Lehkhabu Pho Runpui thawh ngana tan; lehkhabu 15 tlangzarh

Aizawl | October 9, 2025: Mizo Writers Association (MWA) buatsaih 'Lehkhabu Pho Runpui' Thawh Ngana (LPR-5) chu vawiin atang khan Vanapa Hall-ah tan a ni a, MWA member-te lehkhabu ziah 15 tlangzarh nghal niin, he hun hawnna hi Home Minister K Sapdanga'n khuallian niin a hmanpui.

Khuallian K Sapdanga chuan MWA-te’n Lehkhabu Pho Runpui Thawh Ngana an buatsaih thei chu a lawmpui thu a sawi a. Mizote’n lehkhabu chhiar lama hma kan sawn theih nana theihtawp an chhuah avang leh lehkhabu thaa Mizote an chawm avangin hnam tan an hlu hle a ni, a ti a. Lehkhabu lehlin pawimawhzia sawiin, MWA-te zarah tawng danga ziah lehkhabu tha Mizote’n kan chhiar ve thei thin chu lawmawm a tih thu a sawi a.

Minister chuan lehkhabu chu mi ril zawkte finna mi mawl zawkte’n kan tem ve theihna chhun leihlawn, finna dahkhawmna, zirlaite tana thiam zirna, kum upat hnua kan hriatna chak lo zel tur vengtu a ni tiin, MWA LPR-5 chu hlawhtling ngei turin duhsakna a hlan a ni.

Chief Information Commissioner John Neihlaia, IPS (Retd.) pawhin RTI Week puala RTI Act chungchang inhrilhhriatna hun a hmang a. RTI Act chu langtlanga sawrkar inrelbawlna a awm theih nana dan, kan dikna chanvo, a tel lova awm theih loh a nih avangin mipuite’n kan hriatchian a pawimawh tih sawiin, RTI hman tan a nih atanga October ni 7, 2025 thleng khan, kum 19 chhunga Mizoram Information Commission-a RTI zawhna lut zawng zawng chu 45031 niin, 98% chu an chhanna dawnah lungawiin appeal zui a awm lo a ni, a ti a ni.

Hawnna hun hi LPR-5 Organising Chairman PC Lalrinpuia, chuan kaihruaiin, MWA President R Lallianzuala'n inlawmna thu a sawi a. MWA Joint Secretary C Laizawna chuan MWA hmalaknate report a pe a. MWA-te hian LPR buatsaih bakah Mizo tawnga lehkhabu lehlin tha ber thlangchhuak thinin, HSLC, HSSLC, BA leh MA level-a Mizo subject-a tithate chawimawina – Ch. Pasena Proficiency Prize, Lalmama Proficiency Prize, R Buchhawna Proficiency Prize, J Malsawma Proficiency Prize – an hlan thin a. Ziakmite Chanchin bu li an chhuah tawh bawk a ni.

LPR-5 Organising Secretary K Remruatfela chuan he hun atana an inbuatsaih dan leh hun hman dan tur report pein, nimin thleng khan ziakmi 103 lai LPR-5-a lehkhabu pho turin an inziaklut tawh tih a sawi a ni.

Ziakmite kawmna hun hman nghal niin, Lalthantluanga Chawngthu, MWA Executive Committee Member leh Ahmangaihi Khiangte-te’n 2024 Lehkhabu Lehlin Tha Ber Lawmman dawngtu, Lalrinzuala Pachuau leh 2024 MAL Book of the Year Lawmman dawngtu F Vanlalrochana-te chu an kawm a. MWA Vice President Rozama Chawngthu chuan lawmthu sawiin hun a khar a ni.

R Lallianzuala thusawi atanga hriat danin Lehkhabu Pho Runpui hi kum 2019 atanga hman tan niin, 2021 inkharkhip laiin khaihlak mah se 2022, 2023 leh 2024 khan neih chhunzawm theih a ni a. Kumin hi a thawh ngana tur niin, Vanapa Hall hulhliapah October ni 16 thleng, kar khat chhung lehkhabute hi phochhuah a ni dawn a. He hun hlawhtlin theih nan hian Art & Culture Department, Mizoram Information Commission, Traditional Twist leh Julie Lallianzuali (Lalbiakliana Filling Station)-te’n an puibawm a ni.

Vawiina khuallian K Sapdanga’n lehkhabu a tlangzarhte chu a hnuaia tarlante hi a ni:

1. MIZO LALTE THU BUAI REM DAN A LAI TAWK EM?

(A Critical Study of Mizo Customary Law)

Ziaktu: K Remruatfela

2. ZAHNA ZAKZEHIN

Ziaktu: Lalthantluanga Chawngthu

3. LALA DAWHTHLAK

Ziaktu: C. Laizawna

4. DIARY OF PASTOR CHHAWNA

Ziaktu: C Laizawna

5. HMANLAI AN CHANG TA MAW

Ziaktu: R Rothangpuii