ZORAM THAR LEH KAN MOTOR NUMBER

Kum 2016 January 25-ah ka pianna ramah missionary hna thawk turin England aṭangin Lalpan min rawn tir hawng a. Pathian khawngaihna leh malsawmna dawngin kum 2017 July thla khan Motor thar Bolero (Mahindra) kan lei ve a. Kan motor thar chuan number awmze nei tak, number ṭha tak nei dâwn tlat a hriatna ka nei a. Transport office-ah kalin an hotupa hnenah ka lêng a. Ka rilru a thil awm motor number chungchângte chu ka hrilh a. Ani chuan, “Mahni motor number tur in thlan zelte chuan hna kan thawk hman nang,” tiin min lo fiam hlut a. Eng number nge i duh tiin min zâwt a. Kei chuan “ Ka hre chuang lo '777' te a awm thei ang em?” ka ti a. Ani chuan, “Chutiang a theih loh, sang hnih hnu lam a ngai ang,” tiin min chhâng a. Kei chuan “Ê, chuti a nih chuan, 2018 a ni mai a lawm” ka ti a. Engnge i duhna chhan tiin min zâwt a, kei chuan, “Kum 2018 hi Zofate chênna rama Pathian Lal ram politics pian kum tur a ni,” tiin ka chhang a. Ka ngenna ngai pawimawhin motor number MZ01 P2018 min pe ta a. Bolero hnungah leh hma lamah chiang takin Zoram Thar tih kan tar.

Kum 2018-ah political party dovin Pathian lal ram sawrkâr dinna tur thu kan au a. Mizoram dung leh vang fangin party politics chhuahsan a, Lal Isua lalna ram din turin mipuite kan sâwm a. Kan rama party politics a taka do turin inthlannaah pawh kan luhchilh a. Pathian Lal ram tâna kohna dawngtu mi 18 chiahin bial 23 ah Lalpa tan bâwm kan hûng a. Kum 2023 inthlanah pawh mi 18 bawkin Pathian Lal ram tana bawm hungin Pathian Lal Ram chi chu bial 22 kan tuh leh. Chu Pathian Lal ram chhinchhiahna bâwm atan chuan Zungbun kan hmang a. He Zungbun hian Zofate fapa tlanbo Pathian hnena kan kir lehna leh amah nena kan inrem lehna- inneihna a entir. Number 18 hi kan nupa tan a pawimawh hle mai. Kan inneih ni kha May 18 a ni a, kan fa neih hmasak ber pianni hi March 18 a ni bawk. April ni 18, 1986 ah missionary hna ka zawm a, kan nu hian August ni 18, 1986 ah a zawm bawk. May 18, 2017 khan ka nupui fanaute pawhin England chhuahsanin Mizoramah min rawn zui haw. Kum 2018 kuma Mizoram dung leh vang fanga kan fehchhuah khan tum lawk pawh nilovin mi 18 chiah hi kan ni fo ṭhin. Engemaw thil pawimawh ah kan in hmuhkhawmin mi 18 kan ni zing hle.

Number 18 hi thlarau nun, rinna fiahna hrang hrang- chakna, huaisenna leh finna number atan hman a ni ṭhin. Juda te chuan number 18 hi an ngaipawimawh êm êm a, Hebrai ṭawng Chai =Nunna tih hi Chet thumal 8 leh yud thumal 10 hlutna belhkhawm 8+10=18 a ni . Chu number nunna (life) entirna chu an ngaihlu êm êm a.Ṭanpuina thilpek, thawhlawm, midangte malsawmna leh damreina malsawmna thil pek an in hlanin number 18 emaw a belhkhawm dang 36, 54, te an hmang ṭhin.

