional Joint Conference (Puipa, Hmeichhe Pawl leh KȚP) hi kum khat danah Biennial anga neih zawm zel tur; (2) Council of Churches in Mizoram (CCM) hmun leh hmâng atanah Special Budget a duan pek tur; (3) Kum 2026 EFCI Mizoram Region Year Plan thlîrna leh pawmna, teh a tel a ni.

Tunah hian EFCI Mizoram Region huamchhungah Presbytery panga (5) - Aizawl, Khawlian, Kolasib, Lunglei leh Sakawrdai te awm mekin, kum 2024 census dungzuiin Tualchhung Kohhran (Biak In) 48, Kohhran Member 13451, Active Pastor 22 leh Kohhran Upa 195 an awm mêk a ni.