Central YMA-in Sairang - Vairengte kawng dinhmun enfiah; "An hmalakna te kan en ang a, tha taka kan hrilh hnuah pawh a ngai reng a la ni a nih chuan - 'Kan rama hnathawk tur hian midang lo lut rawh se, nangni chuan minlo hawsan tawh rawh u' kan tih hun te pawh a awm lovang tih a sawi theih loh”

Aizawl | Nov 8, 2025: Central YMA CEC Meeting in alo rel tawh angin, Central YMA chuan vawiin khan Mizoram châk lakluhna kawngpui, Sairang to Vairengte kawngpui enfiahna neih ani a. He hun ah hian Central YMA President R Lalngheta leh Central YMA OB 4 leh CEC Member 37 an thawk chhuak a. PWD atangin SE, EE leh SDO te an tel bawk.

Kawng dinhmun enfiahna ah hian NHIDCL hotute leh an hnuaia Contractor te an tel bawk.

NHIDCL meh Contractor te hian hna an thawh mek leh an work plan te sawiin, hmanraw lakluh leh thil danga harsatna an tawh te an lo hrilh bawk. Central YMA hruaitute chuan harsatna an neih te pawh inhthlahrung lova an hnena thlen zel turin an hrilh a, kawng siam mekah tha taka an thawhpui tur thu an hrilh bawk.

Central YMA hruaitute hian Sairang leh Kawnpui inkar kawng chhia siamtha tur Contractor te chu an hnathawh hun chhunga tha tak leh lungawithlak taka thawh zo hman ngei turin an chah a. An hnathawh dan hi an enzui zel tur thu leh Monitoring atan thil sawiho zung zung awlsamnan leh hnathawh dan tarlanna turin NHIDCL, Contractor te leh Central YMA hruaituten ruahmanna siam an tum bawk.

Central YMA hian kawng chungchanga an hmuh dan hi Executive meeting ah an sawi zui dawn a, Mizoram sawrkara thlen tur leh NHIDCL leh Contractor te la sawi pui zui tur te an sawiho leh dawn a ni.

Central YMA Team te hi Awithangpa Group YMA hruaitute leh Sub-Hqrs. YMA Kolasib hruaituten lo dawngsawng in Sub-Hqrs. YMA Office ah leh Kolasib a NHIDCL Office ah kawng chungchang sawihona hun an hmang bawk. He hunah hian Youth for Kolasib (YFK) te hmalak tawhna report ngaihthlak a ni bawk.

Central YMA President R Lalngheta chuan, "Kan kawngpui thatna atan hian Sawrkar leh pawl hrang hrang ten hma kan la a. Amaherawhchu, kan chak lakna ber kawngpui hi a tha mawh hle a. Vawiinah YMA ten Inkhawmpui Lianah kan rel angin Sairang- Kawnpui inkar kawngpui siamthat mek kan tlawh a. An hmalakna te kan en ang a, tha taka kan hrilh hnuah pawh a ngai reng a la ni a nih chuan - 'Kan rama hnathawk tur hian midang lo lut rawh se, nangni chuan minlo hawsan tawh rawh u' kan tih hun te pawh a awm lovang tih a sawi theih loh” a ti.

Central YMA hruaitute hian kawng dinhmun enfiah hian Vairengte an thleng a, Vairengte Joint YMA Committee Room ah sawihona hun an hmang zui bawk.

Vairengte- Sairang Four Lane laih tan mekah Contractor te pawh sawipuiin a nih dan tur anga hnathawk turin an chah a, an la en zui tur thu an sawi bawk.