Zochachhuah khuain kar khat dawn electricity leh mobile signal an nei tawh lo!

Aizawl | Oct 18, 2025: Lawngtlai District a KMTTP road, India leh Myanmar border area a awm, India ram khaw tawp ber leh a kawtchhuah ni bawk, Zochachhuah khua chuan kar khat dawn Electricity leh mobile signal an nei tawh lova, khaw mi te nunphung leh khawsak a tibuai hle ni a thu dawn a ni.

Zochachhuah / Zorinpui khua hi Look East policy a hlawhtlin theihna tur atana khaw pawimawh tak, India khawtchhuah a ni a. Lawngtlai khua leh a chhehvel mipuite chuan tunhnaiah pawh Zochachhuah / Zorinpui atanga Myanmar rama bungraw tawlhluh sumdawnna ah sum tamtak lalutin, Lawngtlai District a sumdawng tam zawkte tan sumhnar tha tak leh eizawnna siamtu, employment generate na hmun pawimawh em em a ni. Hetiang khawpa hmun pawimawh ni si hian ngaih pawimawh a hlawh tawk lo niin a lang. Chawhrualin, electricity hi kumkhat ah thlakhat chauh awm ang a ni a. Mobile signal pawh a awmlai leh awm loh lai a inzat deuh thaw a ni.

Zochachhuah khua hian, a chhehvel khaw tamtak atanga Zochachhuah hmuna labour a hnathawkte alo dawl thin a. Hna leh eizawnna neilo chhungkaw tamtak ten eizawnna an neihna hmun anih avangin, sorkar in a ngaih pawimawh a tul hle.

Tin, Zochachhuahah hian naupang Elementary school zirlai Mi 100 chuang an awm bawk a. Êng neih that lohna khua a nih avangin, zirlaite pawn an zirna kawngah harsatna tam tak an tawk mek bawk a ni.

~ Moses NG