Ni 5 awh tur SARAS Fair leh SHG Mela hawng; SHG chu eizawnna ngelnghet nei tura a mimal anga hmalakna kawnga harsatna awm thin sukiang tura thiamna leh theihna hrang hrang nei intelkhawm pawl a ni

Aizawl | October 28, 2025: Vawiin chawhma khan Mizoram Rural Livelihood Mission leh Urban Development & Poverty Alleviation Department tangkawp buatsaih, ni 5 awh tur 11th Sale of Articles of Rural Artisans Society Fair (SARAS Fair) leh Self Help Group (SHG) Mela 2025 chu Aizawl Lammualah Pu K.Sapdanga, UD & PA Minister chuan khuallian niin a hawng a. Prof. Lalnilawma, Minister, Rural Development & Administration Department chuan khual zahawm niin ‘SELHEL Brand’, ‘Chhimphei Online Marketing Portal’ leh ‘Broiler Ar Vulh Dan’ lehkhabu a tlangzarh a. Pu Lalmalsawma Pachuau, Secretary, UD&PA Department chuan hun a kaihruai a ni.

Khuallian K Sapdanga chuan SHG chu hun eng emaw chen a taka a lo tel ve thinna a nih thu leh a chhawr tangkaitu zing ami a nih thu a sawi a. SHG chu eizawnna ngelnghet nei tura a mimal anga hmalakna kawnga harsatna awm thin sukiang tura thiamna leh theihna hrang hrang nei intelkhawm pawl a nih thu a sawi.

Mizoram khaw hrang hrang atanga Self Help Group member-te kutchhuak hralh tur leh phochhuahna hun tha MzSRLM leh UD&PA tangkawpa buatsaih a ni chu lawmawm a tih thu Minister chuan sawiin, National Urban Livelihood Mission leh National Rural Livelihood Mission thil tum pawimawh tak, khawpui leh thingtlang nuho tana eizawnna ngelnghet siamsak leh an khawsak dinhmun chawikan sak kawngah SARAS Fair leh SHG Mela chu hmanraw tangkai tak a nih a beisei thu a sawi.

Khual zahawm Prof. Lalnilawma chuan 11th SARAS Fair leh SHG Mela chu Rural Development & Administration leh UD&PA hnuaia Self Help Group member-te tangruala stall 102 lai mipui tan tlawh theih a siam a ni chu SHG member-te leh a tlawhtute tan a hlawkthlakin an tangkaipui lehzual tur thu a sawi a. Program hlawhtling zawk kalpui a nih theih nana Department pakhat aia tam tanrualna hi chhunzawm zel tlak a nih thu a sawi. RD&A Minister chuan Mizoram SHG member-te tharchhuah leh siamchhuah thil chi hrang hrang chhinchhiahna tur leh danglamna bik nei turin ‘Selhel’ brand chu buatsaih a nih thu a sawi a. ‘Selhel’ brand lo hmelhriat turten Mizoram SHG-te chu a tha zawng chauha an hriat reng theih nan he brand hnuaia kan thlai, thei tharchhuahte leh thil chi hrang hrang kan siam chhuahte chu a tha ber ber chauh a nih theih nan thlitfimna leh endikna tha taka kalpui a pawimawh thu a sawi. Prof. Lalnilawma chuan arsa thianghlima kan intodelhna tur leh awlsam zawk leh sawt zawka sumdawnna kalpuina turin ‘Chhimphei Online Marketing Portal’ chu buatsaih a nih thu a sawi a, On-line in arsa kan mamawh angte chu chah mai theih a nih dawn bakah kan duhna hmun ah an rawn dah mai theih tur thu (Delivery) a sawi.

