Aizawl | Oct 18, 2025: Mizoram Legislative Assembly Speaker leh Chalfilh A/C bialtu ni bawk Lalbiakzama chuan a bial chhûng North Khawlek khuaa ruhro hmuh chhuah, kumin May ni 2-a Art & Culture Department (A&C)-a Archaeologist Vanlalhuma Singson leh Higher and Technical Institute, Mizoram (HATIM) Lunglei Asst Prof Dr Lalhminghlua ten an enfiahna leh, a sample an lâk Beta Analytic, Miami, Florida USA-ah zirchian tûra an thawn leh, endikna result aṭanga ruhro hmuh chhuahte kum 1260 AD leh kum 1320 AD inkara mi a ni tih an lo finfiah tawh chungchangah Art & Culture Director chu a office-a lêngah sâwmin, hmalâkna tûra a hmachhawp leh tih tûr ṭul dangte a sawipui.
Chalfilh bialtu MLA Lalbiakzama chuan North Khawlek, Thingkhuangngaw khâm kâr pûka ruhro an hmuh chhuahna hmunhma te uluk taka humhalh leh venhim nise, hemi atân hian a ram hmunma te chu State Heritage Site-a puan tûra hmalak nise a ti a, hei hi tih tur pawimawh hmachhawpah an dah.
Bialtu MLA Zamtea'n a ngenna bawhzuiin Art & Culture Dept chuan a kawng siam bultanna atan Thingkhuangngaw khâm panna kawng sial nan ₹1,00,000/- Heritage Committee kuta pêk nise, a ti bawk.
North Khawlekah hian Heritage Committee din nghal niin, Speaker hian, Ruhro zirchianna neih hmabâk la awm DNA Sequencing ti tur pawhin phai lam zirna sâng zâwk leh Mizoram University (MZU) te nena thawhhona tur kawng a ruahman bawk.
Lalbiakzama chuan heng ruhro hmuh chhuahte hi Mizo thisen kai nge an nih a, hnam dang tih fiah tura DNA Sequencinig tih chu a ngaipawimawh hle a. Tih tur ṭûl dangah pawh a inhawng hle a ni.
- Zoram People's Movement
Chalfilh Constituency, Media Cell
Dt.18.10.2025
Aizawl district North Khawlek-a puk pakhata ruhro hmuhchhuah chu carbon dating hmanga a upat dan enfiahnaah AD 1260 atanga AD 1320 inkar mi vel an ni tih hriat a ni.
Indian National Trust for Art and Cultural Heritage (INTACH) Mizoram Chapter convener Rin Sanga sawi danin, North Khawlek khawtlang hruaitute ngen angin an khaw ram Thingkhuang ngaw puka mihring ruhro hmuhchhuah chu Art & Culture department thawhpuiin kumin May 2 khan an enchiang a, mihring luruh 9 leh mihring taksa bung ruhro hrang hrang a awm a ni.
Ruhro hmuhchhuaktu hi Laltlanhlua, N Khawlek a ni a. Kumin January 11 khan a hmuhchhuak a, ruhro upat zawng zirchian a nih theihnan ‘sample’ thenkhat hi Beta Analytic, Miami Florida USA-ah ‘carbon-14 dating’ tih tir tura thawn a ni a, zirchian a nih hnuah heng ruhro hi kum 1260 AD atanga 1320 AD inkar an ni tih hriat a ni.
“Heng ruhro hi kan hnam ziarang leh nunphung bakah hnam chanchin zirchianna atana hmanraw tangkai tak a ni thei dawn a ni” Rin Sanga hian a ti.
INTACH hotute chuan, heng ruhro hi zirchian zel a nih theihna turin Mizoram University bakah Mizoram sawrkara a kaihhnawih department leh mithiam bikte sawmin, Deoxyribonucleic Acid (DNA) analysis kalpuia heng ruhro hi tute nge an nih, tih leh, eng hnam leh thlah nge an nih, tih zawnchhuah an tum tih an sawi a ni.
"Nu mittuiin a fa nunna a chhan thei lo, i thisenin a chhan thei a sin,"
Thisen pe la, nun chhanhim rawh.
| EXPLORE MIZORAM |
• Mizoram's Most Trusted Website | Mizoram's Online Encyclopedia •
[ For Ads - Contact +919402125273 ]
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: