IAF kutah Lengpui airport awm se a him ang em? IAF hnuaiah International Airport kawng a bo!

MZU Discussion Forum

Date: 21.11.2025

Topic: Lengpui Airport midang hnena hlan tum bihchianna

Lengpui Airport Forum

Lengpui Airport hi Mizote tan chhuahka pawimawh tak, a lova kan awm theih lohna hial a ni ta. He Airport hi India rama commercial airport 153 zinga State enkawl awmchhun tih thin a ni a, Aizawl aṭanga km 35 a hla a awm a ni. Mizoram sorkâr chuan Lengpui airport hi Central sorkâr puihnain Rs. 97 crore sengin a siam a. He hna hi Mizoram PWD chuan 1995 December aṭanga ṭanin kumhnih chhȗngin 1998-ah an zova. December ni 12,1998-ah hawn a ni. He airport runway hi metre 2500 (8200 ft) a sei a ni.

India rama Commercial airport dinhmun:

India sorkâr chuan International Airports Authority of India(IAAI) 1972 kumin International airport enkawl tura a din leh National Airports Authority of India (NAAI) 1986 kuma India ramchhung airports enkawl tura a din te chu Acts of Parliament 1994 hmanga finkawmin Airports Authority of India (AAI) chu 1.4.1995 ah din a lo ni ta a. AAI dinchhan chu India rama airport siam, enkawl, tihchangtlun leh tihhmasawn a ni. India ramah hian airport 400 chuang a awm a, chung zinga 153 te chu Commercial Airport an ni a. Commercial airport zingah hian hman loh 28 lai a awm avangin tuna commercial airport hman lai chu 125 chauh an ni. Heng airport 153 zingah hian airport 117 te chu AAI enkawl, 16 te chu private, 30 te chu Air Force airport AAI-in Civilian tana a hawh sak Civil enclaves an tih te an ni. (annexure-II).

Ram alo changkanin thlawhnaa zin an pung zel a, airport mamawhna a san zel avangin Company te chu commercial airport siam phalsak an ni a. Cochin, Hyderabad, Bangalore-ah Company intelkhawm ten airport thâr an lo din a ni. Airport tihchangtlun leh tihhmasawn zel ṭulna avangin Delhi leh Mumbai airport te pawh 2006 khan Public Private Partnership (PPP) mode in private hnenah hlan an ni.

Pic | flightsim.to

Lengpui Airport hloh nasa:

Airport enkawl hi a hautak a, state dangte te chuan anmahni enkawl chiah an ngaih loh avangin AAI kutah an dah mai a, chuvangin, harsatna an tawk ve lo. A tir phat aṭangin Lengpui airport hian a hloh nasa a, chuvangin state sorkâr hmasa te khan AAI hnena hlan dan tur kawng hi an lo zawng fo tawh ṭhin a, tun thlengin a la hlawhtling lo a ni. Mizoram budget kan en chuan tun kum 8 kalta chhungin Civil aviation chuan cheng vbch 132.44 an hloh a. (annexure-I)

Nikum December 2023-ah ZPM sorkâr a lo piang a, Lengpui airport hi a ngai pawimawh hle a. Mizoram sorkâr chuan ni 100 chhunga hmalakna tur zingah Lengpui airport AAI/private a hlan chu a telh a ni. Mizoram sorkâr chuan Working Committee to look into Maintenance and management of Lengpui Airport ni 1.02.2024 aṭang thawk ṭan turin a din a. He committee thiltum chu Lengpui airport AAI leh midang hnena hlan dan tur ngaihtuah a ni. Report of Working Committee on Lengpui Airport 2024 tarlan danin he Committee hian Lengpui airport chu Mizoram sorkâr enkawlzui nge private, AAI leh IAF hnena hlan ṭha em tih zirchianna a nei a.Private hnena hlan chu ṭha tilovin AAI hnen emaw IAF hnena hlan chungchang hi an thlȗr bing ta a ni.

