Aizawl-ah National Press Day 2025 hmang

Aizawl | Nov 17, 2025: MJA Gen Headquarters leh IPR, P&S Department-te huaihawtin vawiin khan I&PR Auditorium, Treasury Square-ah ram puma Chanchinbumite Ni (National Press Day 2025) chu hlawhtling taka hman niin, IPRP&S Department Secretary Betsy Zothanpari chu khuallian a ni.

Khuallian hian Mizoram Buai laia inremna atana thawhhlawk tak LR Sailo leh Mizo hmeichhia, MJA member zinga mass communication-a Doctoral Degree nei hmasa ber Dr Lalnunkimi Colney te hnenah chawimawina thilpek a hlan nghal bawk a ni.

Ram puma Chanchinbumite Ni puala hun hmanah hian khuallian Betsy Zothanpari chuan thusawiin, Chanchinbumite chu ram tana rawngbawltu pawimawh tak an ni tih a sawi a.Sawrkar tha tichak zel tur leh mipuite zirtir tura an dinhmun pawimawhzia chu hria a, thahnemngai taka an eizawnna kawngah chuan thiehtawp chhuah zel turin a fuih a. Khawvel hmasawn zelah mi tam takin Chanchinbu chu hriatna hnar rin tlak ber a an ngaih pakhat a nih angin, an thuthar lak khawm leh mipuite a an puan chhuah leh dan thuah pawh fimkhur leh thuhnu dawn taka mipuite hnena puang chhuak thin turin Chanchinbumite chu a chah a. NationalPress Day chu hlimtaka hmang theuh turin duhsakna a hlan nghal bawk a ni.

Vawiina hun hmanah hian MJA member leh hruaitute bakah IPR, P&S Dept. hnuaia thawktute leh mi pawimawh sawm bikte an tel a. Hun hi I& PR Director K Vanlalsangi'n kaihruaiin, MJA President C Lalrambuatsaiha'n kalkhawmte lawmna thu a sawi a. Vawiina chawimawina hlan tak LR Sailo & Dr Lalnunkimi Colney—te hnen atangin thusawi ngaihthlak a ni a. I&PR Deputy Director Pratap Chhetri chuan National Press Day 2025 thupui Digital Hun-a Print Media Dinhmun ‘The role of print Media in the Digital Age tih hmangin kalkhawmte zirhona neihpuiin, zawhna leh chhanna hun hmann nghal a ni a. MJA Vice President C Lalhmachhuana'n lawmthu sawiin hun hi a khar a ni.