IAF kuta Lengpui Airport hlan tura tih hi Mizoram hmangaih vang ni lovin - sum duhluat vang a ang ta hle zawk!

# IAF kuta Lengpui Airport hlan tura tih hi Mizoram hmangaih vang ni lovin - sum duhluat vang a ang ta hle zawk!

# IAF-in Lengpui Airport ram leh Sihphir ram Compensation Vbch 198 chuangin an la!

# Lengpui Airport hi IAF nena inphel emaw an kuta hlan kan duh lo!

Aizawl | Oct 14, 2025: Mizoram Pradesh Congress Committee (MPCC) Spokesperson John Siamkunga chuan, vawiin khan thuthar thehdarhtute kawmin, "IAF kuta Lengpui Airport hlan tura tih hi Mizoram hmangaih vang ni lovin - sum duhluat vang a ang ta hle zawk!" a ti a, "IAF-in Lengpui Airport ram leh Sihphir ram Compensation Vbch 198 chuangin an la!" a ti bawk.

"Lengpui Airport hi IAF nena inphel emaw an kuta hlan kan duh lo," a ti a, "Lengpui Airport hi Airport Authority of India (AAI) enkawl tir nise kan duh ber a. Mizoram Airport a nih anga zalen tak leh thlamuang taka mipui ten an hman theiha a awm hi kan duh ber a ni,"a  ti.

MIZORAM PRADESH CONGRESS COMMITTEE

PRESS HANDOUT

Date 14.10.2025

LENGPUI AIRPORT  IAF NEN INPHEL KAN DUH LO,  AN KUTA HLAN KAN DUH LO BAWK

(A Runway atanga lehlam zawng, Terminal Building lo lam, ramhnuai zawng khu an nei ang - CM)

Lengpui Airport hi Airport Authority of India (AAI) enkawl tir nise kan duh ber a. Mizoram Airport anih anga zalen tak leh thlamuang taka mipui ten an hman theiha a awm hi kan duhber a ni. Indian Air Force (IAF), Ministry of  Defence kuta hlan hi kan phal ngai dawn lo a ni. Anni kuta hlan anih chuan an strick dawna, phal loh thil tam tak karah kan leng anga, kan chep hle dawn a ni. Chu chu kan duh lo a ni.

Mizo mipuite kan rualawhna leh mamawhna a nasat em avangin kum 1995 khan Congress sorkar chuan Central Sorkar atangin sum Rs 97.17 Cr a dil chhuaka, Lengpui Airport hi kan siam ta a ni. Kum 1998 khan hman theiha peih a ni ta a. Chumi hun atang chuan khawvel hmundangte nen boruaka thlunzawm kan lo ni ve ta a. Kawng tinrengin Mizo mipui ten kan hmang tangkaiin nasa takin hma kan sawn phah a ni.

Kan Chief Minister zahawm tak, Pu Lalduhawma leh a thawhpui ten Indian Air Force (IAF) kuta hlan an tum tlat mai hi pawi kan ti tak zeta, Mizo mipute duh dan leh an hmakhua thlir chungin AAI kutah hlan se kan duh takzet a ni. Mizo mipuite hian Vai sipai hnuaiah kum sawmhnih lai hrehawm kan lo tuar tawha, a tawk tawhin kan hria. Strick taka an enkawlna hnuaia awm leh hi kan duh tawh lo a ni.

Ni 11.6.2024 khan Chief Minister’s Office (CMO)-ah Indian Air Force (IAF) hotute leh Lengpui Airport chungchang ngaihtuahtu tur, Sorkar-in a din, Working Committee to look into the Management & Maintenance of Lengpui Airport te chuan Meeting an nei hova, IAF lam chuan Lengpui Airport enkawl chu an duh thu an sawi a, Mizoram aiawhte pawhin an remtihpui a ni. IAF enkawl Airport tam takin an enkawlna hnuaia awm an duh tawh loh avanga Airport dang, a thar an dinchhoh zel laia IAF kuta Lengpui Airport hlan an tum ta tlat mai hi Mizoram mipuite tan chuan a lungchhiat thlak tak zet a ni.

IAF kuta an hlan anih chuan Mizoram hian nasa takin a tuar dawn a. Thlawhna tum hmun leh a Control na Operational Area chauh IAF in an enkawl anga, a bak zawng: Terminal Building te, Car Parking te, Security Personnel hote leh a dangho zawng hi Mizoram Sorkar in a enkawl zui dawn a, Sorkar tan sum sen zuina tur a tam hle dawn a ni. An in hlanchhawn tum dan hi Mizoram tan chuan channa nasa tak a ni dawn a, kan tuar hle dawn a ni.