AAI nena indawrna:

Working Committee chuan Sorkâr kalta hunchhȗnga draft memorandum June 2022 a AAI buatsaih chu an zirchiang hmasa a, an terms eng emaw zat hi pawm harsa an ti a ni awm e. Clause pawm harsa an tih deuh deuh te chu:

a) AAI hnena Lengpui airport hlan a nih chuan security chu Mizoram sorkar-in a tum chhunzawm zêl tur a ni;

b) AAI in ram a mamawh belh chuan Mizoram sorkâr-in a ngaihtuah sak ang;

c) AAI chuan mi dang hnenah hlan phalna a nei tur a ni;

d) Fire service Mizoram sorkar-in an tum zel ang;

Working Committee te hian AAI Executive Director leh a hote video conference hmanga an biak leh AAI Chairman hnenah lehkha hmanga thu an thlen bak chu AAI hotute nen inbiakna an neih tarlan a ni lo.

IAF nena indawrna:

He Committee hi a tira terms of reference-ah IAF nena indawrna hi a tello chungin an mahni bengvâr thilthua dawr ve mai anni tih an report chuan a târlang. RTI chhannaa a lan dan chuan Working Committeee te leh IAF hotute hian vawikhat chauh meeting an nei tih tarlan a ni. June 11,2024 meeting-ah ruahmanna tlangpui an pawmdun lo târlang ila.

IAF leh Mizoram ten area an insem anga, ATC, Runway leh a lehlam zawng hi IAF in an chang ang a, an chan tur ram chu lease system emaw outright purchase a pek a ni ang (The IAF delegates affirm that IAF is willing to take over the Lengpui Airport from Govt. Of Mizoram on either outright purchase or on lease basis which is convenient to the Govt. Of Mizoram). Ram mamawh belh an neih chuan IAF in a man a tum ang. Runway leh ATC tel lovin a bak zawng chu Mizoram sorkâr kutah a awm zui ang. A enkawlna senso chu sorkâr-in a tum ang a, a hlawkna pawh sorkâr sum bawmah a lut ang. Terminal building te, security te, thlawhna ticket hralhte, Non aeronautics Service zawng zawng sorkar kutah a awm ang.

Cabinet Meeting October 16, 2024 nia neih chuan IAF hnena Lengpui airport hralh chu pawmin AAI nena indawrna pawh chhunzawm tawh lo turin a rel a. Mizoram sorkâr chuan 20.11.2024 ah Working Committee a dinthâr leh a, thla thum chhunga Indian airforce hnena Lengpui airport hlan anih theih nan Memorandum of agreement(MOU) peihfel turin a ti.

Union Home Minister Pu Amit Shah, March ni 15, 2025 a Aizawl a lo kal khan NGO Co-ordination hruaitute hnenah Lengpui airport chu AAI in thla thum chhȗnga tihchangtlun dan tur ruahmanna a siam anga thla ruk chhȗngin hna ṭan anih tur thu a lo hrilh a.April ni 15, 2025 niin Union Home Secretary pawhin New Delhi-a an inhmuhnaah NGO Co-ordination hruaitute hnenah Mizoram Chief Secretary hnenah Lengpui airport chu AAI hnena hlan anih theihnan proposal thawn thuai turin a hrilh a. AAI chuan April ni 29,2025 khan Aizawl-ah team lian tak ED hovin a rawn tir a, Lengpui airport tihchangtlun dan tur an rawn thlithlai a, CM leh sorkar hotute an hmu a, thu mumal an sawipui lo tih hriat a ni. Mizoram sorkar-in Lengpui airport AAI hnena hlan tura bawhzuina a awm em tih RTI hmanga kan zawhna chu awmze neia bawhzuina a la awm lo tih an chhanna atangin a hriat theih. Hetih mek lai hian Mizoram sorkar chuan Lengpui airport hmarlam 1.5 km. a hlaah ram zau tak 47 lacs sq ft IAF tân ni 24.7.2025 khan mi 7 hnen aṭangin a lak sak a.A tira an thil tum IAF tana ram pek leh Lengpui Airport IAF hnena hralh hi an la kalsan lo tih a tilang chiang hlein a lang.