He hunah hian Pi Zosangzuali Pachuau, CEO, MzSRLM chuan report pein, SHG kaltlanga Mizoram khaw hrang hranga eizawnna ngelnghet siamna kawnga hma an lak dan tlangpui a tarlang a. Mizoram district 11-a RD block 28 chhunga khaw 721-ah SHG 11,257 din a nih tawh thu sawiin, chungah chuan member 81,030 an awm mek thu a sawi a. Kum hmasa lama SARAS Fair buatsaih ah khan SHG member-ten cheng nuai 50 chuang man hu bungrua an hralh thu tarlangin Pi Zosangzuali chuan kumin 11th SARAS pawh hi beiseina sang tak nen buatsaih a nih thu a sawi.

Pu Jacob Lalawmpui, Mission Director, DAY-NULM & Director, UD&PA Department tarlan danin NULM hnuaiah SHG 1,532 an awm mek a. Sanjha Utsav (SHG Mela) an buatsaih hnuhnun ber khan cheng nuai 14 man hu vel bungrua hralh a nih thu a sawi. Khawpui chhunga cheng thalaite thiamna tipung tura hmalakna kalpui dan te leh kawngsira sumdawngte tanpuina ‘PM SVAnidhi’ kalpui a nih dan a tarlang bawk a ni.

He huna tarlan danin MzSRLM hnuaiah Poultry Producer Company lian tak Chhimphei Women Poultry Producer Company Limited awm mekin, he company hian broiler ar vulh, hralhchhuah leh hatchery enkawl kawngah hmalakna an kalpui mek a. Tun dinhmunah he Company hian Aibawk leh Tlangnuam RD Block hnuaia khaw 9 te tuamin mi inhnamhnawih (shareholder) 354 an awm mek a ni. Company hian changtlung zawk leh ar note tharchhuah kawnga intodelh turin a tui tih keuna (hatchery machine) a enkawl thin a. Tun dinhmunah Melriat khua a A.H & Vety Department ramah MGNREGA Material Component atangin Company hatchery building tur sak mek a ni a. Tun kum tawpah chuan luahluh theih beisei a ni.

He company hmalakna enkawl tur hian MzSRLM leh SeSTA Development Service (SDS) te chuan thawhhona an nei mek a. Vawiin a tlangzarh tak Chhimphei Chicken Online Marketing Portal kaltlang hian mipui ten Mizo Nu tharchhuah arsa thianghlim leh hrisel chu Chhimpheichicken.com kaltlangin mahni inlum atangin an order thei tawh dawn a. He portal kaltlanga sa order te chu home delivery kalpui theih tura ruahmanna siam a ni bawk. Tin, hei bakah hian Broiler ar vulhtute hman tangkai turin Broiler ar vulh dan lehkhabu hi tlangzarh tel a ni.

Mizoram State Rural Livelihoods Mission (MzSRLM) hmalakna in Regional SARAS Fair hi vawi 10 neih a ni tawh a. He SARAS Fair ah hian MzSRLM hnuai a Mizoram hmun hrang hrang a Self Help Group ten an thil siamchhuah, handloom product, handicraft lamte leh an thlai leh thei thar chhuah atang a Processed food an siamchhuahte chu zawrh chhuah thin a ni. Nikum ah khan Champhaiah Hnahsin Kut nena buatsaih kawp a ni a, he hunah hian ₹57,85,197/- man hu SHG ten an bungrua an hralh chhuak a. Nikum December thla vek khan Aizawl ah SARAS Fair hi buatsaih leh niin, RD Block 28 atangin, SHG member 100 chuang rawn telin, he hunah hian ₹ 4,027,579/- man hu bungrua hralh chhuah a ni bawk.

Kumin hian a vawi 11-na atan Lammual Ground, Aizawlah UD&PA nena tangkawpin, MzSRLM leh MzSULM hnuai a SHG te ten SARAS Fair & SHG Mela, buatsaih leh a ni a, he hunah hian Stall – 102 bakah Food Stall- 8 buatsaih a ni a. Heng zingah hian MzSRLM hnuaia Block 28 chhung a khaw 71 atangin SHG member 98 ten Stall-52 leh Food Stall-2 an rawn nei thei a ni.