LUNGNGAIHNA RUAMAH PAWH VANRAM BEISEI TUR I NEI

_Thlirna Thlak Danglam_

By Rick Warren 

— December 2, 2025

“Mita hmuh ngai loh, benga hriat ngai loh, Mihring rilrua lut ngai lo, Pathianin a hmangaihtute tan a buatsaih apiangte chu.” 1 Korinth 2:9

Harsatnaah pawh lawmthu sawi rawh, harsatnate chu a ṭhat em vang ni lo vin, Pathian chu a ṭhat em avang zawkin. A chhan chu Fapa, Isua ring apiangte tan vanram min tiam avangin.

Vanram chu engang nge ni ang? Bible chuan, “Mita hmuh ngai loh, benga hriat ngai loh, Mihring rilrua lut ngai lo, Pathianin a hmangaihtute tan a buatsaih apiangte chu.” (1 Korinth 2:9).

Bible chuan vanram ropui tur zia chuan kan suangtuah thiamlo a ni a ti a. Mi ṭhenkhat chuan ngaihdan themhlem tak tak an nei a, an ngaihdan aia nasa zawk a ni dawn a ni.

TV leh film lamah vanram chungchang rawng chi hrang hrang lang lo vin kan hmu ṭhin a. Nimahsela Pathian chu rawng chi hrang hrang mawi tak tak siamtu a ni si a. Chhum zingah angelte anga thla neiin ṭingṭang tumin i ṭhu lo vang, chu chu kei chuan hremhmun a ang ka ti zawk ang.

Khawvelah ringawt pawh hian thil mawi tak tak hi a tam hle a, Pathian siam vek anni - tupui kam te, tlang mawi tak te, ramngaw mawi tak te, pangpar leh ramsa mawi tak tak te pawh. Khawvel hi a kehchhe tawh chung pawhin a la mawi em em zawk a ni!

Sual awm tawh lohna hmun, natna awmtawhlohna hmun, lungngaihna awmtawhlohna leh chhiatna awmtawhlohna hmun chu han ngaihtuah teh le. Pathianin kan tana hmun a buatsaih chu a ngaihtuah pawh kan ngaihtuah thiam lo zawk a ni. 

Kan fapa Matthew a thih khan, kan nupa min interview a, chuta vanram leh beiseina ka sawi dan chu:

Tuarpuina lehkhathawn singthum vel kan dawng a. Chuta ka rilru khawihtu chu Matthew-a chuan Isua Krista min kawhhmuh a, amah avangin vanramah ka kal dawn tih chu a ni. Mi pakhat chuan heti hian a sawi, “Lalpa ka hre ta. I fapa avangin Isua nen inlaichinna kan nei.”

Pathian khawngaihna huan chungchang ka ziak ka hrechhuak uar uar mai, thing ṭha lo pawhin rah a chhuah tho a ni. Chu chu ka fapa chungchangah pawh a dik a ni.

"I fapa in danglamna a thlen avangin i lawm a ni maw?" min ti maithei. A dikna chen pawh a awm. Mahse ka fapa kha lo let leh se tih ka la duh reng a ni. Nimahsela Davida, fapa sun ang deuh khan ka rilru a awm a ni 2 Samuela 12:23, “A hnênah keimah hi ka kal ang a, nimahsela ani zawng ka hnenah a lo kir leh tawh lo vang.”

Chu chu vanram kan beisei dan tur a ni — hun thim ber kan hmachhawn lai pawhin chu chuan min tichak ṭhin a ni. Thil hlim a awm reng reng chuan, eng a awm tihna a ni. Thihna hlim kan daikai lai pawha kan en tur chu, thihna hlim hlauhawm tak chu en kan a, eng awm chu en tur a ni. Eng chu i en chuan i kal zel thei ang. 

Vawiinah hian eng harsatna ruam nge i zawh mek, kal zel la, eng en rawh. Vanram chu a bul lawkah khan a awm tawh a ni.

Ngaihtuah zui atan

* Vawiina harsatna ruam i zawh mek lai hian, Pathian ṭhat zia leh a thutiam rintlak zia i hmu em?

* Leilung mawi tak tak leh midanga thil mawi tak tak i hmuh hian, vanram mawi tur zia a hriatnawn tir che a ni. Chu chuan i nunah thlirdan danglam engtinnge a neih tir che?

* Vawiinah hian tu hnenah nge vanram beiseina chu i sawi ang?

*I thih hnua i kalna turah i chiang tawk em?*

Mi tam tak chuan thih an hlau va, a chhan chu an thih hnua an kalna tur an chian loh vang a ni. Thih hlauhna lak ata min chhandam turin Isua a lokal a ni.

Bible in mi zawng zawng kan sual vek a, sual man chu thihna a ni a ti. Nimahsela Pathianin a hmangaih em avang chein Fapa Isua a rawn tir a, i sual man bat tlak turin, Pathian chhungkuaa i awm theihnan leh thih hlauhna ata chhanchhuak tur che in.

Pathian chhungkua i tel ve duh chuan hetiang hian ṭawngṭai rawh: “Lalpa duhtak, ka thih hnuah chuan, ka chanchin zawng zawng hi i hnenah ka puang dawn si a. Ka ngai pawimawh ṭhin lo che tih ka puang a, i lakah ka sualna a tam em em a, ka duh dan danin ka nung ṭhin a. Ka nun thlak ka duh a. Ka sualna te sim a, i lam lo hawi ka duh a ni.

“Isua min pek avangin ka lawm e. Ka sual man ka tuar a ngai tawh lo. I ngaihdamna hi ka phu lo va. I khawngaihna avang chauha chhandam ka ni tih ka inhria e.

“Ka sualna zawng zawng i phurh vek avangin Isu ka lawm e. Vanramah nangmah avangin min pawm ve ta, ka sualna leh thih ka hlauhna lak ata min chhandam turin ka dil che a. Isu, nang ka ring che a. I thutiam ang ngeiin chawplehchilhin, min chhandamin min pawm dawn a ni tih ka ring e. Isua hmingin ka dil a che. Amen.”

Isua i pawm a, i ṭawngṭai anih chuan, hetah hian min rawn email ang che Rick@PastorRick.com. Isua nena zinkawng i zawh theihnan thil pawimawh hrang hrang a thlawnin ka pe dawn che a ni.

*[Lettu: Sangpuia]*