IAF leh Mizoram sorkar ruahmanna bihchianna:

Phurrit chhawk lo: Runway repair nan pawisa sen ngai lo pawh nise kan state sorkar chuan terminal building enkawl, security, Aviation staff hlawh leh adt la pek zel a ngai dawn a. Working Committee report a tarlan a nih danin 2024 - 25 chhungin pawisa Rs. 15.75 crore hmuh an beisei laiin a hmanna operational expenditure Rs. 12.81 ni tur anga chhut a ni a. Operational profit chu Rs. 2.94 crore a ni. Manipur-ah inremna awmse chuan user development fee cheng vbch 5 velin a tla hniam anga Rs 2 crore help lohin kan hloh dawn a ni. AAI enkawl Imphal airport building upgrade nan chêng vbch 600 an seng dawn a. Lengpui airport terminal building sakthat nan, aerobride, Parking Bay leh adangte siamthat nân cheng vbch 500 chu kan mamawh ngei ang. Heng mamawh hi IAF min tum loh chuan tunge min tumsak ang. Airport atangin hlawkna lo la awm pawh nise engtham ani dawn si lo. He ruahmanna hian kan phurrit a chhawk dawn miah lo tihna a nih chu.

NMP: Union Budget 2021 - 22 chuan National Monetization Pipeline (NMP) infrastructure-relkawng, airport, seaport leh adt pawisa mamawh hmuh nan nan leh phuhruk nan he scheme hi a rawn tichhuak a. He scheme hian airport ram awmsa (brownfield airport) te kha pawisa a chantirin (amortise) mimal hnenah kum bithliah atan an hralh a. Airport 25 annex -III tarlan ami te hi NMP hmanga privatise tum an ni. Pawisa mamawh vanga IAF hnena hralh ai chuan kan sorkar hian NMP scheme hmang Lengpui airport aṭanga fund raise dan ngaihtuahna hman te hi a tha lawm ni?. Kan hydel project hrang hrang hralh kan tum pawh hi NMP scheme hmanga hralh dan ngaihtuah ava ṭha ve.

State dangten Civil enclaves duh tawh lo:

Kan sawi tawh angin India rama commercial airport 153 zinga 30 chu Civilian ten an mamawh avangin AAI chuan civil tan IAF hnen aṭangin a hawh sak a (annexure II) . Airforce airport awmsa runway, ATC, ILS te an ṭawm a, terminal building leh operational expenses- security te AAI tum vek a ni. State sorkar-in pawisa chengkhat mah a sen a ngai lo. Tuna Mizoram sorkar ruahmannaah chuan Civil enclaves dang ang lovin pawisa tam tak kan sen a la ngai dawn. Civil enclaves dangte aiin a tha lo zawk tihna a nih chu. Civil enclaves-ah hian civil mite an chep êm êm a, fighter airport bikah phei chuan an chep zual a. Airforce ten security chauh an ngaihpawimawh ṭhin avangin civil enclaves te hian hma an sawn thei lo a ni. Heng airport te hi a ram miten an duhkhawp lo êm êm a, an awmna state te hian chhuahsana airport thâr siam an duh vek a ni. Dabolim, Goa, Begumpet Hyderbad, HAL Banglore airport, INS Garuda, Willingdon island, Kochi airport te chu chhuahsanin airport thar an siam tawh a. Kumbhigram, Silchar, Pune airport te pawh chhuahsan an tum mek.

India airforce airport thatlohna dangte:

I) Air ambulance: AAI enkawl airport-ah chuan air ambulance hman phalna hi airport operator in a pe thei. IAF airport-ah chuan IAF hqrs, Delhi aṭang chauhin phalna lak tur a ni. IAF te hian mipuite harsatna hi an ngaipawimawh lo hle a. Medical emergency vanga helicopter hmanga damlo Aizawl aṭanga Shillong an phurh thlak ṭhin te pawh Airforce helipad, Upper Shillong-ah IAF thuneituten ṭumtir an phal ṭhin lo tih hriat a ni.

