"zirlaite chu rilru thar nen, ram hrang hranga hna thawk thei tura kan inpharh zau tan a ngai,"

Hnahthial | October 9, 2025: MSU General Conference vawi 23-na chu chhunzawm zel niin vawiin chawhnu Vantlang Inkhawm Progamme, Lalnu Ropuiliani Run a hman chu Adviser to CM (Political) Lalmuanpuia Punte chuan khuallian niin a hmanpui a; zirlaite chu rilru thar nen, ram hrang hranga hna thawk thei tura kan inpharh zau tan a ngai a ni a ti. Uaptu ah MLA Jeje Lalpekhlua chu tangin zirlaite chu mahni chawr chhuahna zahpui ngai lo turin a chah a ni.

Lalmuanpuia Punte chuan Hnahthial District-in Bialtu MLA chak tak an nei tih sawiin Lunglei to Champhai pawh theihna tur, Hrangturzo kawng pawh black top tura ruahmanna an siam dun mek thu a sawi a. Lunglei to Champhai sumo service tan Hnahthial chu kawng pawimawh tak a la nih dawn thu a sawi bawk.

Adviser to CM chuan Mizote chu tum mumal nei lova General line a kal vak vak lo tura chahin Professional line kal uar a tul thu a sawi a. Chu mai bakah thiamna tak tak chher chhuah nan skill development uar a tul thu a sawi bawk. Chumi tur atan chuan tunah Skill Development Incubation Centre din tura ruahmanna siam mek a nih thu leh Mizote chu ram dangte tan pawh hna zawnga an rawn kal zawkna an ni thei a a hriat thu a sawi. Chu dinhmun thleng tur chuan zirlaite chuan Mizoram chauh thlir lovin ram dangah pawh hna zawnga, chumi hmunah chuan Mizoram tan thiamna chher chhuak a, feh chhuak ngam thin turin a chah nghal a ni.

Uaptu Jeje Lalpekhlua chuan fuihna thuchah sawiin hnathawh hreh neih loh leh tlawmngaihna vawn nun a tul thu a sawi a. Inzahtawn thiam zir nawn leh a tul thu sawiin hmaichhan chauh lovah pawh, social media-ah te pawh tawngkam uluk a, mi chhiatna lai sawi uar lova, mahni thatna lai inchawikansak tawn thiam turin a chah nghal a. Mahni nihna baka lan tum hi thil tha lo tak tak min tih tir thintu a ni a, chuvang chuan mahni chawr chhuahna hmun leh mahni nihna zahpui lovin, hmasawnna rilru nen mahni neih tawkah lungawi thiam turin a chah a ni.

He programme hi MSU Vice President Roluahpuia chuan kaihruaiin ziami leh Cultural club hrang hrang ten zai leh lamin kalkhawmte an awi a ni. Zanin Vantlang Inkhawm Programme hi Minister of State, Prof. Lalnilawma'n khuallian niin a hmanpui ang.

Chawhma lamah Rorel inkhawm neih a ni a, Rorel inkhawm hi MSU President B Lalkhawngaihzualla'n kaihruaiin, Conference Agenda Pariat (8) te chu lungrual taka pawm a ni. Chungte chu :

1. Casual Teacher te dinhmun (Jub Security) ennawn a, tun aia dinhmun ṭha zawka hlan an nih theih nan MSU in hma la rawh se.

2. Higher Secondary School leh College zirtirtu nghet tun aia zing zawka lak anih theih nan hmalak ni rawh se.

3. Mizoram Sawrkar hnuaia School zawng zawng te Grade System siam anih theih nan hmalak ni rawh se.

4. Mizoram Engineering College Lunglei hi anih ang tur taka a kal (function) vat theih nan hmalak ni rawh se.

5. CESS aṭanga Education Sector in a chan tur ah hian Education Sector in a vaia a chan vek theih nan hmalak ni rawh se. Education Sector in a chan tur hi School Education leh Higher & Technical Education Department ten rualkhai taka an chan theih nan MSU in hma la rawh se.

6. FCAA hi zirchian nise, a ṭul anga hmalak ni rawh se.

7. Mizorama dan lova khaw din zawn zawng dap chhuah a, a ṭul anga hmalak ni rawh se.

8. MSU Dan bu hi a tul dan anga ennawn ni rawh se.

Tin, rorel inkhawm ah hian kumpuan thupui tur atan "Aia Upa zah leh Khua leh tui ṭha nih" tih chu thlan a ni.

Mizo Students’ Uninion (MSU) General Conference Vawi 23-na chu nzian atang khan tan a ni a, khuallian atan Minister PC Vanlalruata chu hman niin Khualzahawmah Jeje Lalpekhlua hman a ni bawk. He hun hi MSU Asst. General Secretary Lalruatpuia'n kaihruaiin, Aizawl City College Joint Students’ Union (ACCJSU) President Lalremtluanga'n hunserh a hmang a. MSu General Secretary Zodinsanga chuan inhmelhriattirna leh report pein, palai riak lut tawh hi mi 600 vel an ni tawh a ni.

Khuallian chuan thusawiin, Mizoram-ah unemployment rate a san chhoh zel avangin zirlaite zirsang ringawt lova thiamna tak tak neia zir turin a chah a, nakin lawka kan ram leh hnam hruaitu tur te an la nih avangin thiamna tak tak nei thei tura zir tur leh ngaihtuahna fim tak hmang turin a chah a ni. Tin, Sairang, Mizoram-ah Rail-a rawn lut ta a, he thil hian hmsawnna tam tak a rawn ken tel rualin thil tha lo tam tak pawh a rawn keng tel dawn a. Zirlaite leh thalaite hmasawnna mila ngaihtuahna senga a thatpui zawnga kan hman theih na turin zirlaite a chah a ni. Tin, ruihhlo do kawnga thawhpui turin zirlaite leh thalaite a sawm bawk. Zirlaite hian mahni insit lova ka tithei a ni tih rilru pu turin a chah a. Kan tithei a ni tih rilru kan put tlat chuan hlawhtlinna changin Mizoram leh hnam tan chhenfakawm tak kan la ni thei dawn a ni tih a sawi bawk.

Khualzahawm pawn thusawiin, Zirlaiten nun uluk a, taimakna leh rinawmna vawng zela MSU-thupui “ Bul tan that chuan rah tha a chhuah thin” tih anga tha taka bul tan turin zirlaite a chah a ni. Zirna hian khawntlang leh mimal nun a ti danglam thei a, zirsanna ringawt hian hlawhtlinna min thlen lova, thiamna zirchhuah hi a pawimawh ber zawk chu a ni a tib awk. Beidawng lova beih tang tang na hian hlawhtlinna a kengtel a ni tih hre turin a chah bawk. Tin, “Ka nun a ka inchhir loh ber chu ka nu leh pate thu ka lo awih kha a ni. Chuvangin zirlaite pawh nu leh pate thu awih tur leh nu leh pate thu awih hi mlasawmna a ni” tih hre turin a chah a ni.

MSU Sr. Adviser Dr Lalhmachhuana Zofa chuan thu tawi sawi bawkin Mizoram leh hnam hmangaih turin kalkhawm te a fuih a, mizo kan nih avang hian mite aia thiam zawk leh thei zawk kan ni tih hre nawn fo turin a chah bawk.