CYMA leh Aizawl City LC-in ILP, dan lova hnam dang sumdawng, Aizawl khawpui chhung kawng siam mek leh ruihhlo do chungchangte sawiho

Central YMA leh Aizawl City Local Council hruaitute inkawm

Aizawl | Nov 17, 2025: Central YMA OB te leh Aizawl City Local Council hruaitute vawiin tlai dar 3:00 khan Central YMA Office-ah an inkawm a. Inkawmhona hi Pu R. Lalngheta, President, Central YMA in a kaihruai.

Inkawmhonaah hian ILP chungchang te, dan lova hnamdang sumdawng tam ta lutuk te, Aizawl khawpui chhung kawng siam mek en zui chungchang te, ruihhlo do chungchangte an sawi ho.

Inkawmhonaah hian Ruihhlo do chungchangah YMA leh Local Council te tanho a tul zia te, YMA leh LC ten hriatpuina lehkha leh NoC pek chhuah chungchangah fimkhur taka kal pui a tul thu te sawiho a ni.

Pu C. Lalbiaknunga, President, Aizawl City Local Council ( ACLC) chuan, YMA in ruihhlo do kawnga khawtlang tana tha tura an ngaih chu Local Council in lo dodal loh pawh a tha ang tiin a sawi.

Pu R. Lalngheta, President, Central YMA pawhin ruihhlo do kawngah chak takin hma lak a tum a, LC te tawiawmna an mamawh dawn thu a sawi.

Inkawmhonaah hian ACLC atangin President C Lalbiaknunga leh hruaitu dang 4 te an tel a; Central YMA atangin President R Lalngheta leh hruaitu dang 4 an tel.