II) Flight allotment: Airline company-ten flight schedule duang ṭhin mahse a thuneitu tak chu airport operator te an ni a, DGCA-aiin anmahni airport-ah chuan an thu zawk tihna a nih chu. Pune airport khu fighter base airport a ni a, a hun ṭhalai(chhunlai) zawng airforce in an chang deuh vek a, civil mite zan, zing leh tlai an pek thin avangin civilian te an chep hle thin. Lengpui aiport pawh IAF hnêna hlan anih chuan civilian te kan chep viau ang.

III) Air Drill: Fighter airport-ah hian air drill an nei fo ṭhin a, chutiang an neih chuan van boruak an khar a, flight cancel leh tihtlai a ni fo ṭhin a, a tuartu chu civilian flight a ni thin. Airport-a ṭum tur leh thlawhchhuak chauhin an tuar lovanga, a chhehvel airport te pawhin an tuar thei ang. Tezpur airport khu fighter airport a ni. Air drill an neihin airport an khâr mai bakah airspace zau tak an khâr ṭhin a, chu chuan Guwahati-Dimapur flight te pawh via Silchar-Imphal aṭanga hel kual ngaihchang a awm thin. Company tan hlohna nasa tak a ni.

IV) Runway repair: Tezpur airport runway siamṭhat nan kum khat leh a chanve hman an tum a, airport an khâr nghal a. Trivandrum airport hi Adani enkawl a ni a, runway siamṭhat nan thla hnih leh a chanve chauh an hmang thung a, flight tlemte an titawp tih loh a dangte chu a ngaiin an service chhunzawm zel a ni. Lengpui airport pawh IAF in an lak chuan runway siamṭhat hunchhung zawng chu Tezpur-a an tih ang hian airport an khar ngei a rinawm.

V) Noise pollution: Dobolim, Goa, hi Indian Navy ta civil enclave a ni. Indo thlawhna station a ni. Zanah fighter chi hrang hrang leh helicopter ten air drill an neih ṭhin avangin thlawhna ri a bengchheng em em a, a bula hnaia miten an ning hle ṭhin. Lengpui airport pawh IAF kutah hlan a nih chuan fighter airport a nih ngei a rinawm a, air drill an nei fo ang. Fighter thlawhna ri chu Lengpui mai ni lovin a chhehvel Aizawl thleng thlengin a ninawm pha dawn a ni. Zanah mutmu pawh tuah theih loh chang a tam dawn a ni.

VI) Civil nena inpawlh: Civil mite leh sipai te awmpawlh ṭhat lohzia chu a hrechiang ber tu kan ni awm e. Assam Rifles(AR) ground pawh civil mite hman an phal ṭhin lo va ni. Intih thiamloh nikhuain silai chelek mai an hnial lo va. Laitkor, Shillong IAF hmunah pawh airforce ten an ram kaltlang an phalloh avngin Trespassers will be shot tiin an ram hungna bangah an tar. IAF leh Lengpui mite an inpawlh chuan civilian ten harsatna an tawk fo ang.

VII) Airport hmasawn thei lo: Civil enclave hrang hrangah hmasawnna airforce te hian an ngaih thah thin avangin an airport a thang thei thin lo. Pune, Bagdogra airport ah te hmun an pek theih loh avangin Terminal building thâr siam tumna pawh nasa taka tihkhawtlai aniin airport thâr siam hial tumna a awm.

Thalaite tan beisei bo:

Mizoram hi India ram pum average aiin thalaite zingah unemployment rate a sang a. Tunah hian zirlai tam tak ten kumtin class XII, graduate leh post graduate an pass a. Sorkâr hnain a daih loh avangin hna avang em em tawh ani.Mizoram hi tlangram a nih avngin zin mite a hip em em a ni. Mizoram Luhna kawngkhar airport tha tak kan neih chuan khualzin kan hip nasa lezual ang a, tourist tam tak an lokal anga, thalai tam takin eizawnna an hmuh phah dawn a ni. IAF hnêna Lengpui airport kan pêk chuan tourist ten luhkawngah harsatna an tawk ang a, khualzin kan hip thei dawn lo a ni. Tourism in a tuar ang a, kan Thalai tam tak ten eizawnna an hmuh theihloh phah dawn a ni.

