PATHIAN AW KAN HRIATTHEIHLOH CHHAN KAWNG THUM

_Pathian Aw Hriat_

- Rick Warren

- Oct 7, 2025

“Hnimhlingnei zinga tla chu heng mi hi an ni; an hriat hnuin an kal a, dam chhung khawsak lungkhamnate, hausaknate, nawmsaknate chuan a dip a, an rah puitling ṭhin lo a ni.” Luka 8:14.

I rilru chu thildangin a luah a, a biktakin lungngaihna, sum leh pai leh thil dangin a luah nasat chuan Pathian aw i hre thei lo vang. Rimawi lam emaw TV en emaw ringawt i buaipui chuan Pathianin a biak hunah che i chhang hman lo vang. Chuvang chuan kan buaina hrang hrangte hi kan lak kian a ngai a ni.

Luka 8:7 ah chuan, “A ṭhen hnimhlingnei zingah a tla a, hnim chuan a ṭo rualpui a, a dip ral ta a.”

Isuan buhchi theh chungchangah khan a sawifiah ṭha hle a ni. Hnimhlingnei zinga tla chu a ṭo rualpui hnimin a dip ral mai a ni. Chuvang chuan rah pawh a chhuah thei lo a ni.

Isuan Luka 8:7 a kan hmuh awmzia hetiang hian a sawi a: “Hnimhlingnei zinga tla chu heng mi hi an ni; an hriat hnuin an kal a, dam chhung khawsak lungkhamnate, hausaknate, nawmsaknate chuan a dip a, an rah puitling ṭhin lo a ni.” Luka 8:14.

Pathian aw kan hriattheihlohna chhante chu:

*Lungkhamna.* Lungkhamna chu hnim to dangte an ni. I hringnunah harsatnate leh nitin khawsaknate i buaipui zawk chuan Pathian aw hriat a har ṭhin a ni. 

*Hausakna.* Thil lei tur chungchang emaw, ba rulh dan tur chungchang te emaw leh thildang i buaipui zawk chuan nun tak tak chu i pawh pha lo tihna a ni.   

*Nawmsakna.* Nawmsakna hrim hrim hi chu thil sual a ni hran lo. Nimahsela finkhur takin nung la, Pathianin i nuna  a thil tumte a hlawhtling lo vang tih a hlauhawm a ni.

Hnim te hi kan theh ngai lo tih i hria em? An ṭo ve tawp a ni. Diktak chuan hnim chuan ngaihthahna a ti lang a ni. I huanah hnim a lo ṭo chuan thlawh a hun a ni tih a entir. I thlarau nunah hnim an lo lan chuan - Pathian nena hun hman i ngaihthah deuh pawh a ni maithei e. Pathian chuan nasa takin a hmangaih che a, nang nena hun hman hi a duh reng a ni.

I nunah hnim an lo lan a, lungkhamnate, hausakna te leh nawmsaknate ten Pathian nena in inkarah an rawn tihchhiat chuan, chawlh hun a ni a, ngun taka inngaihtuah hun a ni. Pathian aw i hriatna daltu zawng zawngte la bo vek ang che. 

Ngaihtuah zui atan

* Thlarau lamah i ṭhan loh nana tibuaitu che engnge awm?

* Chungte chu atakin engtin nge i lak bo emaw i tihkian theih ang?

* Ni khatah fianrial hun engtia rei nge i hman thin? Fianrial hun i hman tam deuh deuh hian engtin nge i nun i thlak danglam theih i rin? 

[Lettu: Sangpuia]