Remna leh muanna awm hnuah hmasawnna a lo lut zel a, Sakawrdai khawpuiah ngei YMA Inkhawmpui Lian kan han thleng ta mai hian hnuk a tiulh thei

Aizawl | Oct 22, 2025: Sakawrdaia YMA Inkhawmpui Lian Vawi 75-na 'Palai Lawm Zan' chu nizan khan Leader of Opposition leh bialtu MLA Lalchhandama Ralte chuan Souvenir tlangzarhin thusawina hun a hmang a, Mizoram hi chhe viau tawh leh kan thalaite pawh chhe ta viau anga sawi tawk an awm thin. Hei hi a pawi hle a. Ram leh hnam tana ding ngam heti zat kan la awm hi a lawmawm tak zet a ni, a ti.

Lalchhandama Ralte chuan, "Rambuai avangin hmar tlang dungah hun rei tak chhung YMA a ding thei lo a, development pawh a lut ngai lo. Hmar thimpui tih tawngkamte pawh kan hre thin. Remna leh muanna awm hnuah hmasawnna a lo lut zela Sakawrdai khawpuiah ngei YMA Inkhawmpui Lian kan han thleng ta mai hian hnuk a tiulh thei a ni," a ti.

Mizoram mipa population kiam chak lutuk chu buaipui tham a nih thu sawiin, "Kumina Economics & Statistics Dept-in data/statistic chi thum a tihchhuah kan zirchian chuan kum khat chhunga mitthi za zela 35 chu hmeichhia an nih laiin, mipa chu 65 an ni. Kum 10 chhunga nau piang 51% mipa leh hmeichhia 49% an ni. Mitthi zinga 42% chu thalai kum 15-54 inkar an ni a. Heng thalai thi kan sawite zinga 75% zet chu Mipa an ni."

Ram chhan ngam thalai an tam tih sawiin Pu Chhantea chuan, "Platform thenkhatah kan ram a chhe vek tawh, kan thalaite pawh an chhe tawh tia zirtirna him lo leh thalaite tibeidawng thei tura thusawi an awm fo thin. Mahsela, zaninah heti zat thalai rual ram leh hnam tana ding ngam kan la awm hi a ropuiin a lawmawm tak zet a ni. Thalaite tlem te kawng dik lo zawhte avanga kan chhe ta vek anga sawi hi a him lo a ni," a ti.

"Kan ramah leh hmar tlang dungah hmasawnna a lo lut zel dawn a, Act East Policy-te an ti a, hmar tlang dung ngei pawh NH02 leh 306A kaltlangin kawtchhuah thar kan la ni dawn. Kan hnam himna tura inven kawngah leh ruihhlo do kawngahte theihtawp chhuah turin mawhphurhna kan nei," a ti a. Khawmpui palaite chu YMA motto vawng nung tlat turin a chah bawk a ni.