"Hmar hnam hi Zo hnahthlak hnamte zinga a lian ber pawl in ni a, Mizo hnam khaidingtu zinga mi in ni." ~ CM Lalduhoma

"A khaipa leh a lian ber pawl in nih ang ngeiin, u chan lo chang zel ula, zofate inpumkhatna lo ngaipawimawh ula, inpumkhatna fatuah lo tang zel ang che u," ~ CM Lalduhoma

Saipum | December 5, 2025: Saipuma Rev Dr. HS Thanglung Hall-ah Vawiin khan Hmar Students Association ten inkhawmpui lian vawi 60-na leh Sikpui Ruoi lawmna an nei a. Chief Minister Lalduhoma khuallian niin, Speaker Lalbiakzama leh IPR&PS Minister B Lalchhanzova ten an tawiawm.

Thusawiin Chief Minister chuan, "HPC te khan genuine problem an nei a, non-violence in kawng an zawh a ni, Mizoram sorkarin tharum thawhin police te a vuak tir a, na takin hliam te an tuar a, inah te tlangval an awm ngam tak loh avangin silai an keng ta a, khata tang khan silai kenga zalenna sualna a lo intan ta a. A tir atanga kan indawnsawn dan dik loh vang a ni," a ti a.

Hmar Students Association hi zofaten zirlai pawl kan neih zinga a upa pawl a ni a, kum 1939 a din a ni. A din tirh ata vawiin thlengin Hmar thalai rualte, a bikin zirlaite tan hna a thawk tha a. Hnam zia humhalhna lamah te, inpumkhatna leh khawtlang hmasawnna kawngahte a thawhhlawk hle a ni.

Hmar hnam hi Zo hnahthlak hnamte zinga a lian ber pawl in ni a, Mizo hnam khaidingtu zinga mi in ni. Tun hmaa Hmar mipuite sulhnu hi Mizoram laili velah hmuh tur a tam hle a. Sikpui Lungphun hlui pawh hi hmun eng emaw zatah hmuh theihin a awm. A khaipa leh a lian ber pawl in nih ang ngeiin, u chan lo chang zel ula, zofate inpumkhatna lo ngaipawimawh ula, inpumkhatna fatuah lo tang zel ang che u, a ti.

Zirlai naupangte chu an kalna kawng tur thlang fel a, chu kawnga mi hlawhtling ni tura taihmak chhuah turin a fuih a. Ramin resources a neih hlu ber chu a chhunga cheng mihringte hi kan ni a. Nang leh kei hi kan ram leh hnam hmasawn zelna atana mawhphurtu dik tak chu kan ni, a ti.

Sorkarin thalaite tana hma a lakna langsar zual tarlangin, kum hnih chhung lekin hnaruak tam tak kan hnawh khat a, hna thar kan siam a, MPSC Calendar hi a khat hle reng mai a ni. Hna kan lakna reng reng hi dik leh thianghlim takin kan kalpui zel a. Tu tan mah sawipuitu hran neih a ngai lo, an thiamna kha anmahni sawipuitu tha ber a ni.

Zirna sang zawk lama hma kan sawn theih nan Mizoram Engineering College, Pukpui chu kum thar atanga class tantir kan tum a. Mizoram State University din turin chak takin kan kal a. Kum rei tak lo chawlhsan tawh NIT Mizoram campus harsatna kan chin felsak bawk.

Sorkar hna thawh tum lo, mahni kea din tumte tan Bana Kaih Scheme kan kalpui leh a. He scheme hmanga hmalak theih hi a tam hle. Duhsak bik nei lovin an project that dana tehin a pung awm lo loan kan pe a, an guarantor-ah sorkar kan tang bawk.

Lo neia eizawngte tan thlai thar pangaah support price tha tak kan pe leh a. Kuminah pawh khaw tam tak chuan support price zarah sum leh pai an lalut hnem em em a. A rate hre sain thlai kan ching thei ta a. Kan thawhchhuah tam leh kan hlawk a ni mai.

Chutianga kan ram hi a kal tak avangin thalai taima leh tumruhte tan hlawhtlin theihna remchang a tam em em ni, a ti.

Ruihhlo leh nun dan tha lo laka fihlim a tulzia leh ruihhlo dona kawnga sorkar hmalaknate, ruihhlo ngaite chhanchhuak tura Hulhhliap Short Stay kalpui a nih dan te pawh a tarlang a. HSA member te chu ruihhlo laka fihlim turin a ngen a. A invenna tha ber chu 'tihchhin loh' a nih thu a chah a ni.

Sikpui Roui leh inkhawmpui lian hmang tura an sawm avangin lawmthu a sawi a, an kal zelna turah duhsakna a hlan a ni.

Chief Minister hian Sikpui Lung a hawng a, Inkhawmpui Souvenir a tlangzarh bawk.

Speaker Lalbiakzama, Minister B Lalchhanzova, Manipur atangin MLA - Paolienlal Haokip leh Ngursanglur Sanate leh Manipur atanga rawn tel MLA dangte pawhin thu an sawi a. HSA President Lalrosang F Tuollai chuan kal khawmte lawmna a sawi a, hnam lam leh zaite entir a nih bakab HSA lifetime Achievement Award semna neih a ni bawk.

Hmar Students Association hi kum 1939-a Imphala din a ni a. General Headquarters hi Rengkai, Tuithaphaiah a awm a, state hrang hrangah Joint Headquarters 13 leh Branch paruk awmin, unit thahnem tak an nei a ni. Kumin inkhawmpui hi December ni 3 zan atang khan an hmang tan a, vawiin hi a khar ni a ni.