International airport mamawh:

Kan ṭhenawm airport - Guwahati, Imphal leh Agartala te chu AAI enkawl an ni a, International airport atan hlankai an ni tawh. Lengpui airport hi North East-ah chuan International airport ni leh thei hmasa awm ber a ni. Pu Hardeep Singh Puri, Ex - Minister, Civil Aviation chuan Mizoram sorkâr hotute hnênah Lengpui aṭanga International flight destination 5 lo thlang chhuak turin a hrilh an ti. Central sorkâr chuan Lengpui airport hi India leh South East ramte nena inkalpawhna gateway pawimawh tak la ni thei turin an hmutlang hle tih a tilang. Mandalay, Yangoon, Bangkok, Dhaka leh Chittagong flight kan neih hunah chuan kan ṭhenawm ram Bangladesh, Myanmar, Thailand te nen insumdawn tawnna ṭha zawk kan neiin kan thalaite leh sumdawngten nasa takin an chhawr ṭangkaiin hmasawnna kan neih phah dawn a ni.

IAF hnuaiah International Airport kawng a bo:

Civil enclaves airport thenkhat te chu International airport an ni a, Lengpui airport pawh IAF kuta hlan a nihin engvangin nge International airport-ah kan hlan kai theih loh ang tih ngaihdan a awm mai thei. Heng airport te hi AAI enkawl an ni a, International airport mamawh zawng zawng chu an buaipui sak vek a ni. Tuna sorkâr ruahmanna ang chuan AAI chu IAF in a luahlan tawh dawn a ni. IAF leh Mizoram sorkâr chuan International Airport enkawl turin thiamna an nei si lova, International Airport chu kan tan a beisei awm ta lo a ni. Chutih laiin Tripura-ah International airport thâr South East Asia gateway atan hman tur siam tum mek a ni. South East Asean Gateway nih kan lo beisei ve ṭhin na chu IAF in Lengpui airport a lak chuan a tawp dawn ta ni.

Jet fighter dahna (Blast Pens):

IAF hian Lengpui airport hi fighter dah nân an duh thu Mizoram sorkâr hnênah kum 2011 kum daih tawh khan a lo thlen tawh a, chuvangin he airport hi IAF hnêna kan hlan chuan fighter airport a ni ngei ang. Blast pens chu runway bultea dah a ngaih dawn avangin runway sir ve vea hmun awl Air Strips metre 113 zuah tur chu a tibuai dawn a. International safety norms kalh anih dawn avangin private airline te abikin foreign airlines te chu an rawn tum duh dawn lo a, International airport tan kawng a bo dawn a ni.

Cargo terminal mamawh:

Kan state in hma a sawn zel a, thlawhnaa hmanga bungraw lakluh leh thawnchhuah kan la uar tial tial dawn. Chumi atan chuan Cargo Terminal te pawh kan la mamawh dawn, IAF hmun zau tak kan pek chuan cargo terminal dahna tur kan van dawn a ni.

Airport enkawl tlinlo:

Airforce leh Working Committee te ruahmanna kan kalpui chuan airline business-ah kan la inrawlh chunzawm zêl dawn tihna a ni. ZOHANCO, ZIDCO, MIFCO, Tourist lodge te enkawl hlawhchham tan chuan airport enkawl phei chu a harsa lehzual ang. Airport enkawl nâna thil pawimawh technical, engineering leh managerial thiamna kan nei silo. He ruahmanna hian Mizoram sorkâr harsatna a sukiang dawn lo mai nilovin kan la buai chhunzawm zel dawn tihna a.

IAF kutah Lengpui airport awm se a him ang em?

Zonet TV-a Air Veteran te talk show-ah Lengpui airport chu IAF ta pawh nise, indo nikhuaah hmelma target hmasa a ni bik chuang lovah an ngai a. Oil Refinery, Atomic Power Plant , Railway tracts, Airport, ship port, Assembly House, parliament te chu target hmasa an inang tlang vek ang an ti a. Kumin May thla Operation Sindoor lai khan Indian airport 27 khar an ni a 13 te chu civil enclaves an ni. A bak chu Pakistan ramri hrula airport te an ni. Hindon airport(IAF ta) chu khar ani laiin a bula Delhi airport chu khar a ni lo. Indian Military strategist leh kan veteran te ngaihdan chu a in persan hle mai. Indian airforce te chuan Pakistan airforce base 11 India rawn beilet thei te chauh drones, missiles, thlawhna hmangin a bomb a dangte chu bomb tul an ti lo.