Kan Bolero MZ 01 P 2018 chu kum 8 rim takin Pathian Lal Ram chanchinṭha hril nan kan hmang a. December 7, 2024 khan kan fanu Lalruatfeli Hlawndo in Vulmawi Award, Best Announcer chawimawina a hmuh dawng turin Lungleiah kan kal a. Kan kal lamah Sekhum khaw daiah kan chesual a. Mahse Pathianin mak takin engmah hliam na lutuk tuar lovin min hum a, kan nunna min lo chhanhimtu atan Puia, Sumo Driver a hmang.

Kum 8 chiah kan hman hnuin kan Bolero MZ01 P2018 chu kan hralh a, Motor thar RUMION (Toyota) kan lei a. Kan motor number tur chu engnge ni ang âw tiin ka ngaihtuah a. Kum 2025 kum hi hnehna kum (Year of victory) tiin January thla khan ka lo puang a. Motor number plate thar chu September 11, 2025 khan kan dawng a MZ 01 AE 5445 a ni. He kan motor number thar belhkhawm pawh hi 5+4+4+5=18 a la ni tho mai. Amaherawhchu, kum 2025 hi number 5 Davida number a bul ṭan kum tur a ni ti a ka lo dawn leh puan kha a nemnghehna a nih hi tih mai turin number 5 ah bul ṭanin number 5 ah a tawp a. Alphabet A - E pawh hi panga chiah a ni bawk. Zoram Thar lo thleng tur hi kum 2014 a Australia a ka kal khan ṭawngṭaihona kan nei a. Chu kan hun hmanna ah chuan Aborigine hmeichhe naupang Matana khan Davida in Goliatha a hnehna thlalak kha min rawn pe a, hei hi nangma tih tur a nih hi tiin min hrilh. Davida khan Goliatha beih nan lungte mam thelthawl 5 a chhar a, chu lungte a chhar hmang chuan Goliatha a vawmthlu a nih kha. Kan unau hi pariat kan ni a, kan upa ber Pu Jordanthanga'n number 8-ah kan piang chhuak tih hla a phuah a, kan unauvin kan sa ṭhin. Unau pariat ah number 5-naah ka lo piang.

Zoram Thar (Pathian Lal Ram Sawrkar) lo piang tur kan buaipui hi keimahni din tur emaw, keimahni tih dik tur emaw ni lovin Pathianin a hun taka a tih puitlin tur a ni. Keini chu Lalpa thuawih a chhiahhlawh hna thawk tura a ruat leh kohte mai kan ni. Kan motor number awmzia kan han sawite pawh hi keimahni tih dik tum lam nilovin Lalpa min hruaina lamtluang mak tak mai hi chhût tham leh ngaihtuah tham niin, hunbi min chhiar tirte nen a in hmeh em avangin ka han thai lang ve a ni e. Pathian hian number emaw hunbi hi a ngai pawimawh êm êm a. Bible pawh hi number bu tih mai tur a ni a, kum, thla leh ni te hi leilung a din tirh aṭang khan awmze neilo pakhat mah a awm lo tih mai tur a ni. Sam 90:12 ah chuan “Kan dam chhûng nite chhiar dan tûr min zirtir ang che, Finna thinlung kan neih phah hialna tûrin," tih kan hmu a. Chuvang chuan, kan hun tawn tawh a number te hi ngaihthah mai chi niin a lang lo. Zofate hian kan hun tawn liam tawh, hun tawn mêk leh tawn leh zel dan tur hi kan ngaihtuah chian leh zir chian a pawimawh a, chuti a nih loh chuan hun ṭha leh hun hlu min pekte leh kan hma lama hun ṭha tak lo thleng tur kan hai palh ang tih a hlauhawm.

Zofaten hun i hai tawh lovang aw! Milem bia nghawngkawl bahpui a rem lo. Kan zalenna Jubilee dar a ri, Pathian Lal Ram leh Hnam a ding chhuak mêk.

| EXPLORE MIZORAM |

• Mizoram's Most Trusted Website | Mizoram's Online Encyclopedia •

[📌 Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]