Chief Minister zahawm tak, Pu Lalduhoma’n Lengpui Airport, Indian Air Force, Ministry of Defence kuta hlan a tum mek dan a sawi hi en ila, “IAF kuta hlan turin Draft Memorundum of Understanding kan nei tawh; a pumin kan pe dawn lo. A Runway atanga lehlam zawng, Terminal Building lo lam, ramhnuai zawng khu an nei anga .Chu chu a man kan chhutchhuak anga, an lei ang, a leiin. Chu ringawt pawh chu kan thlahlel ve a nia, a man chu,” tiin amah ngeiin a sawi a ni. Kan in phel dawn tihna a ni a, ava rapthlak em! Airport khu ZPM Sorkar hian a tichhe vek dawn. IAF in zinmite tan tih tak takin an enkawl dawn lo tihna a nih chu. Bumin an awm mek a ni. Sum ringawt it a thil tih hi chu a pawi asin, a daih rei dawn si lo. A tuartu tur chu mipuite bawk kan ni dawn sia.

Engvangin nge IAF, Ministry of Defence kuta Lengpui Airport khu hlan an chak em em tih hi chhui tham a tlingin a langa, chhui ngei pawh a tul dawn a ni. A chhan leh vang nia lang hi i han en teh ang u:

The Right to Fair Compensation and Transparency in Land Acquisition, Rehabilitation and Resettlement Act,2013 vide Preliminary Notification No.K.12011/55/2013-REV Dated 15.05.2025 dan hmang hian IAF lam chuan Lengpui Airport ram leh Sihphir ram, 5009400 Sq.ft a zau chu Compensation hmangin an la taa, an lakna zat chu Rs 1,98,78,55,155/= lai a ni. He ram IAF in Compensation hmanga to taka an lak hi, a ram neitu dik takte hnen atangin tu emawin tunhma lam khan a lo lei khawm vek tawh nia sawi a ni a. Tunah hian Compensation hmanga tihralna chance a hmu ta nia sawi a ni. A leitu hian a leisaka te hming ho kha, Compensation Claim nan ala hmang zui thei zel hi thil mak tak a ni bawk a ni. Chuvangin, Lengpui Airport IAF kuta hlan tura tih hi Mizoram hmangaih vang ni lovin, Sorkarin a enkawl zawh tawh loh vang pawh ni lovin, sum duhluat vang a ang ta hle zawk a ni. Mizoram leh Mizote  thatna tur aia sum leh pai dah pawimawh vang zawka IAF kuta Lengpui Airport hi hlan anih chuan a pawi hle ang, hunin thudik ala rawn hailang dawn sia.

CENTRAL SORKAR IN LENGPUI AIRPORT HI AAI KUTA DAH A PHAL

Ni 15.3.2025 khan Pu Amit Shah, Home Minister zahawm tak chu Aizawl-ah alo kal a. Mizoram NGO Coordination Committee hruaitute chuan an lo hmua. Airport Authority of India(AAI)  kuta Lengpui Airport dah sak turin an dila. Ani chuan AAI in Lengpui Airport an enkawl tur thu alo hrilh a. “Thalthum chhungin ruahmanna an peihfel anga,thlaruk chhungin Airport tih changtlun hna an thawk ang,” tiin. Mahse, ZPM Sorkar hian a bawhzui duh si lova, a pawi tak zet a ni.

Ni 29.4.2025 khan Airport Authority of India (AAI) Officials te chu Mizoramah an lo kala, Lengpui Airport tih changtlun dan tur an rawn en thlithlai nghal a, tin, Chief Minister leh Officials te an hmua. Mahse, thumumal tak an lo sawipui lo tih hriat a ni. A pawi hle mai.

Ni 7.7.2025 khan Pu Lalduhoma, Hon’ble  CM chuan Pu Amit Shah, Hon’ble Home Minister a hmu a. Pu Amit Shah chuan, Lengpui Airport  AAI kuta hlan chungchang chu Union Cabinet in an ngaihtuah tur thu alo hrilh a ni. Kan tan kawng tha tak a in hawng meka, chuti chunga Sorkar a che duh miah lo hi chu hriatthiam a har khawp mai. RTI chhanna atanga kan hmuh danin Lengpui Airport, AAI kuta hlan tura hmalakna mumal ala awm lo niin General Administration Department (Civil Aviation),Govt of  Mizoram chuan a sawi a ni.

AAI enkawlna aia IAF hnuaia awm ZPM Sorkarin a duh zawk tlat hi thil mak sawi hleihtheih loh ni berin a hriata; chutih laiin Lengpui Airport hi IAF ho nen kan in phel dawn a ni tih kan Chief Minister-in a sawi sia, siamthat theih tawh loh tur Airpor tihchhiat vekna tur ruamah kan lut mek a ang ta hle mai. Airport sir 1.5 KM a hlaah hian IAF chuan ram zau tak, compensation hmangin an la fel der tawh nia langte hi ava pawi em. Congress Party chuan kan pawmzam thei lo; IAF lak tir an nih loh nan nasa takin kan bei zel dawn a ni.