SAY India Eastern Territorial-in 'Bring Them In' chak leh zuala kalpui rel; zanin aṭangin SAY Congress ṭan

SAY India Eastern Territorial-in 'Bring them in'chak leh zuala kalpui rel; zanin aṭangin SAY Congress ṭan

Aizawl | October 3, 2025: India Eastern Territory, Salvation Army Youth rorelna sang ber Territorial General Council Vawi 24-na chu vawiin khan Darlawn North Corps-ah neih a ni.

He General Council Vawi 24-na hi Session 2-ah then sawm niin, First Session-ah hian Official Agenda te sawi ho a ni a. Second Session hi Budget sawihona atana hun hman a ni. First Session hi Major. Richard Vanlalnghaka Territorial Youth Secretary chuan Chairman niin a kaihruai a. Second Session hi TSAYC Asst. Leader Lalrinliana Sailo, chuan a kaihruai a ni.

General Council-ah hian Kum 2025 chhung atana India Eastern Territory chhunga SAY te hmalakna tur leh rawngbawlna tur hrang hrangte sawiho a ni a. Chung zingah chuan, SAY member Biak In thleng phak lo te tan Programmes 'Bring them in' chak leh zual zawk a kalpui te, ruihhlo ngaite tan leh khawlai mite tana rawngbawlna kalpui mek Street Mission rawngbawlna chu inkaihhruaina tha zawk nena kalpui dan turte, Voice of Salvationist buatsaih leh Adult Rehabilitation Center (ARC), Chhiahtlang tihchang tlun dan turte rel a ni.

SAY Congress vawi 27na chu zanin aṭang khan Darlawn GSA Playground-ah ṭan niin, October 5 Pathianni zanah a ṭiak ang. Zanin khan pandal-ah palai lawmna inkhawm an nei a, SAY member sang rual an fuankhawm tawh a ni.

SAY Congress Pandal hlanna inkhawm chu 1st October 2025, Nilaini zan dar 7 khan neih a ni a. Pandal hlanna inkhawm hi Major Romawia Divisional Commander Northen Division chuan kaihruaiin, Rev C Lalremzuala, PCI Darlawn Pastor bial chuan Pathian hnena Pandal hlanna hun a hmang a ni.

Territorial SAY Congress 2025 atan hian Synod Pandal Structure hman niin, India Eatern Territory huam chhunga Division hrang hrang 7 leh Tripura District atangin palai 5500 atanga 6000 chuang kalkhawm thei tura beisei a ni.

Salvation Army India Eastern Territorial hnuaiah hian - Arunachal Pradesh, Assam, Manipur, Maghalaya, Mizoram, Nagaland, Sikkim, Tripura, West Bengal (ṭhenkhat), Nepal (ṭhenkhat) leh Kingdom of Bhutan te an tel a. Ṭawng an hman lar zualte chu - Adhibasi, Bengali, Bru, English, HIndi, Hmar, Manipuri (Meitei), Mizo, Nagamese, Nepali, Paite, Pali, Simte, Thadou, Vaiphei te niin , chanchinbu / magazine hi Sipai Tlangau (Mizo War Cry), The Officer (Mizo), Young Salvationists (Mizo), Chunnunpar (Mizo Women's Ministries magazine) leh Naupang Sipai (Mizo Young Soldier) te an tichhuak a ni.

[Hriatthiam awlsam turin - SAY inkhawmpui hi zanin aṭangin Darlawn Playground-ah ṭan a niq, October 5, Pathianni zanah a ṭiak ang. Vawiin khan rorel a ni a, Palai nawlpui an thlen hmain, vawiin khan rorel palai ten ro an lo rel tawh a ni.]

Rorel lai: