Larsap leh Kerela atanga lokal PIB Cochin Press Tour Team-te inkawm

Aizawl | Nov 28, 2025: Sawrkar laipui Ministry of Information & Broadcasting buatsaiha Sawrkar project hrang hrangte zirchiang tura Assam leh Mizoram tlawha rawn zin, PIB Cochin Press Tour Team, member 13 te chuan vawiin khan Larsap General (Dr) Vijay Kumar Singh, PVSM, AVSM, YSM (Retd) chu Raj Bhavan-ah hmuin an kawm.

Larsap General (Dr) Vijay Kumar Singh chuan Kerela atanga lokal Press Tour member-te Mizoram state mawi leh nuam takah a lo lawm thu sawiin, an cham chhunga hun hlimawm tak hmang turin duhsakna a hlan a. Tunhnaia Mizorama hmasawnna project kalpui tlangpuite tarlangin, Km 51.38 a thui Bairabi-Sairang New Railway Line hawn tak chu danglamna thlentu pawimawh tak a nih thu sawiin, hei hian hmuh theihin khualzin a hipa, inkalpawhna leh bungraw phurh a tih awlsam avangin zinna senso leh thil man pawh a tlak hniam phah a ni, a ti a. He railway hi Kaladan Multi-Modal Transit Transport Project (KMMTTP) nena thlunzawm tura ruahman a nih thu leh Km 200 chuang hmabak la awm pawh tluang taka zawhfel a beisei thu a sawi bawk.

Larsap chuan Mizoram chu state ralmuang, khawtlang nun mawi leh entawntlak, ziak leh chhiar thiam zaa za awmna leh ami chengte pawh taima tak tak an nih thu sawiin, mipui tam zawkte eizawnna agriculture niin industry lian nei lo mahse Mizoramin hmalam hun eng tak a nei tih a sawi a. Khualzin hipna lam, leichi tel lo thlai, sawhthing, aieng, hmarcha, ramhmul damdawi, thlai rimtui, mau leh adangahte hmasawn tura theihna nasa tak a neih thu a sawi a. Sawrkar laipui leh State Sawrkarin hmasawnna project pawimawh tak tak an siam mek zel tih sawiin, nakin lawkah chuan Mizoramah hmasawnna ruhrel tam zawk hmuh tur a awm dawn thu a sawi bawk.

Press Tour aiawha thusawitu Pi Dhanya Sanal K, Director (M&C) PIB, Cochin chuan press tour neih chhan tlangpui tarlangin, Sawrkar laipui ngaihpawimawh India hmarchhaka Sawrkar hmalaknate rawn zirchian mai bakah hmarchhak state-te hrechiang tura rawn tlawh an nih thu a sawi a ni.

Press Tour Team-te hian an cham chhunga Mizoram an hmuh dante leh hmasawn zel tura pawimawh nia an hriatte Larsap an sawipui a. Traffic dan tha taka zawm a ni leh mipui khawsak phungte bakah hmeichhiate'n khawtlanga hmun pawimawh tak an chang chu entawntlak an tih thu an sawi bawk.

PIB Cochin Press Tour Team-te hian November ni 26 khan Mizoram lo thlengin Sairang Railway Station leh Mizoram State Museum-te an tlawh a, nimin khan Thenzawla Golf Course & Resort, Breed Development & Conservation Centre for Mithun leh Ginger Farm-te an tlawh a. Vawiin khan 23 Assam Rifles HQ, Aizawl an tlawh bawk a, naktuk hian Kerela panin an let leh ang.

PIB Cochin Press Tour Team hi Dr. Rajeev Lourembam, Head of Office, PIB Aizawl chuan a tawiawm a ni.