Kumin June thlaa Israel in Iran a va run khan an airbase te leh anmahni beilet thei ralthuam dahna hmun te an va bomb chat chat a nih kha. Airport hrim hrim chu bomb an tum lo.An beih theihloh leihnuaia Nuclear siamna hmun-Fordow, Natanz leh Isfahan te chu B-2 Stealth bomber hmangin USA chuan a bomb a,Iran nuclear siamna te an tichhia anih kha.

July ni 1, 2025 khan Ukhraine chuan Russian airbase 5-Olenya, Dyagilevo, Ivanivo, Belaya leh Ukrainka airbase te drone hmangin an bei a. Ukrainka airbase hi Siberia a awm Kiyv atanga km 4300 vel a hla a ni.

Tunlai politics kan thlir chuan China chuan Myanmar leh Bangla Deshah hmun khuar a tum mek a. Heng ramah te hian hmelma ten hmun an khuar chuan Lengpui airport hi IAF ta a nih bawk chuan indo nikhuaah target number 1 chu a ni ngei ang. Hmanlai Indopuii 11 na hunlai anga hmelma te vaihma hun ani tawh lo. Lengpui tan a hlauhawmbiklo tih sawitute hian tunlai warefare hi an hrechiang tawk lo a ni.

Nagaland aṭangin i zir ang u:

Dimapur airport khu Indian Airforce ta a ni thin. Pu Rajiv Gandhi chuan Prime Minister a nih hunlai khan he airport hi IAF hnen aṭangin a laksak a, Nagaland sorkâr hnenah August 1987 khan pek a ni. Nagaland sorkâr chuan AAI enkawl hi an ram tan ṭha bera a ngaih avangin he mi kum vek hian a thlawnin he airport hi kum 99 chhung atan lease-in kumtin Rs.1 chawi turin AAI hnenah a hlanchhawng ve leh a ni. Dimapur airport ILP area chhung ami lease pek theih a nih chuan Lengpui airport tan pawh harsatna a awm tur a ni lo.

Nagaland sorkar chuan ram zau tak mimal hnen atanga laksakin AAI a pek belh bakah chêng vbch 2.75 a puk tir bawk a ni. Nagaland sorkâr hian Kohima aṭanga km 25 a hla Chiethu-ah ram 1013.72 acre a zau cheng vbch 18 sengin airport thar siamnan a lei a, AAI kutah a hlan a.

Draft Memorandum:

A chunga kan sawi tak ang khân MNF sorkâr kalta hun laia AAI-in draft memorandum (June 2022) a buatsaih Mizoram sorkar-in pawm harsa a tihte kha Nagaland tihdan copy ilang chuan harsatna a awm a rinawm loh.

Security chungchang:

AAI hian airport an enkawl zawng zawngah security man an tum a, anmahni kuta hlan anih pawhin Mizoram sorkâr-in security hi tum chhunzawm zel se an tih ṭhin avangin tunhmain an inrem hlei thei ṭhin lo va. Tunah inbiakna mumal neih anih hma pawhin Central sorkâr chuan security man min rawn tum sak der tawh a. MHA chuan Lengpui airport security atân CISF 121 ni 24.4.2025 aṭang khan a rawn dah a. Mizoram sorkâr-in air ticket aṭanga a hmuh tur aviation security fee(Rs 200 per ticket) aṭangin security man a pe anga, a daih lohna bak zawng chu National Aviation Security Trust aṭanga tum tur a ni tiin MHA chuan ruahmanna a rawn siam a ni.

