Lunglei-ah 'Folk Dance & Music Festival 2025' hmang; "hnam upa leh fing apiangin mahni hnam tihphung leh ziarang an vawng ṭhain an roh ṭhin," ~ C Lalsawivunga

Lunglei | Nov 28, 2025: C Ṭhuamluaia Mual, Lungleiah vawiin khan Art & Culture (A&C) Department Lunglei, Mizo Cultural Artistes' Association (MCAA) Sub-Headquarters Lunglei, Mizoram Independent School Association (MISA) Sub-Headquarters Lunglei leh Mizoram Teachers' Federation (MTF) District Headquarters Lunglei te ṭang ho huaihawtin hnam lam leh rimawi kutpui, 'Folk Dance & Music Festival 2025' buatsaih a ni a. Mizoram sawrkara Art & Culture Minister C Lalsawivunga chuan Khuallian niin a hmanpui.

Khuallian C Lalsawivunga chuan Lungleia Hnam Lam leh Rimawi Kut buatsaih a ni leh sikul hrang hrang zirlaite leh MCAA hnuaia club hrang hrangte'n hnam lam leh rimawi hmanga Mizote inpumkhatna tur leh hnam ziarang an entir tur chu lawmawm a tih thu sawiin, a buatsaihtute fakawm a tih thu a sawi a. Mahni hnam chin dan hlamchhiah leh kalsan chu hnam ral zia a nih thu sawiin, hnam upa leh fing apiangin mahni hnam tihphung leh ziarang an vawng ṭhain an roh ṭhin tih a sawi a. Mizo hnam ziarang leh thil hlute chu ngaih hlut leh chawi lar zel a pawimawh thu a sawi.

C Lalsawivunga chuan zirtirtute chu hun bik leh kut ni vang thla chauh lovah pawh zirlai naupangte thinlunga hnam rilru leh ziarang tuh a, hnam lam leh rimawi hrang hrang a tam thei ang ber zirtir a, an ṭhan hnan theih nan ṭan la zel turin a chah a. Kan hnam lam leh rimawite kan hlut thiam a, kan vawn ṭhat chuan kum tam tak a liam hnuah pawh kan hnam hi khawvelah pho chhuahin a awm reng dawn a ni tiin, tha thlah lova ṭan la zel turin a sawm a. Hlawhtling turin rinawmna, dikna, taimakna leh thawh rimna a pawimawh thu sawiin, Mizo hnam ze mawi ropui tak, "aia upa zah" chu nun chhuahpui a, mi dangte tan malsawmna leh ṭanpuitu ni tura tlawmngaihna nun chawi vul zel turin kal khawmte a chah a. Folk Dance & Music Festival buatsaih chu Lunglei leh a chhehvel tan culture lama rahbi pawimawh tak a nih a beisei thu sawiin, hlim leh hlawk taka hmang tur leh an ni tin nuna Zo nun ze mawi lan chhuahtir zel turin Kut chhimtute duhsakna a hlan.

Organising Committee Chairman Lalmuanpuia (Senior Research Officer, A&C Lunglei) chuan hun kaihruaiin, inlawmna thu a sawi a. MTF District Hqrs Lunglei Assistant Secretary C Lalbiakenga'n hunserh hmangin, Organising Committee Secretary Zonunmawia (Secretary, MCAA) chuan report a pe a. Govt High School, Venghlun leh Govt Middle School, Theiriat te'n Cheraw kanin, Govt Primary School-II, Electric Veng te'n Tlanglam an entir a. F. LKM School (Khuallam); Lawitlang English School leh Stairway Higher Academy (Chheihlam); Chawngfianga Memorial School (Cheraw — Buh za aih); Stairway HSS, Learners Foundation School leh Holy Faith School (Chawnglaizawn); Govt Middle School, Theiriat leh KT Higher Secondary School (Sarlamkai) te an lam bawk.

Rosalind K. Lalramhluni (Bethesda HSS), V. Lalrempuii (President, MCAA), Pc. Malsawmzuali (Graceland English School) leh Lalropuia Punte (MCAA) te hnen aṭangin mal zai ngaihthlak niin, One Heart Academy aṭangin ṭhiang zai ngaihthlak a ni a. IMFA Folk Music Instructor Zothanmawia'n Zo rimawi tumin, Holy Faith School aṭangin phenglawng tum ngaihthlak a ni a. Rowing Higher Secondary School te'n hlado chhama lemchan entirin, One Heart Academy te'n lemchan tawi an chang a. A tawpah MCAA kaihhruaiin zavaia chai ho a ni bawk.

He hunah hian Minister ṭawiawmtu Lunglei Municipal Council (LMC) Ward 4-na Councillor R Lalramzauva leh political party hruaitute, A&C leh department hrang hrang official-te, MCAA, MISA leh MTF hruaitu leh member-te, MISA hnuaia sikul 10 leh MTF sikul 3, a zavaiin sikul 13 aṭanga zirlai leh zirtirtu eng emaw zat telin, mi 900 chuang an pung khawm a. Zai, rimawi, lam leh lemchan bakah, hnam thuam, rimawi hmanrua leh hnam thil (bungrua) chi hrang hrangte nen hnam nunphung leh ziarang pho chhuakin, hlung takin hun hman a ni.

Lunglei Folk Dance & Music Festival 2025 Organising Committee chuan Kut hlawhtling taka hman a nih theih nana tha thawhtu hrang hrang - Art & Culture Minister, Art & Culture Department leh MCAA; zirlaite tel phalsaka ruahmanna siampuitu District Education Officer, MTF leh MISA; C. Ṭhuamluaia Mual hmantirtu Lunglei District Football Association; ven himna leh lirthei chet velna lam buaipuitu SP Lunglei leh Traffic Police; medical duty ruahmansaktu Sr CMO; dawhsan hmantirtu PWD Building Division Lunglei; tui hman tur ruahmansaktu PHED; lirthei dahna hmunhma hmantirtu Lunglei Government College; thla laksaktu I&PR, MJA, Zonet JB leh mimal photographer-te; Festival-a tela chanvo ṭha taka hlen chhuaktu sikul, zirtirtu leh zirlai zawng zawng chungah lawm thu an sawi.