Indian air force hna chu ram venhimna anih avangin mipuite hamthatna a ngaihthah thin a. IAF hnena Lengpui airport kan hlan chuan a chunga kan sawi harsatna hrang hrangte khi Mizo mipuiten kan tawh bakah Mizoram hmasawnna daltu a ni dawn. Vawi khat IAF hnena kan pêk tawh chuan engtikah mah kan la let leh thei dawn tawh lo a ni. IAF chu Civil airport enkawl tura din anih loh avangin he airport enkawl tur hian a tling lo(qualify) a ni. India danpuiin airport tihmasawn tura a din AAI hnena Lengpui airport hlan hi Mizoram tan a tha ber leh kawng dik a ni. State dang experience aṭangin IAF enkawl thatlohzia kan hria a, chutih laiin, AAI enkawlna hnuaiah India rama airport te abikin kan thenawm state airport te nasa takin an thang a, anni tan a that chuan kan state tan pawh a tha ang. Kan sorkâr hian Central sorkar inphal lai hian AAI hnena hlan turin hma la se a va tha ve.

Annexure 1

Civil Aviation, Government of Mizoram, Budget from 2017-2026

Sl.No. Particulars 2017-18 2018-19 2019-20 2020-21 2021-22 2022-23 2023-24 2024-25 2025-26

1 Rev. Exp. BE 328.08 329.94 389.72 385.14 382.40 360.05 390.05 763 750.41

2 Rev. Exp. Actuals/*RE 723.41 851.35 1340.67 1029.75 *1422.80 1659.14 1021 987.80

3 Cap. Exp. BE - - - - - 8012.50

4 Cap.Exp. Actuals/*RE 913.56 1140.00 800.05 4530.39 *783.60 2093.00 60

5 TOTAL EXP. ACTUALS/*RE 1636.97 1991.35 2140.72 5560.14 *2206.40 2093.00 1081 987.80 8762.91

6. Receipt BE 252.00 272.16 293.10 203.30 450.00 720.00 1194.50 1795 1800

7 Receipt Actuals/*RE 210.81 436.95 277.43 203.50 *700.00 1094.50 1194 1795 1800

8 Excess Exp. Over Receipts

+Gain/-Loss (-) 1426.16 (-) 1554.40 (-) 1863.29 (-) 5356.64 (-) 1506.40 (-)

2657.64 (+)113 (+)807.20 (-)

6962.91

Airforce airport (Civil Enclaves) list

Annexure-II

Sl No Airport Hming Dinhmun Sl No Airport Hming Dinhmun

1 Vishakapatnam Inter, Custom 17 Jodhpur Domestic

2 Pune, Lahegaon Inter, Custom 18 Jamnagar Domestic

3 Chandigarh Inter, Custom 19 Jammu, Leh Domestic

4 Bagdogra( Siliguri) Inter,Custom 20 Jaiselmar Domestic

5 Port Blair International 21 Hindron Domestic

6 Srinagar International 22 Gwalior Domestic

7 Dabolim, Goa International 23 Gorakhpur Domestic

8 Begumpet(Hyd) International 24 Chakeri( Kanpur) Domestic

9 Bangalore(BIAL)

International 25 Bhuj Domestic

10 Thanjavur Domestic 26 Bhatinda, Punjab Domestic

11 Tezpur Domestic 27 Bhamraulli Domestic

12 Tanjore, TN Domestic 28 Barelly Domestic

13 Pathankot Domestic 29 Adhampur(Jhallandar) Domestic

14 Kumbhigram(Silchar) Domestic 30 Jorhat Domestic

15 Kheria( Agra) Domestic 31 INS Garuda Domestic

16 Jorhat Domestic

NMP scheme- 2022-25 chhunga Privatise turte:

Annexure-III

(1) Bhubaneswar, (2) Vanarasi, (3) Amritsar, (4) Trichy, (5) Indore, (6) Raipur, (7) Calicut, (8) Coimbatore, (9) Nagpur, (10) Patna, (11) Madurai, (12) Surat, (13) Ranchi,(14) Chennai, (15) Vijayawada, (16) Vadodara, (17) Bhopal, (18)Tirupati, (19) Hubli,(20) Imphal, (21) Agartala, (22) Udaipur, (23) Dehra Dun, (24) Rajahmundry, (25) Jodhpur.

"Nu mittuiin a fa nunna a chhan thei lo, i thisenin a chhan thei a sin,"

Thisen pe la, nun chhanhim rawh.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]